सिओल, कोरियो । नेपाल तामाङ घेदुङ लो कोरियासे टुबादुइ ग्युइसेरकि कल्याणकारी कोषग्याम नेपालला ल्होला जोङ्ला प्राङ्ग्याल ओसेम जेहेन्दार लोप्खेनजुगुदा छात्रवृत्ति थे ग्युइसेरकि बार्बु बोठाबा मुला ।

गेन्दुनसे दातेदोना ९ जोङ्ला ६५ म्हे लोप्खेनदा नगद तोङ्जा ङ्हाला छ्याम कापी, कलम, स्कुल ब्याग, स्होन्बो छ्यामला तोबा ग्युइसेरकि बार्बु पिन्बा मुला । चुतेन छ्याम असहाय बिजाबुमोदा माध्यमिक ग्युइसेर परीक्षादोना निरन्तर ह्रो लाबा अभियान नोन ङ्हाच्छा बोर्बा मुला ।

चु अभियान १० छा गेदाछोकला ङ्हाच्छाला चोहो रवि योञ्जन तामाङला गेयोजना आन्सार चुबा हिन्ना बिसाम दाते ११ छा गेदाछोक चोहो राजकुमार स्याङतानला थुछापारि दाछोम ह्रोमिजुगु गणेश योञ्जन तामाङ, दावा फिन्जो तामाङ, एल.बी. रुम्बा तामाङ, पासाङ प्रयत्न बोम्जन तामाङ छ्यामला सक्रिय ह्रोरि निरन्तर सञ्चालन ताचिबा मुला ।

घेदुङ लो कोरियाला ग्रेनगाउराइ ओसेम स्योमि दावा फिन्जो योन्जन तामाङला आन्सार दातेदोना सिन्धुपाल्चोकला श्री भिम विद्याश्रम मा.वि., श्री सर्बोदय मा.वि., उदयपुरला श्री शिवशक्ति आधारभूत विद्यालय, सिन्धुलीला श्री मा.वि. कर्मिडाडा, श्री तीन कन्या प्रा.वि. ताप्केडाडा, इलामला साँगे चोम्दान्दे छोइलिङ गुम्बा शिक्षा लोप्खाङ्ला लोप्खेनजुगुदा ग्युइसेरकि बार्बु बोठाजिन्बा मुला ।

चुह्राङ्नोन लासि चितवनला श्री राष्ट्रिय आधारभूत विद्यालय गडुवा, श्री राष्ट्रिय मा.वि. समिपुर, काभ्रेपलाञ्चोकला श्री मिलन प्रा.वि., श्री गणेश प्रा.वि., रामेछापला श्री डहु मा.वि., दोलखाला श्री सरस्वती आ.वि. थेन नुवाकोटला श्री भेडावारी मा.वि.दा ग्युइसेरकि बार्बु बोठाजिन्बा मुला ।

नेपाल तामाङ घेदुङ लो कोरियासे ग्युइसेर, संस्कार, ग्योइ, रिमठिम, दोङराप थे ङोसेबाला ख्युरछ्या थेन ल्हेछ्यादा ह्राङ्ला ग्रेन्पो दोन्डुब स्होसिकेन लो कोरियारि मुबा तामाङ समुदायदा एकताबद्धा लाबा गे लासिकेन खाबा मुला । गेन्दुनसे ग्युइसेरग्याम केवा पोबा, आशा सोना लाबा थेन ह्याल लिउला म्राप ठ्वाङ्बा दोखाङ किन्बा उन्पाङ्बा मुला । लिउरि झान ल्हाना लोप्खेनदा टुबादुइ स्ह्रुगरि ग्युइसेरकि ह्रो ताना लाबान अभियानदा काप्बा प्रभावकारी स्होबा योजना नोन सार्वजनिक लाबा मुला । गेन्दुनसे चु अभियानदा सफल स्होबारि ह्रो लाबा क्योङ ह्रोलाबा याफिरि आभार व्यक्त लाबा मुला ।

(छिगकि दोनः लो– दक्षिण, बोठाजि– वितरण गर्यो, टुबादुइ– दीर्घकालीन, ग्युइसेरकि– शैक्षिक, प्राङ्ग्याल– विपन्न, लोप्खेन– विद्यार्थी, बार्बु– सामाग्री, गेन्दुन– संस्था, म्हे– जना, बिजाबुमो– बालबालिका, ग्युइसेर– शिक्षा, गेदाछोक– कार्यसमिति, थुछापा– संयोजक, ह्रोमि– सदस्य, स्योमि– पत्रकार, ङोसेबा– पहिचान, ख्युरछ्या– संरक्षण, ल्हेछ्या– संबर्धन, ग्रेन्पो– प्रमुख, दोन्डुब– उद्देश्य, केवा– जीवन, लिउ– भविष्य, दोखाङ– लक्ष्य, उन्पाङ्बा– जनाएको, स्ह्रुग– रुप)