सिन्धुपाल्चोक ३१ बेल्बो । मेलम्ची नगरपालिकासे नगरन्हाङ्ला लोप्डा ८ थेन एसईईरि उत्कृष्ट नतिजा बाबा लोप्पोनकादेदा डेन लाबा थेन पुरस्कार पिन्बा मुला ।

नगरग्रेन्पो आईतमान तामाङला चोहोदानरि ताबा गेताङरि डोन्बोछेनकादेरि स्यानग्रेन्पो उमा प्रधान, ग्रेन्पो प्रशासकीय अधिकृत निमेष मिश्र मुबा । गेताङरि वडाचोहो, पालिकाला ह्रोम्हि, ल्होलो लोप्खाङजुगुला प्रधानाध्यापक, लोप्खेन, अभिभावक ओसेम लोप्पोनकादेसे बोकिन्बा मुबा ।

गेताङरि नगरग्रेन्पो तामाङसे उत्कृष्ट लोप्पोनकादेदा डेन लासि नगद पुरस्कार पिन्बा मुबा । गेताङरि आधारभूत तहला ४ म्हे थेन एसईई तहला परीक्षा पिन्बा ३९ म्हे लासि क्योङ ४३ म्हे लोप्पोनकादेदा डेन थेन पुरस्कृत लाबा हिन्ना । नगरपालिकासे ३.६१ जिपिए थेन थेबिमा फिला उत्कृष्ट नतिजा बाबाकादेदा पुरस्कृत लाबा हिन्ना ।

लोप्पोनकादेदा पुरस्कृत लामाहेन्से नगरग्रेन्पो तामाङसे दारेहेन्से मेलम्ची नगरपालिकारि आधारभूत तह (लोप्डा ब्रे)दोनाला ग्युइसेर निशुल्क थेन अनिवार्य लाबा औपचारिक ग्रास्यो लाजि ।

गेताङरि चुदिङ एसईईरि सतप्रतिशत लोप्पोनकादे उतीर्ण ताना लाबारि सफल गोर ङ्ही लोप्खाङ (याखारगि सामुदायिक थेन याखारगि निजि)दा नो डेन्छेन लाबा मुबा ।

गेताङरि नगरपालिकाला ग्युइसेर अधिकृत सुदिराज बुढाथोकीसे चुह्राङ्बा गेताङ खाबा दिङकादेरि नोन लासेला पाङ्जि ।

(छिगला अर्थः ग्रेन्पो– प्रमुख, लोप्पोन– विद्यार्थी, स्यानग्रेन्पो– उपप्रमुख, डोन्बोछेन– विशेष अतिथि, ह्रोम्हि– सदस्य, लोप्खेन– शिक्षक,   लोप्डा– कक्षा, ग्युइसेर– शिक्षा, ग्रास्यो– घोषणा, डेन्छेन– विशेष सम्मान)