स्ह्योरि ङिस ङ्ह्यामान याम्बुरि दोतोबा मुबा । हाङ्बारि ब्रे ङ्ह्यातेदोना तिसारि कुम्बिरिङ ताजिबाकादेदा जाजाकि इष्या दोङ्बा टिप्पणी लाजि । विनय घुम्लुङ्ग सिरकसे सुङ गाप्सि म्हेर्बा मुबा । थेसे ङाला टिप्पणी थेजि आथेनि थाहा आतानि तासाइ डेङरिक्यार म्हेर्बा विकाससे बिसाम गोल्छेसे थोबो ख्रेन्जि । म्हुना थे गाइमा म्हेर्जि ताला । थेला मि थेला गाङ्साल निद्रा बयान लाचिबा मुबा ।

‘पुडि नुप्गाइ एला दार्शनिकता !’ चोदे बिसि जिन्मा आजिन्मान विकास दोसि सिरक न्हाङरि रिलख्वाइजि । ङाइ क्यार्सेजासे मि स्याङ्जि । म्रापला ङामरिन मुबा किचेन र्याग म्हुना ठ्वाङ्सिन ख्लाथान्जिम । ठ्वाङ्बा भेन्टिलेसनग्याम म्हुना आङ्योइबा डोन्बो खाबा मुसिम खाम्देदोना । थेलान परिणाम लि दाल थेन म्ल्हा सारि ठाम्बा मुबा । जाकि क्याथाङ क्युइला म्लाङ ड्रम ङामरिन प्लिथान्बा ग्यागारबन्दा मुबा । ङाला मिग्याम ताङ्से खाटला छ्याम मार गुन्द्रिरि म्हुना गाङ्साल दोना ङाला धोत्रो काइदा ह्रोपिन्बा हार्मोनियम ओम थेफिरि ङाइ म्हाइसि डुप्ना लाबा व्हाइकादे चाङ्मा छिगरि ब्रिबा पाबा डायरी फिरि परतिजि । पाबा डायरीरि मि परतिबातेन ङाइ ङाला गुरुदा डान्जि । तिरे म्हुना ह्राङ्ला च्युम्बिर मिसे नाङ्सालला ह्यालरि थेला मुतेबा व्हाइकादे डोबा मुबा ओम ह्राङ्ला खाप्टे ग्राम्बा स्योम्सिकेन बिबा मुबा, ‘स्याबास ! गतिलो व्हाइकादे पोप्जिम । जाम्बुलिङ नाङ्ला छोबा मामासे डाआखाम्बा क्योइबा मुला चु पाबा डायरीरि ।’

ङान्छे थेदुइरि थेला ताम जाकार जेक्खे गोमुबा । खिम्जेला क्राबासे च्योरप्लिङ्बा ङान्ना न्हाब्याङ्दा जाकि थाङ्ना लाबारि ङाइ ह्राङ्ला नाम्सा ब्लेला स्हु, सुखला सुस्केरा दुइबा व्हाइकादे पोप्बा मुबा । थेफिरि ङान्ना का थेन टुला हिसाब थान्बा कलाकारसे कोबा व्हाइकादे नोन म्हाइसिह्रुप्सि डुप्ना लाबा मुबा । तिगाइ व्हाइकादे अभावला आरनरि खारतिसि केबा मुबा ङाग्यामनोन । चुह्राङ्बा व्हाइकादेदा थेदा आउदिन सेम निमुबा । सेम जेक्खे आनिनि, ङाला डायरीदा छोबा मामा बिमा ल्हिबा बिसि टिप्पणी नोन लापिन्जि । ङातेन छ्याम विकास, विनय थेन राजन थेदुइरि ङान्छे तिबा ‘ह्राङ्लान छानो न्हान्गे, ह्राङ्लान व्हाइ कोगे’ गेरेम सफल ताजि बिबा छोर्सि गिसेम गिदा च्यासि ङेबा मुबा ।

‘गुरुला क्योइबा नोनमि जाम्बुलिङरि बोबा म्हिबिमा च्याङ्ना आरे ले ।’ राजनसे गुरुला पाबा ल्हुइ थेन ल्हिबा दर्शनदा दोखाङ लासि बिजि ।

