तामाङ डाजाङ गेन्दुनसे जामेकोला फुटबल क्लाङमिदा डेन लाजि
‘डेनसे जामेकोला क्लाङमिजुगु ताङ्जि’ : चोहो फुलकुमार बम्जन
याम्बु ३१ गोने । निबा २४ दिङहेन्से तामाङ ग्योइ, ग्योइकाइ ओसेम रिमठिम थुमरि गेलासि खाबा तामाङ डाजाङ गेन्दुनसे गोने ३१ गते कामरे तामाङ जामेकोला क्लाङमिजुगुदा डेन लाजि । चु डेनसे तामाङ जामेकोला क्लाङ्मिजुगु आउदिन ताङ्बा डाजाङला चोहो फुलकुमार बम्जनसे ग्रादाङ पिन्जि । थेसे पाङ्जि, ‘तिनिदोना खाजिबाइ तामाङ थेन्दुनजुगुसे तामाङ जामेकोला क्लाङ्मिजुगुदा डेन लाबा आम्राङ्नि । तामाङ डाजाङसे थेन्दा डान्सिमाम डेन लामा आउदिन ताङ्बा म्राङ्जि । थेन्से चु गेन्दुनदा अभार व्यक्त लाबा मुला ।’ डाजाङला चोहो फुलकुमार बम्जनसे तामाङ जामे–चाङ फुटबल क्लाङ्मिदा डेन लाबारि म्याङ्मा फेबा आनन्द खाबा पाङ्जि ।
चोहो बम्जनसे पाङ्जि, ‘तामाङ डाजाङ गेन्दुनला ह्रेङ्बा दोङरापला छ्याम २३५ छा ग्योइकाइ लुङदोना संचालन तामा कलम स्याङ्मा कादे ग्योइकाइब्रिखेनजुगुसे रापरि क्लाङ विधारि वाङ्बा ओदे स्याप्बा आरे । थेन्हाङरि नोन फुटबल क्लाङफिरि ओदे ब्रिबा याङ्बा आरे । तामाङ जामे बुसिङजुगुसे ल्होलो राप रचतिबा तामसोर डोबा मुला । कीर्तिमानी गेकादे लाबा मुला । नेपाल र स्यानह्युलरि चर्चित क्लाङ क्लाङ्सि गोलरेकर्ड थान्बा पेमा डोल्मा लामा लिच्छा अनु लामाला छ्याम स्यान्दो जामेकोला क्लाङ्मिजुगुदा डेन लातोबा प्रस्ताव थान्सि ह्रोलाबा राई नाम्सा युबा क्लबला चोहो छविलाल बम्जन, ग्रेनडोन्बो दावा लामा, डोन्बोछेन सन्जय मोक्तान (बंगाल, भारत), चर्चित व्हाइब्रिखेन भरत बम्जन, झाँक्री गेदुङला चोहो चेतबहादुर थिङतेन मोक्कोनदा थुजेछे फुल्ला ।’
जामाकुनु ग्याल्साङ ओसेम स्यानह्युल स्तररि योगदान पिन्बा ङ्हाच्छाला थेन दातेला तामाङ जामेकोला फुटबल क्लाङ्मिजुगुदा डेन लाबा मुबा ।
तामाङ जामेकोलासे क्लाङ्छ्योङ थुम, विशेष लासि फुटबलग्याम ग्याल्साङ ओसेम स्यानह्युल स्तररि दोना लाबा योगदानदा कदर लासिकेन म्हिदाङसे तोङ्जा ङ्हा नगदला छ्याम डेनस्यो पिन्बा मुबा । आयोजकला आन्सार समुदाय न्हाङरि जेक्खे आताना मुतेबा नेपाली क्लाङ थुमरि जामेकोला क्लाङ्मिजुगुला दाराम्बा प्रेरणादायी मुला ।
डेन ताबा क्लाङ्मिरि जामेकोला फुटबल गेदुङला चोहो पेम डोल्मा लामा, अनु लामा, रेणुका नगरकोटे (लामा), रश्मिकुमारी घिसिङ, मञ्जली योञ्जन, निशा थोकर, अञ्जना राणामगर (तामाङ), अञ्जली वाइबा, सपना लामा, सजनी थोकर, रजनी थोकर, सुजता तामाङ, यशोदा थोकर, निकिता थोकर, रबिना गोले थेन अन्जु लो, सुनिता भोलोन, सुस्मा तामाङ मुला ।
