जापान । एन.पी.ओ. होउजिन नेपाल तामाङ समाज, जापानला आयोजनारि ‘मञ्जुश्री संवत २८६२ ता ल्होला सोनाम ल्होछार २०२६ ग्रेन रिमठिमकि गेताङ’ जापानला राजधानी टोकियोला छ्याम ह्युलला ग्रेन्पो ८ सहरजुगुरि भव्य स्ह्रुगरि दाङ्बाकेन मुला ।

तामाङजुगुला ग्रेन प्रिबा सोनाम ल्होछारला दुइसाङरि आयोजना लाबा चु रिमठिमकि ग्रेनकाप्तोनरि नेपालग्याम ङ्योइबा चर्चित काइपा विश्व दोङ थेन चर्चित काइमो जितु लोप्चनसे प्रस्तुती पिन्सेला मुला ।

गेताङरि जापानरि मुबा काइपा जनक थोकर, अनिल लामा, कर्म दोङ तामाङतेन स्यान्दो स्थानीय कलाकारजुगुसे ह्राङ्ह्राङ्ला प्रस्तुती थान्सेला मुला । गेताङरि कोबा, स्याबा ओसेम ल्होलो रिमठिमकि झाँकीजुगु सुताइ प्रस्तुत लासेला आयोजकसे उन्पाङ्बा मुला । गेताङग्याम तामाङ समुदायला ग्योइ, धर्म, रिमठिम थेन ङोसेबा ख्युरछ्या थेन ल्हेछ्या लाबा दोन्ता किन्बा मुला ।

आयोजक दाछोकला आन्सार गेताङ जनवरी १८ तारिखरि टोकियोग्याम तिसि खाबा जनवरी ३१ तारिखरि नागोया सहररि स्योल्सेला मुला ।  

गेताङ जनवरी १८ कुनु टोकियोरि रेला २ ङ्ह्यामाहेन्से ८ ङ्ह्यादेदोना, जनवरी १७ कुनु कितो कान्तोरि, जनवरी १९ कुनु ओकिनावारि, जनवरी २० कुनु क्युश्यु, जनवरी २४ कुनु सेन्दाईरि, जनवरी २५ कुनु शिजुओकारि, जनवरी ३० कुनु ओसाकारि थेन जनवरी ३१ कुनु नागोयारि तासेला मुला ।

नेपाल तामाङ समाज, जापानसे चु ऐतिहासिक रिमठिमकि ग्रेनकाप्तोनदा भव्य थेन सफल स्होबारि जापानरि मुबा क्योङ ल्होछारचेमो नेपाली ओसेम तामाङ समुदायदा बोकिन्बाला लागि ङ्योइसाङ लाबा मुला ।

(छिगकि दोनः ग्रेन्पो– प्रमुख, रिमठिमकि– सांस्कृतिक, स्ह्रुग– रुप, ग्रेनकाप्तोन– महोत्सव, उन्पाङ्बा– जनाएको, ङोसेबा– पहिचान, दोन्ता– उद्देश्य, ल्हेछ्या– संबर्धन, ख्युरछ्या– संरक्षण, दाछोक– समिति, स्योल्बा– सम्पन्न)