ङा पाबा डायरी च्यासि ज्युम ङेजि । दुइ पोबालिच्छा नोन ङाला डायरी पाबान चिबा थेन पाबा डायरीला प्रशंसककादे फ्यासिकेन निबारि खाजिबाइ सम्बन्ध मुसिम व्हा आरेमुसिम ? ङा डान्बारि चुजि ।

‘राप्सिन म्हेर्जि कि तिगा ? आगाइनि एदा ?’ विकास रेसि ट्वाइलेटरि निजि । ङाइ म्लाङ ड्रमग्याम जग नाङ क्युइ तेजि ओम लि ख्रुजि । क्युइ ङाला लिदा थासिकेन पिङ बाटारि ताइजि । योना योना तौलियासे लि फ्याजि । डेङला फुर्बारि च्योथान्बा सर्ट थेन पिङ स्वेटर क्वान्जि ओम म्राप ठ्वाङ्जि । तिक्खुरि माङ्ग्यारला सिम्बा कोठारि वाङ्जि । पाबा स्वेटरसे माङ्ग्यारला सिम्बा ताखाम्ला ह्राङ आछोर्नि । म्राप डुङ्सि खाटरि खासि चिजि ।

छ्यामामा ह्राङ्बान विकास दोसि खाजि ओम बोटोक्बारि चुजि, ‘एला घरबेटीसे बाथरुम नोन भाडारि ल्हागाब लाजि कि तिगा ? खाइमाइ खालि आस्याप ।’ ङा म्लिक्का ङेसि या ङ्ही मोल्सि लेप्ना लाबारि चुजि ।

‘घरबेटीसे ङ्हाच्छा ह्राङ कचकच लाला कि आला ओम ?’ थेसे सिरक न्हाङरि वाङ्सिकेन ङ्योइजि । ‘तिल्दा आलासे, थेला ताम ङ्यान्जि म्लेजि । खान्दामान डेरा ल्हेसाइ नोन डेरावालाला हालत थेह्राङ्बान हिन्ना ।’ ङाइ खाटग्याम रेसिकेन पाङ्जि ।

‘माङग्यार तारल्हेम बामा ताइबा मुला । रुङ्बा ज्याकेट आरे ?’ विकाससे ङादा मोजा क्वान्बाकेन लामा ङ्योइजि ।

‘आरे ! हे, तापाग्रेन निलाइजिन्जि तिदा ग्लुसे बिसि आग्लुनि... ।’ ङाइ स्होन्बो क्वान्सिकेन पाङ्जि । खाम्देदोना सहज लासि पिन्बा निसालसे सुङग्याम माङग्यार खामाहेन्से बिसाम ङादा असहज स्होजि । लुसे काखाम्बा अवस्था ङाला आरेमुबा, थेफिरि विकासदा !

थेसे ङादा चेगाइ लिसे च्याजि ओम बिजि, ‘ङाला क्वान्सि निउ ।’

‘ङाइ एला क्वान्माहेन्से एसेजा तिला क्वान्ना ओम ?’ ङाइ थेला फुर्बारि च्योथान्बा ज्याकेट च्यासिकेन पाङ्जि ।

‘दारे एलान कोठारि कान चासि स्कुलरि पढाइतिबारि चुग्याम्सेन निला । रेरिम हाफ स्वीटरसे ताला ले ।’ थेसे ङादा कर लाजि ज्याकेट क्वान्बारि । ङाइ कुटिसि ज्याकेट क्वान्जि । ज्याकेट क्वान्बातेन ङादा डोइखाजि । मसिनो ङ्याम्बा काफेला न्हाङ मुबा विकासला ज्याकेट क्वान्सि ङा माङग्यार थोन्जि ।

