ज्योमो ङाला नाना थेबाला मिन हिन्ना । ज्योमो ङाला बुरिङ थेबाला मिन हिन्ना । चेकाइसे ङाइ ङाला नाना ज्योमोदा खाइमा नाना थेबा बिमुला बिसाम खाइमाचा चेकाइसेन ङाइ ङाला नाना ज्योमोदा बुरिङ थेबा बिमुला । तिलातामा बिसाइ नाना ज्योमो ङाला नाना थेबा हिन्ना । तिलातामा बिसाइ नाना ज्योमो ङाला बुरिङ थेबा हिन्ना ।ङाला सेमला नाना थेबा । ङाला तिङला बुरिङ थेबा ।

ङाला कोन बुद्धिबहादुर दोङ जनयुद्धला दुइसाङरि सहिद दोसि जिन्मुबा । ङाला कोन बुद्धिबहादुर सहिद दोबाबिबा ताम थेमाकुनुहेन्दे तिनिदोनान ङाला नाना थेबा थामथोमरिन मुला । ङाला कोन बुद्धिबहादुर सहिद दोबाबिबा ताम थेमाहेन्दे तिनिदोनान ङाला बुरिङ थेबा थामथोमरिन मुला । जामान मिख्लिसे फुबा ङाला नाना थेबाला÷ङाला बुरिङ थेबाला मि तिनिदोनान फुबान मुला, खाइमाइ आस्हामह्राङ लासि ।

ह्राङसे केवा पिन्बा, सायार लाबा ओम कादे स्हुस्हेर नासि छार्ना लासिहुर छार्जिन्बाह्राङला कोला ह्राङलान ओन्छाङ डोङमा खाप्पाचा आमाला सेम आक्रा ? खाप्पाचा आमाला तिङ आक्युइ ? खाप्पाचा आमाला सेम आसि ? ङाला नाना थेबा लाइ नोन सेम सिजि । ङाला बुरिङ थेबा लाइ तिङ क्युइजि । खाइमाइ आफान्ना लासि । खाइमाइ गे आथिना लासि । ङाला नाना थेबाला सेम सिजि । ङाला बुरिङ थेबाला तिङ क्युइजि । थाआयाङना लासि क्युइजि । खालाइसे थाआयाङना लासि सिजि । ङाला नाना थेबाला सेम । ङाला बुरिङ थेबाला तिङ ।
ङाला कोन बुद्धिबहादुर जनयुद्धरि ब्राबा दुइरि ङा जाजान मुबा । आथाङबा । सेम आथाङबा । सेम थाङसाइ आथाङसाइ ङाइ था मुबाकि ङाला कोन बुद्धिबहादुर लाह्राङबा मुबा । साक्सेन सेम निबा । साक्सेन तिङ नाबा । नाम्सारि ङाइ ङाला कोन बुद्धिबहादुरलान छ्यावाल्ला ह्रोकादेरि ङाइ ङाला कोन बुद्धिबहादुरला ह्राङबा ज्याबा ह्रिक्पा÷ज्याबा सेम याङखाम्बा आरे तिनिदोना । ङाला कोन बुद्धिबहादुर लोपखाङ लाइ नोन ज्याबा लोप्डा मुबा । लोपखाङला सरमिसकादेसे नोन ङाला कोन बुद्धिबहादुरदा ल्हानान सेम निमुबा । तिङ नामुबा । ओतेचे आहिन्ना, ङाला कोन बुद्धिबहादुरदा सरमिसकादेसे याछिनसे उन्सि बिमुबा, ‘बुद्धिबहादुर लिच्छा निसि ग्रेन म्हि दोला ।’
ङाला कोन बुद्धिबहादुरदा सरमिसकादेसेचे आहिन्ना, ङाला कोन बुद्धिबहादुरदा सेबागोबा नाम्साला छाङमासेन ङाला कोन बुद्धिबहादुरला सरमिसकादेसे ह्राङ लासिन तिखुरिन बिमुबा, ‘बुद्धिबहादुर लिच्छा निसि ग्रेन म्हि दोला ।’ङाइए नोन ङाला कोन बुद्धिबहादुरला थोरि चुनोन म्हान्सि टिमुबा, सेमन्हाङन्हाङरिन ।

जनयुद्धरि निमाहेन्दे ङाला कोन बुद्धिबहादुरदा म्राङबारि ल्हानान दुइ ब्रान्तोजि ।ल्हानान दिङ ब्रान्तोजि । तिरेकुनु ङाला कोन बुद्धिबहादुर आदेङदेङ लासि नाम्सारि स्हाङ दोकाजि । ह्राङ केबा÷हुर छार्बा नाम्सारि स्हाङ दोकाजि । ङाला कोनदा म्राङसि ङाला सेम ताङजि । ङाला कोनदा म्राङसि ङाला तिङ ताङजि । ह्रुप ताबाइतेन ङाला कोन बुद्धिबहादुरसे ङादा हापख्वाइसि सुङजि, ‘आस्याङ, ज्यानालासि डोगो । लोपखाङरि निबारि आख्लागो । तिलाइ लासि आख्लागो ।’

