इङ्ल्याण्ड थेन फ्रान्स गुङरि चलतिबा याखारगि रेल इङ्ल्याण्डव्हना निलाबा मुबा । ल्हाम्पाजुगु छ्योआछ्यो प्लिङजिन्बा मुबा, दारे गिक्खे सिट थानथान मुबा । ट्रेन चलतिबा ङ्हाच्छा याखारगि अंग्रेज म्हि खासि थे सिटरिन चिजि । थेला ङामरिन ङ्हाच्छाहेन्सेन याखारगि फ्रान्सेली खातुन चिबा मुबा । खातुनला लिरि चिन्ता म्राङ्चिबा मुबा । थेला लिरि आउदिन तनाव म्राङ्माहेन्से अंग्रेजसे नाबारि आखाम्ना ङ्योइजि, ‘ह्राङ तिल्दा चोदे ल्हाना निराश तास्ह्युबा ?’

फ्रान्सेसी खातुनसे छेर्सिकेन पाङ्जि, ‘ङातेन इङ्ल्याण्डला कानून आन्सार थान्बारि आम्याङ्बा न्होर मुला । मुतेबा लासि छ्योआछ्यो तोङ्जा च्युइ पाउण्ड ताला । फ्रान्सरि चोत्ते न्होर थान्मा अपराध आहिन, तासाइ इङ्ल्याण्डरि चु अपराध हिन्ना । ङादा थाहा आरे थेरि ङातेन खाराङ्बा ह्रेवा लाग्याम !’ थेतासि दाते ङा जाकि चिन्तारि मुला ।

अंग्रेजसे पाङ्जि, ‘चु खाजिबाइ ग्रेन ताम आहिन । चोदे ह्राङ्से स्वीकार लास्ह्युजि बिसाम गाङ्साल न्होर ङादा पिनस्ह्युगो, लेङ्बा ५,००० पाउण्ड ह्राङ्तेन छ्यामनोन मुगाइ । चोदे प्रहरीसे चुङ्जि बिसाइ नोन गाङ्साल न्होरमि सोला । ह्राङ्से ह्राङ्ला लन्डन थेन फ्रान्सला ठेगाना ङादा ब्रिपिनस्ह्युगो, ङाइ परिस्थिती सामान्य तामाहेन्से ह्राङ्दा न्होर फ्लिक दोपिन्ना ।’

खातुनसे ह्राङ्ला ठेगाना ब्रिसि पिन्बा मुला । रेलग्याम फाप्मा फ्रान्सेली खातुन प्रहरीला खाजिबाइ चेकजाँच आतानान ओम काबाच्याबा आतानान निबारि सफल ताबा मुबा । तासाइ थेनोन दुइरि अंग्रेज बाङ लासि लासि क्रिङ्जि ओम प्रहरीदा खातुनव्हाना छोत लाबान पाङ्जि, ‘सर, थे म्रिङ्कोलादा चुङ्स्ह्युगो, थेसे तोङ्जा च्युइ पाउण्ड गैरकानूनी स्ह्रुगरि बोर्सि निबाकेन मुला । थेला गाङ्साल न्होर ङाजा मुला ओम गाङ्साल तोङ्जा ङ्हा पाउण्ड थेतेन मुला । ङा इङ्ल्याण्डला याखारगि ह्युलभक्त नागरिक हिन्ना ओम ङा ह्राङ्ला चेबो ह्युलफिरि विश्वासघात लाबारि कल्पना सुताइ लाबारि आखाम । ङाइ सेसिगोसि थेला ह्रो लाजि तिल्दाबिसाम ङाला ह्युलभक्ति प्रमाणित तागाइ ।’

प्रहरीसे खातुनदा तिक्खुरि चेक लाजि ओम थे न्होर बरामद लाजि । खातुनसे ह्राङ्ला अपराध स्वीकार लाजि । अंग्रेजसे नोन ह्राङ्तेन मुबा गाङ्साल न्होर प्रहरीदा पिन्जि । कर्मचारीजुगुसे मनी लन्डरिङसे ह्युलला न्होरतन्त्रदा ताना लाबा क्षतिफिरि ताम लाबान अंग्रेजदा थुजेछे पिन्जि ओम थेला ह्युलभक्तीला प्रशंसा लाबान डेनला छ्याम बिदा लाजि । फ्रान्सेली खातुनदा स्यान्दो रेलग्याम फ्रान्स पुइजि ।

तिगाइ रेलिच्छा फ्रान्सेली खातुनला म्रापरि ढकढक काइ खाजि । थेसे म्राप ठ्वाङ्सि च्याजि ओम थेरि थेनोन अंग्रेज राप्चिबा मुबा । आश्चर्य थेन जाजाकार बोमो छ्योल्बा भावरि खातुनसे पाङ्जि, ‘ए कादे कपटी थेन धोकेबाज म्हि चिम । विश्वासघाती तोसोसे ङाला न्होर प्रहरीदा बरामद लापुङ्सि ङादा खाराङ्लासि धोका पिन्जि ? चोत्ते तामानोन दातेइ चुरि खासि चुह्राङ्लासि राप्ला ? पेबा आखा ?’

अंग्रेजसे खातुनला खाजिबाइ तामरि प्रतिक्रिया आपिन्नि ओम थेदा याखारगि खाम पिन्जि । खाम नहाङरि १५ तोङ्जा पाउण्ड मुबा । थेसे स्हिवा काइरि पाङ्जि, ‘चु ह्राङ्ला न्होर हिन्ना ओम लेङ्बा न्होरजुगु ङाला ग्याम ह्राङ्ला लागि पिन्बा इनाम हिन्ना ।’

फ्रान्सेली खातुन अचम्मित ताजि ओम ङ्योइजि, ‘चु खाराङ्लासि ताजि ? तिगा ताचिबा मुला ?’

अंग्रेजसे पाङ्जि, ‘मैडम, ह्राङ्ला बोमो जायज मुला तासाइ थेदुइरि ङाइ प्रहरीला ध्यान ङाला ब्यागग्याम ब्याङ्बाला लागि सेमतो लाबा मुबा, थेरि ङ्हाच्छान मिलियन सोम पाउण्ड मुबा । थेतासि ङाइ चु चेमो लातोजि ओम ह्राङ्ला तोङ्जा च्युइ पाउण्ड निजि । तासाइ ङाला लागि चु न्होर कात्तेन महँगो आरेमुबा ।’

(छिगकि दोनः न्हुपह्युल– पश्चिमा राष्ट्र, साराप– लोककथा, व्हना– तर्फ, ल्हाम्पा– यात्रु, नाबा– सहनु, ह्रेवा– व्यवहार, छोत– संकेत, स्ह्रुग– रुप, चेबो– प्रिय, तोसो– तरिका, स्हिवा– शान्त, सेमतो– चाहना, चेमो– नाटक)  

रापला सन्देश : खाइमागि म्हिसे खाजिबा ताम ह्युलभक्ति, इमानदारी व्हा देन्बाला मिनरि लाला, थेला लिच्छा ह्राङ्लान स्वार्थ लाबा ताला ।

मुल स्रोतः “When the train from France to Britain was full…” छार स्रोतः बाबुराम फ्युबाला फेसबुकवाल ।

दोःबा : यकिना अगाध