नाम्सासे क्याथाङ ह्रि ङामरि दिम गि मुबा । दिम मि तिला बिसे ब्राङ मुबा । ख्युरुरु सोसे ह्रोइबाला । न्हान्बाला सो ग्ला ग्लारि गाल ताजिन्बा । 

बोक्टो ब्राङ । याखरगि म्हान्बा माम खुयु जे मुबा । 

मामदा पाच्छाकि डाप ल्हाना ताङ्मुबा । थेजे आहिन च्याख्ला थेन माकाइला काङ्बा कान छ्यामरि पोलो थेन सोङ्कानला खु बिमाहेन्दे माम खुयुला सुङरि थोनोन खामुबा । 

मामसे लाह्वारारि जाजाकि पाच्छाकि डाप सुमुबा । तिरेकुनु मामसे डाप थेन माकाइला कान चाबा सेम लाजि । डाप थुसि बाजि । साइबा चुजि । थेनोन दुइरि मामदा मायुङ नाम्सासे छाया किन्बारि दोगाजि । माम खुयु मायुङ दिमरि निबा ताजि । डाप खाल्छे चासाइ । दारेम डाप आन्होङ्गाइ बिसि माम खुयुसे फान्दे ल्हाप्तेला ग्रेन टापारारि युसि सतिप्रोला बासे गाप्जि । टापारादा गोर्कि माथुरा न्हाङरि खिसि सान्हाङरि थान्जि । थेफिरि युङ्बासे नाङ्सि मयुङ दिमरि निजि । 

ङिस ब्रे रे लिच्छा माम दिमरि दोगाजि । मामसे सान्हाङ ग्याम डापला पोरे तेजि । आज्याबा थाङ्खाबा ह्राङ्बाइ ज्याबा थाङ खाबा ह्राङ्बाइ । मामदा डाप ब्याङ्बा सेम आतानि । म्ह्याङ्सि च्यागे म्हान्जि । म्याङ्जि । डाप ह्राङ्बा नोन, क्युङ्बा क्युङ्बा ब्रोइखाबा स्हे दोजिम । मामखुयुसे थेरि मार्चा, चाचा बेनान दोङ्सि बेनादान म्ह्याङ्बारि पिन्जि । क्युङ्बा क्युङ्बा मोरे ह्राङ्बा थे छार स्हे बेनादा ज्याबा छोर्जि ।

दारेम नाम्साबासे नोन डाप थुसि सातिप्रोला बासे गाप्सि माथुरासे खिसि सान्हाङरि थान्सि निस ब्रेरे लिच्छा तेसि चाबा तिजि । थेला मिन चा गान्डु पाङ्बारि चुजि ।