माङग्यार सडकला ङ्हीलोला छेरिक्यार तारल्हेम बामा ताइबा मुबा । खारेला गलबन्दी ब्लासि न्हाब्याङ दोना गाप्ना लासि खिजि । या ङ्ही नोन खाल्तिरि युसि योना योना माछापोखरी तासिकेन तीन दोबाटोरिक्यार ङ्हाच्छा वाङ्जि । किसान फर्निचर ङोन्छाङ मे फुइसि गोर ङ्ही सोम म्हे फर्निचरला गेलाबाकादे ताम लाचिबा मुबा । अर्धानो सर्ट थेन पाइन्ट क्वान्बा थेनिकादे मेरिन वाङ्ला ह्राङ लासि मे दुचिबा मुबा । थेन्ना ङामथामारि याखारगि नाकि काकलकुकुल ताचिबा मुबा ।

‘सेला होइ सेला चुह्राङ्बा हाङ्बासे !’ मे दुबा तामाङ ब्योनसे याखारगि चिर्पट युमा ङा थेला ङामरिन दोजि ।

‘स्ह्यो स्ह्योरि खानाङ ब्राइ लाबा सर ?’ हरिकृष्णसे ङाला ङ्योइजि । ङाइ ब्राबाला गति थेनलाजि ओम थेला ङ्योइबाला निसाल पिन्सि ङ्हाच्छा वाङ्जि ।

‘गिलास नाङ सोतआपुइना गेलाबारि खाम्लाह्राङ्बा आरे सिम्बासे ।’ रामकाजीला काइ ङाइ क्यार बिजुलीला छोङखान ङामरि दोमा थेजि । ङा नाला दोबाटोरि दोसि बस ब्रान्बारि चुजि ।

सिम्बा ताङ्से काङहेन्से तोरतोर ल्हेसिकेन निजि । या ङ्ही नोन खल्तीरि युसि लेप्ना लाबा बाङ लाबाकेन मुबा । चारदोबाटो ग्याम छ्योङ्सिकेन खाबा बस खासि ङ्हाच्छा थेनताजि । योना योना बसरि क्रेजि । क्यार्सेजासे मि स्याङ्सि खाली ग्ला म्हाइजि । याखारगि अधबैंसे चिबा सिट खाली मुबासे थेरिक्यार निजि ।

स्ह्योरि क्याम्पसरि निबा लोप्बोनकादेसे लामा बस न्हाङला मुतेबा सिटकाले प्लिङ्बा मुबा । म्हिला ल्हुइला लेप्बासे मुसिम बस न्हाङरि डोइखाबा मुबा । ङाइ ङाला कुुरि थान्बा झोलाग्याम निम्तोस्योकादे तेजि । ङ्हाच्छारि ङाइ ह्रुप ताबारि दुइ किन्बा ग्योइकाइब्रिखेनला निम्तोस्यो फिरि थान्जि ओम थेलिच्छा ताङसे ङा दोतोबा ग्ला आन्सार निम्तोस्यो डिक्ना लाजि । ‘दार्तेला ग्योइकाइरि क्योङ म्हि’ क्राछिगला अन्तरक्रियाला रुपरेखा ब्रिमाहेन्से नोबा ङाला सेम निम्तोस्यो यासे स्योम्बाकेन लामा झान नोन ताङ्जि ।

‘ओइ आले ! काङ मार थान्गोम ।’ ङातेन सिटला झ्यालरिक्यार चिबा अधबैंसेसे ग्याप्सेला म्हिदा बाङ्जि । लिच्छाला सिटरि चिबासे काङ ङ्हाच्छाला सिटरि स्योङ्मा गुङ्ला खाली ग्ला ग्याम्से थेला गाङला जुम्बिसे ङातेन छ्याम चिबा अधबैंसेदा टाचिम । बसला ल्हामरि ब्रामा चुह्राङ्बा सामान्य तामकादे ताचिला । थेतासि ग्याप्से खाला मुबाचिम बिसि च्याबारि ङाइ जरुरी आम्हान्नि । ङा निम्तोस्यो डिक्ना लाबारि चुजि ।