ओराङबिसि फेबा तिलाइ दिङलिच्छा ङाइ खालाङ खालाङग्यामसे थेजिकि ङाला कोन बिगे ङाला बुद्धिबहादुर कोनसे चु जाम्बुलिङ ख्लासि निजि । ब्लेक ख्लासि निजि । ङादा लोपखाङरि निबारि÷ज्यानालासि डोबारि बाङ दोन्बा ङाला तिङमा कोन बुद्धिबहादुर दात्ते ङाला ओन्छाङ आरे । चु जाम्बुलिङलान ओन्छाङ आरे । खालाइ खालाइला ओन्छाङ नोन आरे । मुनोन आरे ।

ङादा आज्याना ङ्हाम्जि ।

ङाला कोन बुद्धिबहादुर च्यामाइ तोक जेबा मुबा । सेमए नोन ह्राङतेबान जेबा मुबा । तोक जेबा । ङाला कोन बुद्धिबहादुरला एसएलसि दुम्जाग्यामसे तामुबा । एसएलसिरि ज्याबा मार्क बासि पास तामुबा । थेए नोन फास्र्ट डिभिजनरि पास तामुबा । कलेजरिचा ङाला कोनसे ज्यानालासि डोआम्याङनि । थेला कारनए मुला । थे तिला बिसाम ङाला कोन जामा भुमिगत तासि ब्रामुबा । भुमिगत ल्हुइ आरेसाम ङाला कोन बुद्धिबहादुरसे कलेजला डोबालोप्पाइ नोन ज्यानालासि थुम्ना लासेला मुबा । अनुकुल वातावरन आरेना÷भुमिगत ल्हुइ सोतोबासे लासि ङाला कोनसे कलेजला डोबालोप्पा लाआम्याङनि । मुसाइ स्वअध्ययनचा ङाला कोनसे लासिन टिजि, थेन आटिना लासिन टिजि ।

दुम्जा गाङरि डोबा दुइरिन हिन्ना, ङाला कोन बुद्धिबहादुरला ङाला कोन डोबा लोपखाङग्यामसे छिबा स्मारिकारि ङाला कोनला समसमायिक विसयला थोरि सेमतामकादे छिबा । ङाइए नोन ङाला कोनला ओजा सेमतामकादेदा थे स्मारिकारि डोम्याङमुबा । थेए नोन ङाला कोन बुद्धिबहादुर डोबा लोपखाङरिन डोबासे लामा ङाइए नोन डोम्याङमुबा । जामा दुइरि डोबा ङाला कोनला ओजा सेमतामकादेदा डान्सि बामा÷थुम डान्सि बामा दात्ते नोन ङाला सेमदा ल्हिक्सि टिमुला । दात्ते नोन ङाला तिङदा ल्हिक्सि टिमुला । ओराङबा मुबा, ङाला कोन बुद्धिबहादुरला जामा दुइला स्मारिकारि छिबा सेमतामकादे ।

ङाला नाना ज्योमोदा डान्बाइतेन ङाइ तिखुरिन ङाला जात्तुकु रेदा डान्ला । थुम डान्ला । ङाला जात्तुकु रेदा डान्बाइतेन ङाइ तिखुरिन जामा दुइला तिवारदा डान्ला । थुम डान्ला । दिङगिला तिरेम तिवार खामुबा । तिवार खामाइबिजि ङाला नाना ज्योमोसे ङानि रुलुलुबा आलेकादेदा चेकाइसे किन्काबारि दिमरिनस्हाङ दोकाबा मुबा । जामा ङानिकादे रुलुलुबान मुबा । आथाङबा । ङानि ज्योज्योआले गोर डु मुबा । ङाला नाना थेबाला रुलुलुबा आलेकादे । ङाला बुरिङ थेबाला रुलुलुबा मायुङकादे । जात्तुकु आलेकादे । आथाङबा मायुङकादे । तावार आमासे ह्राङला कोलाकादे खोबाह्राङ लासि खोमुबा ङाला नाना थेबासे ङानि आलेकादेदा । तावार आमासे ह्राङला कोलाकादे खोबाह्राङ लासि खोमुबा ङाला बुरिङ थेबासे ङानि मायुङकादेदा । 

