याम्बु ५ गोने । नेपाल विद्युत प्राधिकरणला ङ्हाच्छाला गेकाठाक्पा कुलमान घिसिङ, आन्टरप्रेनर पासाङ लामाला छ्याम १० नेपालीसे चु दिङ्ला ‘ग्लोबल हिरो अवार्ड’ याङ्सेला ताबा मुला । चु दिङ्ला अवार्डरि गोरङ्ही तामाङदा दाम्बा हिन्ना ।

जुलाइ २७ रि अमेरिकाला न्युयोर्क सहररि ग्लोबल नेपालीग्याम स्हेङ्बा गेताङरि चु अवार्ड पिन्सेला मुला ।

स्यान्दो अवार्ड याङ्सेलाजुगुरि काइमो आनी छोइङ डोल्मा, ज्ञानेन्द्र शाही, काइपा सन्जय श्रेष्ठ, जामेकोला फुटबलर सावित्रा भण्डारी (साम्बा), पासाङ शेर्पा, केशवराज सेढाईँ, ऋषि धमला मुला । गिक्खे गेन्दुनदा नोन चु अवार्ड पिन्सेला मुला ।

ग्लोबल नेपालीसे क्योङ दिङ नेपालरि ह्राङ्ह्राङ्ला थुमरि उत्कृष्ट योगदान पिन्बा म्हिकादेदा डेनरि चु अवार्ड पिन्सिकेन खाबा मुला ।

(छिगला अर्थः गेकाठाक्पा– कार्यकारी निर्देशक, गेन्दुन– संस्था)