जनगालरि बस थेनताजि । याखारगि जाजाबा केटी मामखुयुला छ्याम बसरि क्रेजि । सार्बा क्रा मुबा खाजिबाइ जामेकोला म्राङ्जि कि ङादा ह्राङ्ला आमाह्राङ नोन छोर्ला । थेनि ङाला ङामरि दोगामा आदोगामान ङाइ थे आमादा सिट ख्लापिन्जि । जाजा केटी सायद आमाला छुया तातोला, ङादा च्यासि ज्युम ङेजि । थेन्ना मुस्कानला ‘थुजेछे’दा ङाइ नोन मुस्कानरिन ‘ज्याबा मुला’ बिसि निसाल पिन्जि ।

‘साले खाते ! काङ मार थान्गो बिबा आहिन... साले !’ ग्याप्से दोसि झ्यालला सिटरि चिबा अधबैंसे क्रिङ्मा आमा लोङ्जि । जाजा केटी नोन तिगाइ लोङ्सि छ्यामला म्हिदा च्याबारि चुजि । थे अधबैंसे बिसाम गाङसाल रेसि ग्याप्सेला सिटला म्हि मि क्युर्बाकेन मुबा । ङाइ ग्याप्सेला सिटरिक्यार च्याजि । याखारगि ३०÷३२ दिङला म्हि लिरि लापारबाहीला भावरि थोबो कुर्सि निस्फिक्री चिचिबा मुबा । ङ्हाच्छाला सिटला अधबैंसे तिगाइ दुइलिच्छा ह्राङ्लान सिटरि चिजि ।

‘आपा ! आथान्कोले थेरि काङ ! पाङ्बा नोन आङ्यान...।’ ग्याप्सेला सिटरि गाली चाबा ३०÷३२ला म्हिदा याखारगि १०÷११ दिङला ज्युइबा केटोसे गोना लाबारि म्हाइबाकेन मुबा । थे जाजा केटोला फ्यास्हिङ थेसि ङाला मिकादे थेनिजारिक्यार दोसि हाकगाजि । थेनि आपा कोला चिम बिसि गोबारि ङादा गाह्रो आतानि ।  आपाचाला काङ दाते नोन ङ्हाच्छाला सिटला मेला कापरिन मुबा । जाजाकि जुबासे सायद चु दुइरि थेला काङ्ला जुम्बिसे ङ्हाच्छाला सिटला म्हिला ग्याप्से थुर्बा आरेमुबा । कोला बिसाम रेमरेम थेदा काङ मार थान्बारि पाङ्चिमुबा ।

थे म्हिला प्राकप्राक थिबा खस्रो काङकादे भुक्के चप्पलरि स्युबा मुबा । ओम, दातेनोन थे ङ्हाच्छाला सिटलान ग्याप्से गाना लाथान्चिमुबा । थेला खिदि मुबा क्वानकादे थेन थिबा खस्रो याकादे च्यामा खाजिबाइ कारखानारि गे लाबा गेनाम ह्राङ्बा म्राङ्मुबा । झन थेला उर सर्टला ग्ला ग्लारि मुबा छ्युकुला दागसे थेला गेला बयान लाचिबा मुबा । तासाइ थेला थेदुइला व्यवहार असामान्य मुबा । केबादा थेला भावहीन च्यार्बा मिसे च्याबा मुबा बिसाम कोलाला फ्यास्हिङ्दा नोन थेसे थेबाह्राङ आछोर्नि । ‘सायद चु नाबा व्हा मुसिम कि ?’ ङाइ म्हानिज ।

बस पलाँसेला ग्युरुरि बाङ्से छ्योङ्बारि चुजि । ङाइ कोङ्ना लासि बसला डन्डीकादे चुङ्सि च्योजि । जोरपाटी दोगेन लामा ङाइ सिट ख्लापिन्बा आमाखुयु थेन जाजा केटी रेजि । ङा दोसि ह्राङ्से ख्लापिन्बा सिटरि निसि चिजि ।

‘साले, खाराङ्बा खाते चिम...।’ ङातेन छ्याम चिबा अधबैंसे बोडोक्बारि चुजि । ङाइ थेला लिरि प्लिक च्याजि । थे बोमोसे वापफ्युर म्राङ्मुबा ।

