याम्बु । यान्पाङ ओसेम ग्रा प्रविधिब्लोन जगदीश खरेलसे ग्यालठिपा प्रभावला ङ्यान्दि नेपाल स्योमि गेन्दुनछेनला दोङराप न्होङ्बा पाङ्जि । देन्बा थेन तथ्य ग्रा पिन्तोबा स्योमिलान दोङराप फ्याबा ख्योल्बा ताबा बिबान थेसे स्हेङ्खेन चोहोला दोङराप स्थापित लाबारि ह्राङ्से भूमिका क्लाङ्सेला पाङ्जि ।

नेवाः स्योमि ग्याल्साङ दबूसे हेराङरि कामरे लाबा गेताङरि नेपाल स्योमि गेन्दुनछेनला स्हेङ्खेन चोहो सत्यनारायणबहादुर श्रेष्ठला नुररि चर्चा लाबा हिन्ना । ब्लोन खरेलसे देन्बा थेन तथ्य दस्ताबेज प्रस्तुत लाबारि दाल्ना लाजि । वास्तविक तथ्य डुप्बा सत्यनारायणबहादुर श्रेष्ठदा नेपाल स्योमि गेन्दुनछेनला स्हेङ्खेन चोहो स्होबा थुमरि ह्राङ्से नोन पहल लासेला ब्लोन खरेलसे आश्वासन पिन्जि ।

सत्यनारायणबहादुर श्रेष्ठला माइच्याङ जामे सुजिता मानन्धरसे ह्राङ्ला अपाासे स्योनाम थेन ग्युइसेर थुमरि लाबा योगदानला चर्चा लाजि । थेदुइला दरबारछ्यामला ब्रेल्बालान ङ्यान्दि निर्वासित केवा सोबारि भारतला कलकता दोबा श्रेष्ठ बहुुदलीय प्रजातन्त्र लिच्छा नेपाल खाबा राप थेसे पाङ्जि ।

नेपाल स्योमि गेन्दुनछेनला स्हेङ्खेन चोहो श्रेष्ठला ११० छा केवा दुइसाङरि ताबा गेताङरि यान्पाङमि  प्रकृति अधिकारीदा पुरस्कृत थेन रामकृष्ण कर्माचार्यदा डेन लाबा मुबा । अधिकारीदा सत्यनारायणबहादुर श्रेष्ठ प्रेस ह्राङ्बाङ्बा सेनानी पुरस्कार ११४६ पिन्बा मुला । गोरखापत्र ग्याल्साङ रेदाङ्सेला स्यानडिक्खे अधिकारीदा नगद राशी २५ तोङ्जाला छ्याम डेनस्यो पिन्बा मुबा ।

सत्यनारायणबहादुर श्रेष्ठ प्रेस ह्राङ्बाङ्बा सेनानी डेन ११४६ श्रेष्ठला ह्रो वरिष्ठ स्योमि रामकृष्ण कमाचार्यदा पिन्बा मुबा ।

गेताङरि सोमछा मिडिया कप फुटसल प्रतियोगितारि ह्रेमकोलाव्हना हेराङ महानगरपालिका वडा १६ कलाकार दाछोक थेन हेराङ्लान जामेकोला स्योमिदा उत्कृष्ट ताबासे प्रमाणस्यो, ट्रफी थेन मेडल पिन्बा मुबा ।

नेपाल स्योमि गेन्दुनछेन स्हेङ्खेन चोहोला स्ह्रुगरि श्रेष्ठदा स्थापित लाबारि नेपाल आदिवासी जनजाति स्योमि गेन्दुनछेन (फोनिज) थेन नेवा स्योमि ग्याल्साङ दबूसे दशक गिहेन्से निरन्तर अभियान सन्चालन लासिकेन खाबा मुला । श्रेष्ठला नेतृत्वरि २००८ दुगु ९ गते नेपाली स्योमिजुगुलान मोक्कोन बिमा ङ्हाच्छा नामकि संगठनला स्ह्रुगरि नेपाल स्योमि गेदुङ स्हेङ्बा मुबा । मोक्कोन स्योमिदा संगठित लाबा दोन्तासे गेदुङ स्हेङ्बा दिङ गि लिच्छा २००९ दुगु २८ गते श्रेष्ठलान नेतृत्वरि संघ पुनर्गठन ताबा दोङराप मुला ।

फुटसल प्रतियोगितारि स्योमि, कलाकार ओसेम स्यान्दो नामकि गेदुङ गेन्दुनरि मुबा गोरकु क्लाङ्चेबोजुगुला टिमसे बोकिन्बा फुटसलव्हना थुछापा प्रजित शाक्यसे पाङ्जि । स्योमि ग्याल्साङ दबूला केन्द्रीय चोहो नृपेन्द्रलाल श्रेष्ठला चोहोदानरि ताबा गेताङरि नेपाल आदिवासी जनजाति स्योमि गेन्दुनछेन (फोनिज)ला संघीय चोहो लक्की चौधरी, हेराङ महानगरपालिका वडा ५ ला वडाचोहो विकासमान श्रेष्ठ, १६ ला वडाचोहो निर्मलरत्न शाक्य, तामाङ स्योमि गेदुङला चोहो नेत्र तामाङ, ताम्राकार समाजला गोछापा हेन्से यान्पाङमिजुगुसे बोकिन्बा मुबा ।

(छिगकि दोनः यान्पाङ– संचार, ग्रा– सूचना, ब्लोन– मन्त्री, ग्यालठिपा– राजनीतिक, ङ्यान्दि– कारण, स्योमि– पत्रकार, गेन्दुनछेन– महासंघ, ख्योल्बा– गल्ती, स्हेङ्खेन– संस्थापक, ग्याल्साङ– राष्ट्रिय, हेराङ– ललितपुर, नुर– विषय, दाल्ना– आव्हान, डुप्बा– उपलब्ध, नाछाल– अवस्था, माइच्याङ– कान्छी, स्योनाम– पत्रकारिता, ग्युइसेर– शिक्षा, ब्रेल्बा– सम्बन्ध, यान्पाङमि– संचारकर्मी, ह्राङ्बाङ्बा– स्वतन्त्रता, व्हना– तर्फ, दाछोक– समिति, स्ह्रुग– रुप, नामकि– पेशागत, गेदुङ– संघ, दोन्ता– उद्देश्य, क्लाङ्चेबो– खेलप्रेमी, थुछापा– संयोजक, गोछापा– प्रतिनिधि)