सिन्धुपाल्चोक ७ तापाग्रेन । सिन्धुपाल्चोकला मेलम्ची नगरपालिका वडानम्बर ९ रि मुला ज्यामिरे नाम्सा । चुरि मुबा क्यौलेठाना दानिस्ह लोप्खाङरि दाते १०८ म्हे लोप्खेनजुगु मुला । वि.सं. २०३३ ल्होरि स्हेङ्बा चु लोप्खाङरि खेडोचिबा लोप्खेनजुगु मोक्कोन प्रतिभावान मुला । खालाइ वक्तृत्वकला, खालाइ खेडोब थेन खालाइ सीप लोप्बा थेन लोपपिन्बारि निपूर्ण मुला । 

चुरि दुइदुइरि ल्होलो सीप लोप्बा कुबा नोन पिन्ना । चुनोन ताङरि कामरे चुर्ला लोप्खेनजुगुदा स्थानीय बार्बुस्हे (मा) ग्याम छाङ राबा सिप लोपजिन्बा मुला । लोप्बोन थेन लोप्खेनजुगुला संयुक्त प्रयासरि माग्याम छाङ राबा सीप लोप्बा हिन्ना । 

लोप्खाङरि स्हेङ्बा लोप्बोन अभिभावक गेदुङला ह्रोमि आइसिहं तामाङला गोछाबाकिरि स्थानीयस्तररि याङ्बा बार्बुस्हेग्याम स्होबा बार्बुस्हेजुगु गुङ्ला छाङ स्होबा हिन्ना । चुनोन दुइसाङरि माकाइला खोस्टाग्याम चकटी स्होबा सीप सुताइ लोप्बा ह्रोमि तामाङसे पाङ्जि । 

माला ज्याबा उत्पादन ताबा थुमरि चुह्राङ्बा सीप लोप्बारि खाम्साम चुसे ह्रेवाकि केवारि ल्हानान ह्रो तासेलासे लोप्खाङला प्रधानाध्यापक भरतकुमार मल्लसे पाङ्जि । चु तोसोला सीप लोप्बारि लोप्खेनजुगुसे आउदिन सेम ल्हागाब लाबा थेला पाङ्बा मुला । 

‘मुतेबा सुङरे बुक फ्री फ्राइडे गेताङ सञ्चालन लाबा थेन थेनोन गेताङ आन्सार चु हप्ता ह्रेवाकि सीप न्हाङरि छाङ, चकटी राबा लोपपिन्बा हिन्ना ।’ मल्लसे पाङ्जि, ‘लोप्खेनदा किताबी ग्युइ जेक्खे आताना ह्रेवाकि ग्युइ नोन ओतेबान महत्वपूर्ण ताबासे चु दिङहेन्से बुक फ्री फ्राइडे न्हाङरि ह्रेवाकि ग्युइदा नोन थुइबा हिन्ना ।’

(छिगकि दोनः दानस्हि– आधारभूत, म्हे– जना, लोप्खेन– विद्यार्थी, खेडोचिबा– अध्ययणरत, कुबा– तालिम, मा– निगालो, लोप्बोन– शिक्षक, गेदुङ– संघ, ह्रोमि– सदस्य, गोछाबाकि– प्रतिनिधित्व, बार्बुस्हे– सामाग्री, ह्रेवाकि– व्यवहारिक, केवा– जीवन, ग्रादाङ– जानकारी)