‘आपा तेगोले काङ, ङ्हाच्छाला ज्योज्योदा टाजि रोले !’ ग्याप्सेला सिटला जाजा केटाला फ्यास्हिङ्से बसला मुतेबा ध्यान थेरिक्यार छेङ्जि । ङाइ जाजाकि प्रेतछान्सि ग्याप्से च्याजि । कोलाला फ्यास्हिङ्दा वास्ता आलाना आपाचा झ्यालग्याम माङग्यार च्याचिबा मुबा । थे आपाचा चिबा तोसो, थेला कुर्सिकेन निबा थोबो ओम भावहीन मिसे पक्कान थे नाबान मुला बिबा निक्र्यौलरि ङा दोजि । 

धुस्रे, फुस्रे, जाजाबा ज्युइबा कोला नाबा आपातेन खानाङ निबारि चुमुसिम चोदे हाङ्बारि स्ह्योरिन ! सेमला ङ्योइबासे दोसि तिर्याम ग्याप्से दोबारि बाध्य ताना लाजि । म्राङ्जि आपा कोला ङ्हीनोन गाङ्साल सर्टरि मुला । माङग्यार तिङ दार्ना लाबा हाङ्बा मुबा । नलिन्चोकला ग्युरुला बुकादे तारल्हेम बामासे गाप्बा मुबा । उफ ! विवशता, चुह्राङ्बा हाङ्बारि क्वान आरे च्योच्योरि ब्राबा आपाकोला म्राङ्मा सेमरि खाराङ खाराङबा भावनासे ङादा ङ्हेप्जि ।

‘साले ! पाङ्बा आङ्यान ? काङसे टाजि बिमा अटेर लाला ?’ ङातेन छ्यामला अधबैंसे रेसिमाम ग्याप्सेला आपाजादा ग्राम्बारि पादल सोम ब्लि छेप्जि । तिगा लाइ, खाराङ लाइ तासि ङाइ क्रिङ्जि, ‘ज्योज्यो ! नाबा ह्राङ्बा मुला, तागाइ, ख्लापिन्गो ।’

अधबैंसे बोडोक्सिकेन चिजि । ‘ताला नाबा, आइराक ख्लेप्बा मुला स्ह्यो स्ह्यो ।’

‘हिन्ना, हिन्ना ! खाराङ्बा थाङ खाबाकेन मुला... ।’ ह्राङ्लान सिट दिरि कुरतासि खेप्पा म्हेमेसे थो ब्याङ्जि । ख्यारख्युरला म्हिकादे नोन थोबो थिसि थिसि स्ह्यो स्ह्यो आइराक थुङसि गाडी क्रेबा आपा थेन ज्युइबा कोलादा च्याबारि चुजि ।

‘च्यागो ! चुह्राङ्बा हाङ्बारि कोलादा गाङ्साल सर्टरि ब्रापुङ्बा, ह्राङ बिसाम म्रेन्ना आइराक ख्लेप्बा... ।’ सुङफिनाङ वाला च्युर्बा म्रिङ्कोलाला छेर्बा काइ ग्याप्सेला सिट ग्याम खाजि ।

‘ह्राङए नोन सर्ट जेक्खे क्वान्बा मुला ले !’ खालाइला सहानुभुतिसे प्लिङ्बा प्रतिकार गोल्छेसे थेबारि चुजि ।

‘सर्ट फिरि कम्बल न्हान्बा आम्राङ्नि ? तीनपानेला कम्बल ? गिलास ङ्ही सोममि थुङ्जि ताला ?’ म्रापला ङामरिन चिबा केटासे ङेबाकेन लाबा केटीदा प्रभावित ताना लाबा बाङ लाजि । केटीसे बिसाम थेला तामरि वास्तान आलाना फोन क्लाङ्चिजि ।

‘लाइनु ! कादे गिलास थुङ्जि थेसे... ?’ ग्याप्सेला सिटला म्रिङकोलासे कोलाचादा ङ्योइजि ।

बसनाङ थेलान ताम थाचिबासे जाजाकि लोङ्बा कोलासे योनायोना निसाल पिन्जि, ‘गिलास सोम... ओम नाकाला के ङ्ही ।’

‘ल्हाउ च्यागो ! च्यागो, बिबाकेन मुबा ले !’ म्राप ङामला केटासे केटीदा ह्राङ्ला अनुमान सही ताबासे ‘खाराङ छोर्जि’ बिबा भावसे च्यासिकेन पाङ्जि, ‘स्यान्दो गोर ङ्ही नाकाला के नोन रो ! एदाचा आपिन्नि ?’

