केवासे ४० छा वसन्त थाल्माहेन्से गिक्छा रेम डम्फु चुङ्जि । चुह्राङ बिबाकेन लामा याखारगि तामाङला कोलाला क्वाइसे पेबा नोन ल्हागतिसि खाजि । ङो केबा ग्ला थेन ङा छार्बा परिवेशरि ङाइ खाइमाइ डम्फु आम्राङ्नि ।

९९ प्रतिशत तामाङ मुबा ङाला नाम्सारि ङाइ खाइमाइ डम्फु चुङ्बा म्राङ्बा जेक्खे आहिन थेबा नोन आरेमुबा । खानाङए जंगबीर तामाङदा डम्फु ह्राप्बा कारणसेन थेदुइला राज्यसत्तासे जेलरि युबा बिबा थेबा दोङरापला प्रभावमि आहिन ? थे दोङराप खेन्पोकादेसे सेबा गोबा ताम हिन्ना ।

तिनि सेम आरेना आरेना म्रिङ्तेन दोजि गेताङरि दोजि । गेताङ थेह्राङ्बान याखारगि राजनीतिक दलला लोकल नेताकादेसे बोकिन्बा ओस्बान गेताङ मुसिम बिबा म्हान्बा मुबा । गेताङ ताबा भवन ‘तामाङ कुदाप धिम’रि दोते दोना गेताङरि चिबा सेम आरेमुबा । म्रिङ्से कर लामाहेन्से तिगा गेताङ चिम च्यागे ले बिसि फिरि गेताङ ताबा हलरि दोजि ।

ङोसेबा खालाइ आम्राङ्नि जेक्खे फेसबुकरि म्राङ्चिबा फुलकुमार बम्जन बिमा । हल न्हाङरि वाङ्मा बिसाम खानाङ खानाङ सेम ताङ्सिकेन खाजि । तामाङ ङोसेबा उन्बा फेबा याखारगि हल मुबा । खासरि गेताङ चिम ‘डम्फु ह्राप्पा, लोप्पा गेताङ’ । याखारगि तामाङ तामाहेन्से डम्फु म्राङ्बातेन डम्फुला आत्मीयता फेबान ताबा चिम ! खाराङ्बा ताङ्बा खाबा ! खाराङ्बा आनन्द खाबा खाइ ! पेङदोर्जे म्हेमेसे तिगा मोहनी ल्हागाब लासि बास्ह्युजि डम्फुरि थाहा आतानि ।

डम्फु लोप्बा बाङ लाजि तासाइ आखाम्नि । स्यान्दोसे योनान लोप्बाह्राङ छोर्जि तासाइ ङाइ डम्फु चुङ्बारि नोन आसेबा ह्राङ्बा ङ्हाम्जि । म्हान्बाह्राङ देबाः आरेबा चिम डम्फु चुङ्बारि ओम ह्राप्पारि । तासाइ नोन प्रयास लाजि । फुलकुमार बम्जन ह्रेम्बोरछेदा ल्हाना ल्हाना थुजेछ ।

(छिगला अर्थः केवा– जिन्दगी, क्वाइ– नाता/साइनो, केबा– जन्मेको, देबाः– सजिलो)

दोःबा : यकिना अगाध