तिवारए बिजिङाला नाना थेबाला याग्यामसे ङानि डुसे ल्हानान रेम÷रेमरेम माला क्वान्जि । टिका थान्जि । क्युइ थुङजि । थेला ताङ नोन आरे । थेला नाच्युन आरे । मुनोन आरे । कादे रेम थान्जि । थान्जि । थेला साइ नोन आरे । ङाला नाना थेबाला÷ङाला बुरिङ थेबाला चेकाइदा ङाइ म्लेबा आरे । तिलाइ लासि म्लेबा आरे । ङाइह्राङ लासिन ङाला दिला आले डुसे नोन म्लेबा आरे ताला तिनिदोनान ।

ङाइह्राङ लासिन ।

ङाला नाना थेबा ओराङबा मुबा । ङाला बुरिङ थेबा ओराङबा मुबा । ङाला सेमला नाना थेबा । ङाला तिङला बुरिङ थेबा ।

ङाला कोन बुद्धिबहादुर डोङमाहेन्देचा ङाला नाना थेबा÷ङाला बुरिङ थेबा ल्हानान क्रासि ब्राजि । सोङ खार्बा कु तोसि तोसि । डेङरि ङ्हो ठोक्सि ठोक्सि । क्रासिन टिजि । कु तोसिन टिजि । ङ्होठोक्सिन टिजि । थाआयाङना । खालाइसे थाआयाङना । थेन आटिना । आब्लाप्ना ।

तिरेकुनु ङा आदेङदेङ लासि नाम्सारि दोजि । नाम्सारि दोबा दुइरि ङाइ ङाला नाना थेबा÷ङाला बुरिङ थेबा ताइ ह्रुप तानिजि । ङाला नाना थेबा÷ङाला बुरिङ थेबाला लिरि ना ताङबा मुला, ना क्राबान । ताङबाइ आरे । क्राबाइ आरे । ङाला नाना थेबाला मिरि । ङाला बुरिङ थेबाला मिरि ।

तिलाइ तिलाइ आरे ।

ङाला नाना थेबाला ताङबा÷ङाला बुरिङ थेबाला क्राबादा । बोर्जि सेम दुइरि आसात्ति थे लासे । सेम दुइसि बोर्जि । थाआयाङना बोर्जि । आदेङदेङ लासि बोर्जि । 

थेन आटिना बोर्जि ।

ङाला नाना थेबादा÷ङाला बुरिङ थेबादा ङाइ ङाला कोन बुद्धिबहादुर डोङमाहेन्दे थामथोम नोन म्राङमुला । ना मिग्याम मिख्लि ताइला । ना सेम फुर ताङला । ङाइ म्हान्जिकि, ङाला नाना थेबाला मिख्लि चेसिन मुताला, ङाला नाना थेबाला मिरि मिख्लि आम्राङबा । ङाइ म्हान्जिकि, ङाला बुरिङ थेबाला सेम सिसिन मुताला, ङाला बुरिङ थेबाला सेमरि ताङबा आम्राङबा । ङाला नाना थेबाला÷ङाला बुरिङ थेबाला ओराङबा थामथोम्बा ल्हुइदा म्राङसि ङादा आज्याना ङ्हाम्जि । दाबे आज्याना ङ्हाम्जि । ङाइ ङाला नाना थेबादा च्याआखाम्नि । ङाइ ङाला बुरिङ थेबादा च्याआखाम्नि ।

ङा ग्याप्लो दोजि ।

जनयुद्धसे ङाला कोन ङ्हिदा सेम दुइसि बोर्जि । रेमरेम लासि बोर्जि । गिक्छारेम ङाला कोन सिङगबहादुरदा बोर्जि । सेम दुइसि बोर्जि । ङ्हिक्छारेमचा ङालान कोन बुद्धिबहादुरदा बोर्जि । सेम दुइसि बोर्जि । ङाला कोन बुद्धिबहादुर थेन ङाला कोन सिङगबहादुर ङाला तिङमा कोन मुबा । ङाला तिङरि टिखाम्बा कोन । ङाला सेमरि टिखाम्बा कोन । ङाला कोन । ङाला चेक्खे कोन । मिला ङ्याल्मोरि थान्साइ आफुबिबा ह्राङबा मुबा । ङाला तिङमा कोन । ङाला दिङमा कोन । ङाला कोन । ङाला सिङगबहादुर थेन ङाला बुद्धिबहादुर कोन ।दारेम ङाइ खाइमाइ म्राङआम्याङ । दारेम ङाइ खाइमाइ ह्रुप ताआम्याङ । ङाला चु कोन ङ्हिदा । तिलाइ लासि म्राङआम्याङ । तिलाइ लासि ह्रुप ताआम्याङ । तिलाइ तिलाइ लासि ।