ङारह्युल गुङ्ला थे नगडे गाङला ङामदेरिन गोरगिक दिम मुबाचिम । थे दिमरि आबा, आमा, जा थेन चाङ लासि म्हेन्दो ब्लि चिबाचिम । जाला छान पाल्साङ चिम, चाङ्ला– डोल्मो । डोल्मो दात्ते मुबाजा चाङ । ङ्हाच्छाला चाङसे ख्लासि लिच्छा बाबाचिम । लिच्छा बाबाचा चाङ कोलामा तासेला चिम । तिरे थे दिमरि खलङमलङ तामु ।

‘ङादाम जानोन तोला ! जामे केजि बिसाम मान्खाङरिन ख्लापिन्ना ।’ जागार ताङ्सा, जागार चेगाइ, जागार म्लाङ्सेम थेन जागार बोमोला छ्यामि स्हेङ्बान पाल्साङसे पाङ्जि ।

कोलामा स्हुसे चुङ्सि मान्खाङरि निबारि वाङ्बा डोल्मोथोरि ह्रेम्बोला ठाँइकोङ्बा ल्हेङमोसे स्यान्दो स्हु काप्जि ।

डोल्मो कोलामा ताबा थासाङ याङ्बा ह्रेरिन स्युमिसे पाङ्बा मुबा, ‘ह्याङ्ला घ्युबा सोनालाबारि छाया (नाती) केदोला । ङ्हाच्छाला चाङ्से जामे न्हाबासे दिम्नोन ख्लासि ब्रातोजि ।’

क्याच्चा पिन्डसे ल्यारा डुइबान केनखेप्पासे मेरि म्हार काप्जि, ‘ह्याङ्ला घ्युबा सोनालाबा बिबान छायासे हिन्ना ।’

केन्स्युमिला तामसे रोङरोङ ताबा डोल्मोला सेमरि पाल्साङसे जानोन तोला पाङ्माहेन्दे झन बाङ्से मे लुङ्जि । बोक्टो म्हनसङ्ला केनस्युमिसे तिल्दाम्मान पाङ्साइ ब्रिबाडोबा पाल्साङसे धाह्रो पिन्ना बिबा जाजाबा म्हनए बोक्टो दिमह्रङ ब्लाङ गुर्जि । कोलामा स्हुसे बिमा जामे केमा थेसे बासेला छारपोरसे सेम ह्वारह्वार क्रोजि । आमा दोबा किपोसे ताङ्बा ताङमो दोबाधुइरि सेम मिख्लिला ग्योइरि ब्लुम्जि । डोल्मोसे मि च्युम्जि ।

ङोन्छुपरि खामा ङामरिन दात्तेजेख्नेन केबा जामे मुबा । लुइलुइबा जामेला आक्योन÷दाग्पा ह्याल्ह्याल्बा स्ह्याल म्राङ्सि चेगाइसे फ्रुलुलु मिख्लि ताइजि । ल्हानान दुइ ग्राम्बारि तेम्जि । दिमथेमेला ताम डान्दासि जामेला ङेमङेम्बा ओसेम चेगाइङ्हाम्बा ग्राम्बासेनोन दोल्दोल क्रोबाह्राङ म्हान्मु ।

जामेदा थोम तादासि च्याबान खेन्जि, ‘दारेम चु ल्हुइरि खात्पा हुन खासेला मुग्यामु ! हुनसे खाराङले ठेरलाग्यामु ! थासाङ आरे ।’ दिमथेमे÷केनस्युमिला डोचन÷ल्हेङ्मोला च्याम्याङ ज्योल्बा बाङ खाइ खालाङसे खाग्यामु ।

मान्खाङग्याम फेमाहेन्दे डोल्मो ङ्हाच्छा खाबारि वाङ्बा ङ्हज्याङ स्हुला गान्दिरि ब्लुम्जि । दिमला म्राप्साङरि दोमा खोःबा क्युङक्युङ ताजि । स्ह्याल जातुकुसे काडि छेप्सि हाङ्सुसे छ्वासि पकलपुकुल ताबा डेक्चिह्राङ ङ्हाम्जि । गोल्छेले ङ्हाच्छा ब्राजि ।

‘तिल्दा लोङ्बा डोल्मो ! जा जामे गिकनोन हिन्ना, तोरमार आरे । लेबाफेबा खालाइसे लालाआखा । ङ्हीसेन  ह्याङ्ला घ्युबा सोना लाला ।’ केनस्युमिसे काइ गिकरिन पाङ्जि, ‘डेन मुला ह्याङ्ला छुया जामेदा । तिनि डोल्मोसे न्होरडोल्मो बाजि, दिम ह्यालह्याल ताजि ।’

डोल्मोसे कोलामाला स्हु म्लेजि । दिमनाम ज्याबान मुला । दान्दे न्होरडोल्मोसे लोप्डा च्युइ जिन्जि । नगडे गाङ जेनालाबा जेसुमसे सोना लाजि आख्खेला घ्युबा, म्हेमेला घ्युबा, माम थेन आमाला ङ्हे, आस्याङ–स्ह्याङला ना ।