याम्बु । नेपाल तामाङ घेदुङ प्रवास शाखा मलेशियाला २० छा दिङ्दाङ्सेला उत्सव ओसेम साधारण जोम्ना भव्यताला छ्याम जिन्बा मुला ।

मेलेसियाला राजधानी क्वालालम्पुररि मुबा एभरेष्ट किचेन होटलला सभा हलरि ताबा गेताङरि घेदुङ मलेसियाला चोहो विक्रम वाईबा तामाङला चोहोदान थेन घेदुङ मलेसियाला संरक्षक पासाङ पाख्रिन तामाङला ग्रेनडोन्बोरि ताबा मुबा ।

गेताङरि प्रमुख ग्रोइपा संघीय ह्रोम्हि मिलन दोङ तामाङ, ग्रोइपा राजु योन्जन तामाङ, जोहोर थुम चोहो मंगल दोङ, ग्रोइपा विशाल नेगी, छोङ्नाम राजकुमार दोङ, छोङनाम अधिक जिम्बातेन स्यान्दोकादेसे बोकिन्बा मुबा ।

थे जोम्नासे दिङदाङ्सेला प्रगती विवरण थेन दिङ्दङसेला किन्बापिन्बा पारित लाबा मुला बिसाम जोम्नाला दुइसाङरि मलेसियारि मुबा क्लाङछ्योङ थुमरि योगदान पिन्सिकेन खाबा ग्रोइपा योन्जन तामाङ थेन गेन्दुनला मुतेबा गे क्रियाशील ह्रोम्हि पेमा स्याङतान तामाङदा डेन लाबा मुबा । गेन्दुनला खाली मुबा पदजुगुरि गिक्छा ह्रोचोहोरि ज्ञानध्वज बोम्जन तामाङ, न्होरचोहो नवराज रुम्बा, छ्यान्होरचोहोरि पेमा स्याङतान तामाङदा थान्बा मुला ।

गेताङरि संरक्षक पाख्रिनसे २००५ हेन्से दातेदोना गेन्दुनरि स्हु लाबा मोक्कोनदा थुजेछे पिन्बाला छ्याम ङ्हाउरि ताबा गेन्दुनला गतिविधि बिमा दाते गेन्दुन झान सशक्त ताबासे ताङ्बा थेन खाबा रेजुगुरि गेन्दुनदा ङ्हाच्छा बोर्बारि तोबा ह्रोलाबारि तयार मुबा नोन ग्रान पिन्जि ।

(छिगला अर्थः ग्रोइपा– सल्लाहकार, ह्रोम्हि– सदस्य, छोङनाम– व्यवसायी, किन्बापिन्बा– आयव्याय, क्लाङछ्योङ– खेलकुद, गेन्दुन– संस्था, ङ्हाउ– विगत)