कोलासे तुन्बा निसाल पिन्जि, ‘पिन्जि तिल्दा आपिन्से ।’

‘हाङ्बासे सेगे लामाहेन्से तिगा लासे ओम ? न्हा लेप्बा क्वान... ।’ दोलो आपाला नोनमि गाङ्साल जेक्खे सर्ट मुला बिबा म्हिला काइ थेजि ।

‘आइराक थुङ्बा न्होर पोप्साम ज्याकेट आहा ओम ?’ म्रिङ्कोला प्लोनछ्योङ्जि ।

‘तिक्खुरि ओत्थेबा न्होर खाइमा पोप्से ओम जाकेट... ।’ बिना बिना म्हिकादेदा कासि म्रिङ्कोला प्लोनछ्योङ्जि, ‘पाले ! रेदाङ्से आइराक थुङ्बा न्होर पोप्साम तिल्दा आताओम ।’

सूर्यविनायकरि म्रिङ्कोला फाप्माहेन्से बसरि जाजाकि शान्ति ताजि । ङाला मि बिसा रेमरेम ग्याप्सेला सिटरिन कोल्चिजि । आपाला थोबो दारे ह्राङ्लान बामरि स्योन तासि मि लठ्ठ तासि कोहोरेगि ताचिबा मुबा । कोला जाकि लोङ्बा मुबा । सायद ङ्ह्योइबा आपादा खाराङ्लासि कोठारि दोना लासे बिबा म्हान्बाकेन मुबा ।

‘पादल सोम ब्लि छेप्साम रेसिन ख्लाला । ङ्ह्योइबा म्हिला मान नोन कुन्दुर हिन्ना ।’ खाइ खाल्से चुह्राङ बिजि, थेरि क्योलोलो बस क्रेबा अधबैंसेसे ह्राङ्ला सेमताम थान्जि ।

ङाइ कोलाजादा प्लिक च्याजि । आपाला ल्हुइदा ह्राङ्से पुइसिकेन ज्युइबा कोलासे थाप्के लाबा मिसे अधबैंसेदा च्याजि । खाम आखाम आपादा ह्योङ्सिमाम थेसे ङ्योइबारि चुजि, ‘आपा, लोकन्थली दोगाजि । कोटेश्वररि फाप्तोला । रेगो ले, योना रेगो ।’

लोकन्थलीला न्हानरि बस घ्याच्च थेनतामा लल्याकलुलुक आपा कोलारिक्यार प्लिङ निजि । आपाला ल्हुइ कोलासे ताआखाम्नि, चुङ्सिकेन थे क्रिङ्जि, ‘आपा, रेगो ले, आपा... ।’

‘ल्हाउ सेसेला ताजि कोलादा नाङ्सिमाम... ।’ अधबैंसे आपादा सोझो ताना लाबारि थेनिकादे सिटरिक्यार निजि । ङ्हाच्छाला सिटग्याम छेङ्बाकेन लाबा ङाला यादा ल्हेसिमाम अधबैंसे ङ्ही नोन बाम चुङ्सि आपाचादा झ्यालरिक्यार गेनपिन्जि । झ्यालला सिसारि थोबो मोइबा आपादा ह्योङ्सिमाम छोर्ना लाबारि कोलाचासे दोसि बाङ लाबारि चुजि ।

‘दारे आरे एला आपा, कोठा खानाङ हिन्ना ?’ अधबैंसेसे ङ्योइजि ।

‘चाबेल... ।’ कोलासे निसाल पिन्जि । थेला मिग्याम मिख्लि ताइचिबा मुबा ।

‘गिक्खेन निउ । भाडा मुला ? आइराकसे ख्लामाहेन्से आपा खाला कोठारि ।’ अधबैंसेसे पाङ्जि ।

