ङादा तिनि थेदुइला डान्बा खाजि । थेदुइरि ङा बिजा मुबा । बिजादुइरि लाबा उपद्रोकादे तिनिह्राङ छोर्बा मुला । ङानि चिबा ग्लारि बम गेङ, क्रिमरोल थेन केक स्होबा कारखाना मुबा ।
आमासे सातान ङादा जाजा तोसोला ‘तोस गेङ’ ग्लुबारि पुइस्ह्युमुबा । ङानोन ताङ्सिकेन निमुबा तिल्दाबिसाम थेरि कागजला केकेबा याङ्मुबा ।
क्रिमरोलरि युबारि कागजरि केकेबाला क्रिम फोर्बा तामुबा । थेदा रोलरि युमाहेन्से ‘कागजला केकेबा’ बिमुबा । थे ङादा आउदिन ब्रोइखाबा छोर्मुबा । थे याङ्बा आशारि ङा ताङ्मुबा ।
गेङ ग्लुसि खामाहेन्से ङादा आउदिन उपद्रो खामुबा । लेपलेप ‘तोस गेङ’ भुक्का बोबा तामुबा । गेङ्ला गुङरि क्रिम युबा तामुबा । गेङ ग्लुमाहेन्से ङा योनायोना दिमरि आनिना गोल्छेसे निबा लामुबा । तिल्दाबिसाम ग्यालामरि गेङला दिग्याम गाल चाल्सि न्हाङ्ला केकेबा तेसि चासिकेन निबा लामुबा । गेङ माङ्ग्यारग्याम च्यामा ओस्बान म्राङ्मुबा ।
‘आमा गेङ खाजि होइ !’ दिमरि दोमाहेन्से ङाइ आमादा पाङ्जि ।
‘टेबुलरि थान्गो ।’ गेरि कोल्चिबा आमासे सुङ्जि ।
ङाइ ताङ्सिकेन टेबुलरि थान्जि । आमासे गे जिन्माहेन्से न्हाङरि ज्योन्खासि गेङ थाबारि म्हाइजि । गेङला न्हाङ्ला गुदी आरेमुबा फिमाङ जेक्खे मुबा ।
दोगो केकेबा चाबा ङाइ दातेबिसाम आमाला सिर्कना स्याप्मुबा । ओम, दोलो गेङ चामा छ्योपछ्योप ङ्हाम्बा सुङ दातेबिसाम आथाता... आयाया... बिबारि चुमुबा ।
थेदुइ क्योलोलोह्राङ छोर्ला दातेनोन ।
ङाला बिजा बुद्धि नोन खाराङ्बा ? थेदुइला बुद्धि म्राङ्सि दाते नोन ङेबा खाला !
भारत ।
(छिगला अर्थः बिजादुइ– बाल्यकाल, लेपलेप– ता–तातो, फिमाङ– बोक्रा)
दोःबा : यकिना अगाध
तपाईको प्रतिक्रिया दिनुहोस