याम्बु २८ बेल्बो । तामाङ सारापदा छार पुस्तारि दोना लाबारि प्रविधिला प्रयोग लातोबारि बिख्रेनकादेसे बाङ पिन्बा मुला । कामरेकुनु ब्रिखेन रबिन्द्र तामाङ थेन सोनी तामाङसे ह्रुप्पा ‘तामाङ साराप पोप’ थोला याम्बुरि स्हेङ्बा काठुइ गेताङरि चुह्राङ्बा ताम थान्बा हिन्ना ।

ग्योइकाइब्रिखेन फूलमान बलसे दात्तेला छार पुस्तादा तामाङ ह्युल्बारि मुबा सारापकादे प्रविधिलाला सदुपयोग लासि डोबम्याङ्बा स्होबारि आखाम्साम म्हासिनिला पाङ्जि । थेसे सारापकादेदा पोबान चेमा, चलचित्र थेन कार्टुनकादे स्होसि छार पुस्तारि दोना पाङ्जि । बलसे दात्तेला छार्दोकादेसे छ्योइ आडोबा ताबासे चु स्हेग्यामकादे प्रयोग लासि तामाङ ह्युल्बाला सभ्यता थेन दोङराप गोना लाबारि खालाइसे ध्यान आपिन्बा म्राङ्बा पाङ्जि ।  

बिख्रेन थेन उपप्राध्यापक कुमारी लामासे तामाङ सारापकादे ह्रुप्पा गे अझन ताबारि आखाम्बा पाङ्जि । रविन्द्रला ‘तामाङ साराप पोप’रि तामाङ ह्युल्बाला दोङराप, रिमठिमला ताम, तामाङ सौन्दर्यला तामकादे खासाइनोन कादे रापकादेरि खाबा ताम तामाङतेन आथुइबा टिप्पनि लाजि । सारापकादे डोमा तामाङ जामेकादेला ताम आखाबा बिसि थेसे तामाङ ह्युल्बारि जामेकोलाला ग्ला आरेबान हिन्ना ओम ? ङ्योइजि । तामाङकादेदा राज्यसे लाबा ल्हानान लेबाफेबाला कारण स्थापित लाबा आज्याबा रापकादे पोबारि दात्तेला पुस्तासे गे लातोबारि थेसे बाङ पिन्जि । 

ग्योइकाइ बिख्रेन बिना थिङसे दात्ते साराप थेना लाबा थेन ङ्यान्बा वातावरण छार प्रविधिसे लामा ध्वस्त तासिजिन्बा पाङ्बान सारापकादेदा छार प्रविधिरि बोर्बारि गे लातोबा सेमताम थान्जि ।

पद्मकन्या क्याम्पसला सहप्राध्यापक विमला नेपालसे तामाङ सारापकादे लोप्खाङकादेला पाठ्यक्रमरि युबा गे लासामजे सोना लाबारि खाम्बा पाङ्जि । ब्रिखेन रविन्द्र तामाङ थेन सोनी तामाङला ‘तामाङ साराप पोप’ रत्न पुस्तक भण्डारसे सोम्छा बो दोना तेसिजिन्बा मुला । सोम्छा बोरि तिगाइ राप काप्सि बोगाल गिकसे गोरसोम छिबा बिख्रेन रविन्द्र तामाङसे ग्रा पिन्जि ।  

गेताङ स्योमि गेदुङसे स्हेङबा हिन्ना । तामाङ स्योमि गेदुङ संघीय चोहो नेत्र तामाङसे छ्योइब्रिखेन, काठुइरि सेमताम थान्बा थे गेताङरि बोकिन्बाकादेदा थुजेछे फुल्बा मुबा । गेताङ संचालन स्योमि गेदुङला ग्रेनगाउराइ सरस्वती तामाङसे लाबा मुबा बिसाम डेन सेमताम स्यानचोहो तिर्थमान बलसे थान्बा मुबा । 

(छिगला अर्थः साराप– लोककथा, स्योमि– पत्रकार, गेदुङ– संघ, स्यान चोहो– उपाध्यक्ष)