तामाङ काइ याखारगि साप्ताहिक रेडियो स्योस्यो हिन्ना । तामाङ ग्योइ, ग्योइकाइ, रिमठिम, ज्योस्हेङ थेन धर्मला ख्युरछ्याला छ्याम तामाङ समुदायसे व्यहोरतिचिबा काक्ताजुगुला उजागार थेन जनचेतना ल्हेना लाबा दोन्तासे २५४८ छा बुद्ध केवादिङ्साङला रे बिले २०६१ दुगु २२ गते मिरेला रे स्ह्यो ८ः२० हेन्से तामाङ काइ रेडियो सगरमाथामा एफ. एम. १०२ थोप्लो ४ मेगाहर्जरि तिबा हिन्ना । तामाङ ग्योइ थेन ग्योइकाइला फेल्गेबा ओसेम ल्हेछ्याला लागि २०५८ दिङरि स्हेङ्बा तामाङ ग्योइकाइ गेन्दुन तामाङ डाजाङ थेन रेडियो सगरमाथाला संयुक्त प्रस्तुति तामाङ काइसे तिनि ह्राङ्ला प्रसारणसे २२ दि छ्योसि २३ दिङरि वाङ्बा मुला ।

स्हेङ्बा दुइहेन्सेन तामाङ काइसे ल्होलो स्तम्भ न्हाङ्ला गेताङ सन्चालन लासिकेन खाचिबा मुला । विशेष स्तम्भजुगुरि ग्योइ, ग्योइकाइ, रिमठिम थेन संस्कार, दोङराप, थाङ्कु, जामेकोला, बिजाबुमो थेन समसमायिक नुरजुगुरि रिपोट, न्हाङ्ल्हेङ्मो थेन तामसोर स्होसि तामाङ काइग्याम प्रसारण लाचिबा मुला ।

ल्होलो नुररि रिपोर्ट प्रसारण लाबा, न्हाङ्ल्हेङ्मो थेन वहस ग्याम्से काक्ताला छिम्बा म्हाइबा प्रयास लाबा, परम्परागत थाङ्कु ज्योस्हेङला नुररि चर्चा लाबा, खाजिबाइ नोन सामाजिक गेजुगुला तामसोर प्रसारण लाबा थेन खेःबा व्हाइ ह्रोल्ज्याङदा  प्राथामिकता पिन्बा नोन तामाङ काइला मुख्य विशषता हिन्ना ।

बुद्ध योन्जन लामाला थुछापारि मुबा तामाङ काइ दाते कामरे स्ह्यो १० हेन्से ११ ङ्ह्याबा दोना प्रसारण ताचिबा मुला । २२ दिङ दोना दोगामा तामाङ काइसे ११९७ छा श्रृखंला छ्योना लाजिन्बा मुला ।

रेडियो सगरमाथाग्याम तामाङ काइला लागि निःशुल्क दुइ पिन्सेला तामाहेन्से तामाङ डाजाङ ग्योइकाइ गेन्दुनसे ह्राङ्साप्तोपा स्ह्रुगरि जनशक्ति तयार लासि तामाङ काइ प्रसारण चुबा हिन्ना । समसमायिक नुर म्हाइबा थेन अनुसन्धान मुलक बार्बुजुगु प्रसारण लासिकेन खाबा तामाङ काइ समुदायलान गिक्छा थेन उत्कृष्ट गेताङ ताबारि दोबा मुला । थेसे लामा २०६६ दिङ्ला १६ छा तामाङ प्रसारण दिङ्साङला दुइसाङरि तामाङ काइ नगद पुरस्कारला छ्याम डेन ताबा मुबा बिसाम रेडियो सगरमाथाला २५ छा दिङ्साङकिला दुइसाङरि २०८० रि नोन डेन ताबा मुबा ।

तामाङ काइ चुमा बुद्ध योन्जनला थुछापारि सन्चु ब्लोन, भक्तबीर योन्जन, अर्जुन ग्लान थेन म्हार्साङ ङ्याङ्जोला छ्याम ५ म्हेला जनाशक्ति मुबा । थेलिच्छा यकिना अगाध, अस्मिता थिङ, अर्जुन पाख्रिन, मोना ग्लान, प्रतिमा मोक्तान थेन कविराज काल्तान सुताइसे तामाङ काइरि योगदान पिन्बा मुबा । दाते बुद्ध योन्जन लामा गिक्खेसेन खालाइला भौतिक थेन न्होरकि ह्रो आरेना नोन रेडियो स्योस्यो तामाङ काइ सन्चालन लाचिबा मुबा । गुङ गुङरि ल्हानान ह्रोजुगु खाजि, निजि । न्होरकि स्रोत आरेबा ङ्यान्दि ला डु, दिङ गिरिन ख्लातोबा बाध्यता तामाङ काइरि मुला ।

तामाङ काइ तिनिला रेदोना दोगामा तामाङ डाजाङ, रेडियो सगरमाथा, तामाङ समुदाय, ख्युरछ्यापा, ग्रोइपा, गेताङ अनुगमन टोली, बुद्धिजिवी, समाजसेवी, तामाङ कलाकार, ल्होलो गेदुङ गेन्दुन, गेताङ ङ्यान्सिमाम प्रतिक्रिया थेन सुझाब पिन्स्ह्युबा क्योङ ङ्यान्खेनजुगुला ग्रेन योगदान मुला । ह्राङ्ह्राङ्ला थुमग्याम ह्रो लास्ह्युबा मोक्कोनदा हार्दिक आभार व्यक्त लाला ।

खाबा रेजुगुरि झन प्रभावकारी तोसोसे ङ्हाच्छा बोर्बारि तिगा लातोला ? ह्राङ्निला अमुल्य सुझाब, प्रतिक्रिया थेन ह्रोला अपेक्षा तामाङ काइसे लाबा मुला ।

(योन्जन दाते तामाङ काइला थुछापा थेन प्रस्तोता हिन्ना ।)

(छिगकि दोनः ज्योस्हेङ– कला, काक्त– समस्या, दोन्ता– उद्देश्य, केवादिङ्साङ– जयन्ती, फेल्गेबा– विकास, बिजाबुमो– बालबालिका, छिम्बा– समाधान, खेःबा– पुरानो, ह्रोल्ज्याङ– संगीत, थुछापा– संयोजक, ह्राङ्साप्तोपा– स्वयंसेवक, स्ह्रुग– रुप, बार्बु– सामाग्री, दिङ्साङकि–वार्षिकी, म्हे– जना, न्होरकि– आर्थिक, ङ्यान्दि– कारण, ग्रोइपा– सल्लाहकार, तोसो– ढंग)

दोःबा : यकिना अगाध