ताम फोटोला । चु फोटो म्राङ्सि– वि.सं. २०६५ रि इन्द्रेश्वर मावि पनौतीरि लोप्डा ९ रि डोबाकेन लाबा दुइला घटना डान्बारि दोजि । लोप्खाङ दुइला बिमा लेङ्बा दुइरि ङाइ थाङ्का ब्रिबा लामुबा ओसेम ङातेन छ्याम डोबा ह्रो गिटी तोमुबा । थाङ्का ब्रिबा ङाला रहर मुबा बिसाम गिटी तोबा थेला बाध्यता मुबा ।

ङाइ स्ह्यो ङ्यासे थाङ्का ब्रिबा ताम मुतेबा लोप्खेनदा थाहा मुबा ओसेम ह्रोसे गिटी तोबा ताम याखारगि लोप्खेनदा जेक्खे थाहा मुबा ।

तिरेकुनु ङाला लोप्खेनकादेसे चिसाङ कोठारि ङ्योइस्ह्युजि । ग्रा परिचर ज्योज्योग्याम थाहा याङ्मा सेमरि लोङ्बाला छ्याम ल्होलो ताम क्लाङ्बान गुरुजुगुला अनुमति याङ्माहेन्से न्हाङरि वाङ्जि । क्योङ्नोन गुरुकादे मुस्ह्युबाचिम । प्रधानाध्यापक थेन उमारुद्र बस्नेत, जानुका भट्टराई, माला अधिकारी, चन्द्र काफ्ले, ओम खतिवडातेन स्यान्दो गुरुजुगु मुस्ह्युबा चिम ।

न्हाङरि वाङ्माहेन्से थाहा ताजि थे दिङ्ला अनुशासन पुरस्कार पिन्बारि ङ्योइबाला चिम । पुरस्काररि दर्जन गिक कापी, दर्जन गिक कलम थेन दर्जन गिक सिसाकलमला छ्याम नगद न्होर चिम । ङा ताङ्सिकेन मिख्लि प्रुलप्रुल पुइसि माङ्ग्यार थोन्बोरि अनुमति ह्रिमा प्रधानाध्यापक माधवप्रसाद अधिकारी गुरुसे थेनतापुङ्सि सुङ्स्ह्युजि, ‘मुतेबा दिङ मोक्कोन लोप्खेन ग्याम ५/५ सय न्होर पोप्सि प्राङ्बो थेन जेहेन्दार लोप्बोनदा पिन्सिकेन खाबा न्होर चु दिङ अनुशासित लोप्बोन एदा पिन्बा मुला ।’

लोप्डा ९ रि १३० म्हे लोप्बोनकादे मुबा । ङाइ चु सहयो सोझोन अस्वीकार लासि थे न्होर गिटी तोबा ह्रोदा पिन्बारि म्होइजेन लाजि । थेदुइरि याखारगि लोप्खेनसे ङादा ह्रो लास्ह्युजि थे लोप्खेनसे गिटी तोचिबा ह्रोदा क्योङरे म्राङ्स्ह्युबा चिम ।

चु ताम न्हाङ्गारदाङ्से लोप्डाला गोरङ्हिन सेक्सनरि ल्हेजि । ङातेन बेन्च गिरिन चिबा थे ह्रो बाङ्से बोमो खाजि । थे मुतेबा स्ह्यो ङ्यासे गिटी तोबा लामुबा । ङाला मनसाय, थेला वास्तविकता उन्बा आताना थेदा ह्रोलाबारि मुबा । तासाइ नोन गोबा थेन लाबारि तालमेल आडिक्बासे चु घट्नासे ङनि ङ्हिला सम्बन्ध थारेङ ताजि । ओम, लिच्छा थेदा गोना लासि ङान्ना सम्बन्ध दोसि ङ्हाच्छाला ह्राङ्बान ज्याबा ताजि ।

चु घट्ना लिच्छा हेन्से मुतेबा गे थेन ताम लामा गोङ्मा गोङ्मारि सचेत ताबारि चुजि । थे ह्रो दाते नोन आत्मीय ह्रोला ताङरि मुला । थे दाते सहकारीला प्रबन्ध निर्देशक मुला । थेतेन ह्रुप तामा थेनोन घट्नादा डान्सि ङ्हिनोन सिबादोना ङेला ।

स्यानह्युल गेनाम दिवसला चु डान्बा !

(छिगला अर्थः लोप्डा– कक्षा, लोप्खेन– शिक्षक, चिसाङ– बैठक, ग्रा– सूचना, लोप्बोन– विद्यार्थी, म्हे– जना, स्यानह्युल– अन्तर्राष्ट्रिय, गेनाम– श्रमिक)

दोःबा : यकिना अगाध