‘आपा ! आपा ! कोटेश्वर खाजि, रेगो ले !’ कोला क्रासिकेन या गिसे खिदि मुबा झोला थेन स्यान्दो यासे आपादा छेङ्सिकेन रेबारि म्हाइजि । आपाला ल्हुइ थेजारिक्यार रोल ताजि । रेना रेना आपाला ल्हिबा ल्हुइसे प्लेक नाङ्सि थे पोक्च्योक चिजि ।

लाइनुदा नाङ्बा म्राङ्सि अधबैंसे दोसि ङ्हाच्छा खाजि ओम प्य्राङ प्य्राङ कुन्दुर सोम ब्लि कुर्चिबा आपाचाला थोबोरि छेप्जि । चुह्राङ्लासि तिक्खुरि अधबैंसेसे तोबा म्राङ्सि तिगा लाइ खाराङ बिसे ताबा कोलासे क्रिङ्सिकेन बिजि, ‘तिल्दा तोबा ङाला आपादा ? ख्लागो, ख्लागो !’ चोदे बिसि जिन्मा आजिन्मान थेसे अधबैंसेला यारि ख्राप्बारि म्हाइजि । या हार्सिकेन अधबैंसेसे थेग्याम क्यार ल्हेजि ओम स्वा क्रेसि क्रिङ्जि, ‘झन थेलान भलो लाबारि म्हाइबा, भाडा पिन्ना कोठारि निगाइ बिबाम... ।’

ज्युइबा केटो दार्सिकेन क्रिङ्जि, ‘तिल्दा तोजि, आतो एला भाडा... तिल्दा तोजि ?’ आपाचा सिटरि स्योन्दोलोङ ताबा मुबा । केटो बिसाम वालावाला मि स्होसि क्रिङ्बाकेन मुबा ।

खलासीसे बाङलामा नोन आपाचादा छोर्ना लाबारि आखाम्माहेन्से बस कोटेश्वरग्याम ङ्हाच्छा वाङ्जि । ङा बानेश्वररि फाप्तोबा मुबा । फाप्बा ङ्हाच्छा ङाइ लिच्छाला रेम गुर्बा आपा थेन बोमो खामा कोलादा च्याजि । ङान्दा छोर्जि, दातेला ग्योइकाइरि क्योङ म्हि अचेत गुर्बा मुला बसला सिटरि । रेम्हुन कडा गेला कारण कुम्बा थेला गो समाजला ल्होलो कोर्रा थेन पादलसे लामा झा कुम्बा मुला । अभावला आरनरि खारतिबा सक्लो थोन्बारि दारे थेतेन खाजिबाइ चुरो आरे न्हाङरि । थे गुर्बा मुला गोआरेबा बो तासि ओम थाहाआरेबा दोखाङरि कुल्चिबा मुला बस । बसन्हाङरि अचेत म्हिला ङामरि चनाखो कोला जाबा कुन्दुर कुम्सि राप्चिबा मुला ओम चुदुइ दारे थे बोमो खाबा ज्युइबा कोला क्योङ म्हि दोबा रे ब्रान्चिबा मुला ।    
 
बनेपा–४, काभ्रे ।

(छिगला अर्थः क्योङ म्हि– आम मान्छे, पुडि नुप्गाइ– भर्सेला परोस्, सायद– खाम्देदोना, प्लिबा– कोतरिएको, ग्यागारबन्दा– गोलभेंडा, डुप्बा– जुटाएको, मामा– पोथी, क्योइबा– तौल÷वजन, खिम्जे– छिमेकी, थाङ्बा– आराम, स्हु– दुःख, गेरेम– अभियान, बोबा– ढाडिएको, ल्हुइ– काया, मोल्बा– मलेर, तापाग्रेन– माघ, काफे– भुवा, गेनाम– श्रमिक, नाबा– बिरामी, पाले– बहाना, कुम्बा– दोब्रिएको ।) 

दोःबा : यकिना अगाध