हेराङ । हेराङला बज्रबाराही चापागाउँ अस्पतालदा गुणस्तरीय, उत्तरदायी थेन ह्युल्बामैत्री सेवाला नमुना स्होबारि सरोकारवालाकादेसे बाङ पिन्बा मुला । नेपाल स्योमि गेन्दुनछेन, हेराङ शाखासे नारे ङ्योइसाङ लाबा अस्पतालला सामाजिक परीक्षणरि बोकिन्बाकादेसे अस्पतालला सुधार, सेवा ल्हेनालाबा थेन ह्युल्बाला विश्वास स्हेङ्बारि बाङ पिन्तोबा काइ रेन्बा मुला ।

सामाजिक परीक्षण गेताङरि सेमताम थान्बान बागमती गाउँपालिका चोहो बीरबहादुर लोप्चनसे बज्रबाराही चापागाउँ अस्पतालदा प्रभावकारी अस्पतालला लिरि फेल्गेबा लातोबा बाङ पिन्जि । ‘महानगर व्हा नगरपालिकासे ह्राङ्लान स्रोतसे नोन अस्पताल संचालन लाबारि खाम्ला, तासाइ स्रोत थेन साधनला अभावरि गाउँपालिकादा गाह्रो मुला’ थेसे पाङ्जि, ‘ह्युल्बाला हितदा ह्याङ्से ध्यान पिन्तोला, खाजिबाइ नाबासे चुरि खासि सेवा आयाङ्बा नाछाल तालाआदे, जनचेतना स्हेग्याम चुर्ला सेवाबारे जानकारी पिन्सि नोइ ल्हागतिसि क्योन्बा बिमा नोइ च्याङ्ना लाबारिक्यार ध्यान पिन्तोला ।’

गोदावरी नगरपालिका १३ ला चोहो भास्कर थापासे ह्राङ्से थाहा याङ्मा ‘ससिखेल हेल्थपोष्ट’ बिसि ङोसेबा चु अस्पताल तिनि प्रदेशस्तरीय अस्पतालला लिरि विकास ताबा उल्लेख लासिकेन चु थुमला स्थानीयकादेला विश्वासिलो सेवा प्रवाह जरुरी मुबा पाङ्जि ।

वडा नं. ११ ला चोहो नीलबहादुर देसारसे नाबाला चाप ल्हेमा सुताइ अस्पतालरि सेवा किन्बाला संख्या च्याङ्बा चिन्ताला नुर ताबा पाङ्जि । थेसे ह्युल्बारि अस्पतालफिरि विश्वास ताना लाबारि प्रभावकारी सेवा पिन्बारि जरुरी मुबा पाङ्जि । अस्पताल संचालक समितिला चोहो रामहरी घिमिरेसे सामाजिक परीक्षणग्याम खाबा सुझावदा सुधारला दुइसाङला लिरि किन्सि गेला योजनारि थान्सेला पाङ्जि ।

‘ङानि ग्लेठिमरि आहिन, सेवारि केन्द्रित मुला । समितिसे स्होबा योजना आन्सार गोनेहेन्से सुधारला गे ताला’, थेसे पाङ्जि । मेडिकल सुपरिटेन्डेन्ट डा. अंकुर पौडेल अस्पतालरि लिच्छाला दिङ गिरि उल्लेखनीय प्रगति ताबा बिबान ९८ तोसोला मान सातान आयाङ्बा, एम्बुलेन्स न्होङ्बा, अस्पतालला मिन आतामा सेवा प्रवाहरि काक्ता खाबा ह्राङ्बा गुनासो थान्जि । तासाइ नोन सेवाला गुणस्तररि ध्यान पिन्सि टोकन प्रणाली, सर्जरी सेवा, नार्तु, न्हाब्याङ, खारेला क्योन्बा ह्राङ्बा थुमरि सुधार लाबा थेसे पाङ्जि ।

चुह्राङ्नोन लासि डा. अमरदीप शाहसे ङच्छाला बिमा दाते भर्ना ताबा नाबाला संख्या ल्हेबा मुला बिसि पाङ्जि । थेसे पाङ्जि, ‘खेन्पोला सेवाला पहुँच ल्हेबा मुला, तासाइ बिमा भुक्तनी आहाबासे काक्ता ल्हेबा मुला ।’

नेपाल स्योमि गेन्दुनछेन हेराङ शाखाला चोहो रामहरी कार्कीला चोहोदानरि ताबा सामाजिक परीक्षण गेताङरि स्योमि, सेवाग्राही, जनप्रतिनिधि, डाक्टर, नर्सला छ्याम नागरिक समाजला ७९ म्हसे बोकिन्बा मुबा ।

(छिगला अर्थः हेराङ– ललितपुर, स्योमि– पत्रकार, गेन्दुनछेन– महासंघ, नारे– बिहीबार, फेल्गेबा– विकास, नाबा– विराम, नाछाल– अवस्थ, नोइ– रोग, क्योन्बा– उपचार, नुर– विषय, गोने– साउन, काक्ता– समस्या, खेन्पो– विशेषज्ञ, म्हे– जना)