झापा २८ बेल्बो । वरिष्ठ ग्योइकाइब्रिखेन डा. कमला तामाङदा चिमल क्लब दिमम्हे थर्बु नौ माइल मिरिकसे डेन लाबा मुला । १२ जुलाइकुनु गेताङ स्हेङ्सि डा. तामाङदा क्लबसे डेन लाबा हिन्ना ।

मिरिकला डा. कमला तामाङ दशक ङ्हीहेन्से ग्योइकाइ ब्रिबा गेरि थेनआताना आउदिन सराहनीय थेन प्रशंसानीय गेलाचिबा मुला ।

डा. तामाङसे नेपाली थेन हिन्दी ङ्हीनोन ग्योइरि च्योच्यो ब्रिचिबा मुला । हिन्दी, डोगरी, बोडो, मैथिली, बंगला थेन अंग्रेजी ग्योइला ग्योइकाइ छ्योइकादे नेपाली ग्योइरि दोसि थेसे नेपाली ग्योइकाइदा फ्युक्पो दोना लाबा मुला ।

थेसे गोर डु छ्योइकादे तेसि जिन्बा मुला । थेला ह्युल/स्यानह्युलला ल्होलो स्योस्योकादेरि व्हाइखा, राप, व्हाइ, गजल, ब्रिताम, डान्बा, क्योइकाकादे नियमित छिसिकेन खाबा मुला । चुसेलामा थेदा ह्युल÷स्यानह्युलला ग्योइकाइ गेन्दुनकादेग्याम पुरस्कृति थेन डेन लाजिन्बा मुला ।

चिमल क्लब मिरिकसे थेदा २११ छा भानु केवासाङ्ला दुइसाङरि डेन लाबा हिन्ना । ह्राङ्दा डेनलामाहेन्से डा. कमला तामाङसे पाङ्जि, ‘चिमल क्लब दिमम्हेला चोहो, मुलगाउराइ थेन कार्यकारिणी ह्रोम्हिकादे मोक्कोनदा ङाला हार्दिक आभार फुल्ला । ङा तिनि आउदिन ताङ्बा मुला । ताङ्बा चु कारणसे आहिन कि चुग्याम थारेङ ह्युल/स्यानह्युलला ग्योइकाइ गेन्दुनग्याम डेन याङ्सि ङा दोखाबा मुला । ताङ्बा चु कारणसे तिनि ङालान नाम्सा ग्लारि ङाइ डेन ताबा ज्याबाथोप्साङ याङ्बा मुला ।’

थेसे ङ्हाच्छा पाङ्जि, ‘ह्युल/स्यानह्युलग्याम ङाइ याङ्बा डेन, पुरस्कारबिमा ङाला दिम ख्राङ्गाला चु डेन ग्यार्जाछा गुणा चेमो मुला ङादा । कादे ग्रेन डेन तासाइ नोन ङाइ ह्राङ्निग्याम याङ्बा चु डेन चु नाम्सा दिमला मोक्कोनला तिङ्ला डेन हिन्ना । चु डेनमि ह्राङ्नि क्योङ्ला तिङ्ला ज्याबाम्हान्बा, मोलम हिन्ना । चोदे तामसे ङा तिनि आउदिन ताङ्बा मुला ।’

‘चिमल क्लब दिमम्हे सामाजिक गेकादेरि समर्पित गेन्दुन, चुनोन विशेषतासे चु गेन्दुनला मिन मुला, तिनि चुनोन गेन्दुनग्याम डेन ताम्याङ्बा ङाला ज्याबाथोप्साङ हिन्ना ।’ थेसे पाङ्जि, ‘चु डेनसे तिनि जेक्खे ङादा ताङ्बा पिन्सेला आहिन तासाइ ग्योइकाइ ब्रिबा गेरि ङादा सातान प्रेरित लासेला मुला चु डेनसे, ह्राङ्निला चु चेगाइ थेन ज्याबाम्हान्बासे ।’