ल्हानान ङ्हाच्छा बिजुली थेन लुङ्सुर साजाम्बुलिङला म्हिकादे गुङरि चिमुबा । ग्लेसे थेन्दा म्हिकादेला नाम्साग्याम थारेङ थान्बा मुबा ।
बिजुली, लुङ्सुरला जामे मुबा । खाइमा थेदा तिगा ताम सेम आनिमुबा व्हा बोमो रेमुबा, थेसे तिक्खुरि खालाइला दिमरि ताइमुबा ओम थेदा ख्राङ्पिन्मुबा, खाइमा दोङकादेदा मेफ्रा दोना लामुबा व्हा बुव्हाराला बाली नष्ट लापिन्मुबा । खाइमागिम थेसे म्हिदा सुताइ ख्राङ्पिन्मुबा ।
खाइमा खाइमा बिजुली चुह्राङ्लासि बोमो खामुबा, थेला आपा लुङ्सुर ठेङ्सि थेदा काबा बाङ लामुबा । तासाइ बिजुली आउदिन जिद्दि मुबा । थे आपाला ताम खाइमाइ आङ्यान्मुबा । लुङ्सुरला रेमरेमला ठेङ्बासे म्हिकादेदा थोबो स्हुखाबाला नुर दोजि । लिच्छारि थेन्से ग्लेजा निसि तामखान लाजि ।
ग्लेदा थेन्ना तामखान ज्याबा छोर्जि । थेसे तुरुन्तान लुङ्सुर थेन थेला जामे बिजुलीदा सहर ख्लाबा आदेश पिन्जि ओम ल्हानान थारेङला ह्रिरि चिउ बिसि पाङ्जि ।
तासाइ चुसे नोन समस्याला समाधान आतानि । खाइमा बिजुली बोमो खामुबा, थेसे ह्रिला दोङकादे ख्राङपिन्मुबा । खाइमागि ङामला बुकादेरि नोन क्षति ताना लामुबा । म्हिकादेसे चुनोन नाआखाम्नि । थेसे दोसि ग्लेसे तामखान लाजि ।
ग्ले आउलिन बोमो खाजि । थेसे लुङ्सुर थेन बिजुलीदा साजाम्बुलिङ ग्याम थोन्सि मुरि चिबारि आदेश पिन्जि, थेग्याम थेन्से साजाम्बुलिङरि चिमाह्राङ ल्हाना क्षति लाबारि आखाम्मुबा ।
(आबिद सुरती याखारगि ल्होलो प्रतिभाशाली भारतीय ब्रिखेन, खाइबा, क्यालो कलाकार थेन पर्यावरण अभियन्ता हिन्ना । थेसे बिशेष लासि डब डब डब, फ्रुम गि क्युइ’ अभियानला लागि चर्चित मुला, थेसे क्युइला फ्रुमफ्रुम सोना लाबारि दिमदिमरि कोर्सि ब्रेबा ट्याप मर्मत लाबा गे लाला । थे सन् १९३५ रि गुजरातला सुरतरि केबा मुबा ।)
दोःबा : यकिना अगाध
तपाईको प्रतिक्रिया दिनुहोस