सिन्धुपाल्चोक ६ तापाग्रेन । मेलम्ची नगरपालिकाला ग्रेन्पो आइतमान तामाङसे नगर थुमन्हाङरि खाजिबाइ नोन लोप्खेन न्होरकि काक्ताला ङ्यान्दि ग्युइसेरग्याम वन्चित ताआतोसेला पाङ्बा मुला । नगरपालिकासे ग्युइसेररि तोतेबा लगानी लाचिबा उल्लेख लाबान थेसे ‘ग्युइसेर मोक्कोनला याङ्ताम हिन्ना, न्होरकि आडुप्बासे खालाइदा आका’ बिबा प्रतिवद्धता व्यक्त लाजि । 

इन्द्रेश्वरी माध्यमिक लोप्खाङरि डा ११ ला छार लोप्खेनला लागि ङ्योइसाङ लाबा डेन गेताङरि ताम थान्बान ग्रेन्पो तामाङसे ग्युइसेरदा याङ्बा स्ह्रुगरि आकिन्बारि लोप्खेनजुगुदा म्होइजेन लाजि । ‘लिउला रेखा कोरतिबा दुइ चुनोन हिन्ना, मेहनत थेन अनुशासनसे जेक्खे सफलतारि दोना लाला,’ थेसे पाङ्जि । नगर ग्रेन्पोसे ग्युइसेर, क्लाङ्छ्योङ, ह्रोल्ज्याङला छ्यामला थुमरि नगरपालिकासे निरन्तर ह्रो लाबारि तत्पर मुबा नोन पाङ्जि । 

गेताङला डोन्बोछेन मेलम्ची नगर स्यानग्रेन्पो उमा प्रधानसे लोप्खेनला गहना अनुशासन हिन्ना बिबान अनुशासित तासि ङ्हाच्छा वाङ्बारि सुझाव पिन्जि । थेसे चुनोन लोप्खाङला लोप्खेन दाते तोच्चा पदरि दोबा उदाहरण पिन्बान डा ११ ला लोप्खेनदा ह्राङ्ला लिउला लागि निरन्तर मेहनत लाबारि प्रेरित लाजि । 

वडा नम्बर ११ ला ङ्हाच्छाला वडाचोहो रुद्रप्रसाद दुलालसे छार भर्ना लोप्खेनदा ज्याबाम्हान्बा पिन्बान ह्याल लिउला मोलम लाजि । 

चुह्राङ्नोन लासि लोप्खाङला ङ्हाच्छाला प्रधानाध्यापक ओसेम इन्द्रावती बहुमुखी क्याम्पस ग्रेन्पो राधाकृष्ण श्रेष्ठसे लोप्खाङरि विज्ञान थेन प्राविधिक धारव्हाना ज्याबा ग्युइसेरकि डुप्जिन्बासे खाबा रेरि कानुन नुर काप्तोबा पाङ्जि । 

छेसाङ तामाङला चोहोदानरि ताबा गेताङरि लोप्खेनजुगुसे ल्होलो प्रतिभा उन्बा मुबा । 

(छिगकि दोनः न्होरकि– आर्थिक, आडुप्बा– अभाव, ग्रेन्पो– प्रमुख, काक्ता– समस्या, ङ्यान्दि– कारण, ग्युइसेरकि– शिक्षा, डा– कक्षा, याङ्बा– हल्का, स्ह्रुग– रुप, लिउ– भविष्य, क्लाङ्छ्योङ– खेलकुद्, ह्रोल्ज्याङ– संगीत, डोन्बोछेन– विशेष अतिथि, स्यानग्रेन्पो– उपप्रमुख, तोच्चा– उच्च, व्हना– तर्फ, ग्युइसेरकि– शैक्षिक, डुप्जिन्बासे– उपलब्धि भइसकेकोले, नुर– विषय)