तामाङ काइ गोर्गिक निसरेला तिरेम खाबा रेडियो स्योस्यो हिन्ना । तामाङ ग्योइ, ग्योइकाइ, रमिठिम, ग्युइल थेन धर्मदा छार्ना ल्हेना छ्यामरि तामाङ हयुल्बाला गुङरि मुबा काक्ताकादेदा उजागार थेन जनचेतना ल्हेना लाबा उद्देश्यसे २५४८ छा बुद्ध केवासाङ रे अर्थात २०६१ दुगु २२ गते मिरे कुनु स्ह्योरि ८ः२० हेन्से तामाङ काइ रेडियो सगरमाथा एफ.एम. १०२ थोप्लो ४ मेगाहर्जरि तिबा हिन्ना ।

तामाङ ग्योइ थेन ग्योइकाइला विकास थेन ल्हेछ्याला लागि २०५८ दिङरि ठोङ्बा तामाङ ग्योइकाइ गेन्दुन तामाङ डाजाङ थेन रेडियो सगरमाथा डिक्सि स्हेङ्बा तामाङ काइसे दुगुला २२ कुनु ह्राङ्ला प्रसारन बोगालसे गीक (२१) दिङ छ्योबा मुला । 

गेताङ तिमा हेन्सेन तामाङ काइसे ल्होलो स्तम्भ न्हाङरि गेताङ स्याङ्बान खाबा मुला । विशेष स्तम्भकादेरि ग्योइ, ग्योइकाइ, रिमठिम, दोङराप, थाङ्कु, जामेकोला, बिजाबुमो थेन समसमायिक नुरकादेरि रिर्पोट, ल्हेङ्मो थेन तामसोर तयार लासि तामाङ काइग्याम प्रसारन लासि चिबा मुला ।

ल्होलो ल्होलो नुररि रिपोर्ट प्रसारन लाबा, ल्हेङ्मो थेन वहसग्याम काक्ताला छिम्बा म्हाइबा प्रयास लाबा, परम्परागत थाङ्कु ग्युइलला नुररि चर्चा लाबा, खाच्युबाइ सामाजिक गेकादेला तामसोर प्रसारन लाबा थेन ङ्हाच्छाला व्हाइ ह्रोल्ज्याङदा प्राथामिकता पिन्बा तामाङ काइला ग्रेन विशेषता हिन्ना ।  

बुद्ध योन्जन लामाला संयोजकत्वरि मुबा तामाङ काइ दान्दे कामरे स्ह्योरि १० हेन्से ११ ङ्ह्यादेदोना रेडियो सगरमाथा एफ.एम. १०२ थोप्लो ४ मेगाहर्जरि प्रसारन तासि खामुला । चु दिङरि ५० रेम गेताङ प्रसारन ताबा मुला । तिनि दोना दोखामा ११४६ छा श्रृंङ्खला छ्योना लासि जिन्बा मुला ।

रेडियो सगरमाथाग्याम तामाङ काइला लागिरि निःशुल्क दुइ पिन्बा लिच्छा तामाङ डाजाङ स्वयम् सेवकला लिरि ह्युलबाङ तयार लाबान तामाङ काइ प्रसारन तिबा हिन्ना । समसमायिक थेन अनुसन्धान मुलक बार्बुस्हेकादे प्रसारन लाबान खाबा तामाङ काइ ह्युल्बालान ङाच्छा थेन उत्कृष्ट गेताङ ताबारि सफल ताबा मुला । थेसे लामा २०६६ सालरि १६ छा तामाङ प्रसारन दिवसला दुइसाङरि तामाङ काइ नगद पुरस्कारग्याम डेन ताबा मुबा बिसाम रेडियो सगरमाथासे बोगालसे ङ्हा दिङ छ्योबाला दुइसाङरि २०८० रि डेन नोन लाबा मुबा ।  

तामाङ काइ तिबा दुइरि बुद्ध योन्जनला संयोजकत्वरि, सन्चु ब्लोन, भक्तबीर योन्जन, अर्जुन ग्लान थेन म्हार्साङ ङ्याङ्जो लासि म्हेन्दो ङ्हाला ह्युलबाङ मुबा बिसाम तिबादुइरि गेताङला योजना थेन बार्बुस्हे स्होबा गे यकिना अगाध थेन इन्द्रकुमार तामाङसे लामुबा । लिच्छा अस्मिता थिङ, अर्जुन पाख्रिन, मोना ग्लान, प्रतिमा मोक्तान थेन कविराज काल्तान सुताइसे तामाङ काइरि योगदान पिन्स्ह्युबा मुला । दन्दे बुद्ध योन्जन लामा याख्यारगिकसे खालाइला भौतिक थेन आर्थिक ह्रो आरेसाइ नोन रेडियो स्योस्यो तामाङ काइ सन्चालन लासि चिबा मुला । गुङ गुङरि ल्हानान ह्रोकादे खाजि निजि । आर्थिक स्रोत आरेबाला कारन ला डु, दिङ गिरिन ख्लातोबा बाध्यता तामाङ काइरि मुला । चुराङ्बा तोसोला काक्तादा दमोला रेकादेरि खाराङ्लासि छिम्बारि खाम्ला ? बिबा होना रेडियो सगरमाथा थेन तामाङ डाजाङ गम्भिर तादोबा जरुरि मुला ।

लिच्छारि, तामाङ काइ तिनिला रे दोना दोखाबारि तामाङ डाजाङ, रेडियो सगरमाथा, तामाङ समुदाय, संरक्षक, ग्रोइपा, गेताङ अनुगमन टोली, बुद्धिजिवि, समाजसेवि, तामाङ कलाकार, गेताङ सान्सि प्रतिक्रिया थेन सुझाब दोन्स्युबा म्होकोन ङ्यान्खेनकादेला ग्रेन योगदान मुला । ह्राङ–ह्राङ्ला ग्लाग्याम ह्रो लास्युबा म्होकोदन थुजेछे मुला ।  

ह्राङ्निसे तामाङ काइ रेडियो सगरमाथा एफ. एम. १०२.४ मेगहर्जरि कामरे स्ह्योरि १० ङ्ह्यामा सान्बारि खाम्स्युला व्हा रेडियो सगरमाथाला ँबअभदययप उभनभ थेन  ज्बmचय उबततचय ग्याम जाम्बुलिङला खान्दामान ग्लारि स्हयुसि तामाङ काइ ङोन्छाङ सान्बारि खाम्सेला मुला ।

खाबा रेकादेरि नोन अझ प्रभावकारि तोसोसे ङ्हाच्छा बोर्बारि तिगा लातोला ? ह्राङ्निला अमुल्य सुझाब, प्रतिक्रिया थेन ह्रोला अपेक्षा तामाङ काइसे लाबा मुला ।  

बुद्ध योन्जन लामा 
संयोजक 
‘तामाङ काइ’ रेडियो सगरमाथा 
बागडोल, ललितपुर

छिगला अर्थः काक्ता– समस्या, दुगु– वैशाख, ल्हेछ्या– संवर्धन, नुर– विषय, छिम्बा– समाधान, ग्युइल– कला, ह्रोल्ज्याङ– संगीत, कामरे– शनिबार, बार्बुस्हे– सामाग्री, ह्युलबाङ– जनशक्ति,