बहराईन । नेपाल तामाङ घेदुङ, बहराईनसे १९ सेप्टेम्बर २०२५ रि १६ छा दिङ्कि काप्तोन दाङ्बा मुला । गेताङ बहराईनला राजधानी मानाला भेटघाट नेपाली रेस्टुरेन्टला जोम्नाहलरि ताबा मुबा ।

बहराइन फाइनान्सिङ कम्पनीला प्रतिनिधि मिलन थिङला ग्रेनडोन्बोरि ताबा गेताङरि डेन सेमताम घेदुङला वरिष्ठ स्यानचोहो योजना तामाङसे थान्बा मुबा ।

गेताङरि बहराईनला लामागुरु सबिन तामाङसे नेपालला जेन्जी ङ्योलोकरि सहिद दोबा मुतेबा आत्मजुगुला स्हिवाला मोलम लाबा मुबा ।

नेपाल तामाङ घेदुङ प्रवास गेदाछोक, बहराईनला ग्रोइपा सन्तोष तामाङसे गेताङरि तामाङला रिमठिम, धर्म, संस्कारफिरि ह्राङ्ला ताम थान्बा मुबा । गेन्दुनला न्होरचोहो श्री लामासे चु दिङला आयव्यय विवरण प्रस्तुत लाबा मुबा ।

पेमा पाख्रिनला चोहोदानरि ताबा गेताङरि नेपाल तामाङ घेदुङ प्रवास गेदाछोकला पदाधिकारीजुगु, बुद्धिजीवी, बहराइनरि मुबा तामाङ ज्योज्योआले नानाआङजुगुले भव्य स्ह्रुगरि बोकिन्बा मुबा ।

(छिगकि दोनः दिङकि– बार्षिक, काप्तोन– उत्सव, स्यानचोहो– उपाध्यक्ष, ङ्योलोक– आन्दोलन, गेदाछोक– कार्यसमिति, ग्रोइपा– सल्लाहकार, न्होरचोहो– कोषाध्यक्ष)