चुह्राङ्नोन लासि अखिल नेपाल फुटबल गेदुङ (एन्फा) ला स्यानचोहो दावा घिसिङसे जामेकोलाला क्लाङ्दा न्होररि क्योइबारि आखाम्सेला पाङ्बान एन्फासे जामेकोला फुटबलदा प्राथमिकतारि थान्बा पाङ्जि । ‘जामेकोला क्लाङ्मि खात्दामान ह्युलरि ताबा प्रतियोगितारि बोकिन्चिबा मुला’, थेसे पाङ्जि, ‘चु सम्भव ताबारि क्लाङ्मिला समर्पण थेन एन्फाला ह्रो ङ्हीलान भुमिका मुला ।’
राई नाम्सा युवा क्लबला चोहो छविलाल बम्जनसे गिक्छारेम तामाङ समुदायला जामे–चाङ मुतेबादा सामुहिक स्हुगरि डेन लाम्याङ्मा गर्व ल्हागतिबा पाङ्जि ।
व्हाइब्रिखेन भरत बम्जनसे जामेकोला क्लाङ्मिसे पाङ्ग्यालरि लाबा समर्पणदा प्रशंसा लाबाकेन पाङ्जि, ‘ङान्छे डेन लाबारि तिबा हिन्ना, ह्राङ्निसे क्लाङपाङ्ग्यालरि मिहेनत लास्ह्युला । थेग्याम च्याखेनला चेगाइ याङ्स्ह्युला । सरकारसे झान ल्हाना प्रोत्साहन पिन्तोला, ङान्छे डेनग्याम चु आशा रेन्ना लाबा बाङ लाबा हिन्ना ।’
डेन ताबा क्लाङ्मि गुङ्ला रेणुका नगरकोटेसे ह्राङ्निला क्लाङ थेन योगदानदा कदर लाबान ग्रेन प्रेरणा ताबा पाङ्जि ।
जामाकुनु डाजाङसे २४ दिङ्हेन्से स्हेङ्सि खाबा २३५ छा ग्योइकाइ गेताङ नोन स्हेङ्बा मुबा । ग्योइकाइ गेताङरि तेज योन्जन, सजना गोले, अमर बिरही थिङ, धनराज घिसिङ, कृपा घिसिङतेन स्यान्दो ग्योइकाइब्रिखेनजुगुसे ह्राङ्ह्राङ्ला रचना डोबा मुबा ।
जामाकुनु ह्रोल्ज्याङ सम्राट गोपाल योन्जनला केवासाङ नोन परतिबासे थेला फोटोरि खादा फुल्सि डेन लाबा मुबा ।
गेताङ स्हेङ्बारि डाजाङदा चर्चित काइपा दिल तामाङ (अष्ट्रेलिया), बि.बि. योन्जन (क्यानाडा), मन्जु मोक्तान (लेवनान), कृष्ण बहादुर गोले, अरुणकुमार गोले (अस्ट्रेलिया), सुबास तामाङ स्याङतान (सशस्त्र प्रहरी बल नेपाल), भगवति गुरुङ (अबुधाबी युएई), विष्णु बम्जन (सिन्धुली), डिबि बम्जन (सिन्धुली), सन्जय मोक्तान (वेस्टबंगाल, भारत)से ह्रो लाबा मुबा ।
चुह्राङ्नोन लासि स्यान्दो ह्रोलाबाजुगुरि सिन्धुली हरिहरपुरगढी गा.पा. युवा क्लबला धनकुमार मोक्तान, हर्कबहादुर वाइवा, विनेश बम्जन, बिमल घतानी, प्रेम घिसिङ, प्रकाश पाख्रिन, कमल भोलन, प्रकाश मोक्तान, निरज लामाखोर, लक्ष्मी लामा, रबिना लामा मुबा ।
सिन्धुपाल्चोकग्याम सोनाम वाङ्ज्यु लामा थिङ, हेम कुमार तामाङ बोम्जन, राज कुमार लो तामाङ, लालदेव घिसिङ तामाङसे ह्रोलाबा मुबा ।
मकवानपुर राइ नाम्साग्याम सुरेश थिङ थेन हेटौंडाग्याम श्रीबहादुर बज्युसे डाजाङदा गेदाङ स्हेङ्बारि ह्रोलाबा मुबा ।
गेताङ तामाङ डाजाङ गेन्दुन थेन राई नाम्सा युबा क्लब, मकवानपुरला छ्याह्रोरि ताबा मुबा ।
(छिगदोनः ग्यल्साङ– राष्ट्रिय, स्यानह्युल– अन्तर्राष्ट्रिय, क्लाङ्छ्योङ– खेलकुद, ओसेम– तथा, म्हिदाङ्से– जनही, मुतेबा– समग्र, क्लाङ– खेल, दाराम्बा– उपस्थिति, गेदुङ– संघ, स्यानचोहो– उपाध्यक्ष, स्ह्रुग– रुप, च्याखेन– दर्शक, चेगाइ– माया, लुङ– श्रृंखला, ह्रोल्ज्याङ– संगीत, छ्याह्रो– सहकार्य)
तपाईको प्रतिक्रिया दिनुहोस