याम्बु । ज्योमोगाङला कुरि मुबा पासाङल्हामु निकोल निक्की अस्पताल, लुक्लाला ह्राङ्ला २० छा दिङ्साङ भव्य स्ह्रुगरि दाङ्बान निबा दशक ङ्हीरि डुप्बा उपलब्धीजुगु सार्वजनिक लाबा मुला ।

नेपाल आदिवासी जनजाति स्योमि गेन्दुनछेन (फोनिज)ला ग्रोइपा ओसेम अस्पतालला गेकाठाक्पा पासाङकाजी शेर्पाला आन्सार स्हेङ्सि २० दिङरि अस्पतालसे बुम सोमबिमा ल्हाना नाबाला क्योन्बा थेन तोङ्जा गिसे ग्यार्जा ङ्हा लाइनुला ह्रावाङ केबा लापिन्बा मुला । ज्योमोलुङ्मा क्रेकोरला डान्बारि स्हेङ्बा चु सामुदायिक अस्पतालसे ग्लिङथुमला स्थानीयजुगु हेन्से ह्युलन्हाङ थेन फिह्युल्पा पर्यटकदोनाला लागि केवाह्रावा ल्हुइथाङ साप्तो पिन्सिकेन खाबा मुला ।

ग्याल्साङ विभूति पासाङल्हामु शेर्पासे ग्लिङथुम समुदायला लागि अस्पताल स्हेङ्बा म्हाङ म्राङ्बा मुबा । तासाइ ज्योमोलुङ्मा क्रेबा ताङरि थे डोङ्माहेन्से थे म्हाङ अपुरोन चिजि । थेनोन दुइरि स्विजरल्याण्डला गिक्छा जामेकोला ट्रेकिङ गाइड निकोल निक्की ज्योमोगाङलिङ क्रेकोरला ताङरि दुर्घट्ना तामा लुक्लारि थेला ह्रुप पासाङल्हामुला आले आङ गेलु शेर्पातेन ताजि । लिच्छा आङ गेलु निकोलतेन स्विजरल्याण्डरि नोन छ्याम चिजि । निक्कीसे पासाङल्हामुला अपुरो म्हाङ छ्योना लाबा प्रतिबद्धता उन्पाङ्बान छ्योआछ्यो २५ दिङ ङ्हाच्छा लुक्लारि अस्पताल स्होबारि पहल लाबा मुबा । लिस्ह्रुगरो ङ्ही नोन महान जामेकोलाला मिनरि पासाङल्हामु निकोल किक्की अस्पताल स्हेङ्जि, थेसे दाते २० दिङ छ्योबा मुला ।

फोनिजला ग्रोइपा ओसेम अस्पतालला काठाक्पा पासाङकाजी शेर्पासे अस्पतालसे आमाल्हुइथाङ, बिजाल्हुइथाङ, आपतकालीन क्योन्बाहेन्से नाख्रु थेन मिसम्बन्धी ल्हुइथाङ शिविरदोना निरन्तर साप्तो पिन्सिकेन खाबा पाङ्जि । थेला आन्सार ज्योमोगाङ क्रेकोर थेन ट्रेकिङला ताङरि घाइते ताबा पर्यटकजुगुदा तत्काल रेस्क्यु लासि क्योन्बा लाबा डिछ्या लाबा मुला । सोलुखुम्बु चौंरीखर्क, लुक्ला, सेर्कु थेन नाम्चेदोना चिबाजुगुसे नोन चुनोन अस्पतालग्याम क्योन्बा किन्सिकेन खाबा मुला ।

गेताङला ग्रेनडोन्बो स्विस राजदुत डानिएला भेरोनिक मोलीसे थे अस्पतालदा स्विस–नेपाली ह्रोला प्रतीक बिसिमाम प्रशंसा लाजि । थेसे पाङ्जि, ‘ज्योमोगाङला तिङरि मुबा चु अस्पतालसे दशक ङ्हीहेन्से निरन्तर ल्हुइथाङ साप्तो पिन्सिकेन खाबा मुला, चु स्विजरल्याण्ड थेन नेपालला मैत्री सम्बन्धला ह्याल उदाहरण हिन्ना ।’

खुम्बु पासाङल्हामु गाउँपालिका चोहो मिङमा छिरिङ शेर्पासे अस्पतालसे स्थानीय ओसेम पर्यटक ङ्हीलान लागि केवाह्रावाला भुमिका क्लाङ्बा पाङ्जि । ‘चु अस्पतालसे प्रसुती साप्तो, गर्भाशय क्योन्बा, निशुल्क मान बोठाबा थेन ग्लिङथुम ल्हुइथाङ सचेतनारि अमुल्य योगदान तानालाबा मुला’, थेसे पाङ्जि ।

स्विजरल्याण्डग्याम खाबा अस्पतालला स्हेङ्खेन निकोल निक्कीसे २० दिङ खाराङ्लासि थाल्जि पत्तान आयाङ्बा पाङ्बान स्विस दाता ङ्ही रब थेन राल्फाला ह्रोरि स्हेङ्बा ‘जन्म चिल्ड्रेन एजुकेशन प्रोजेक्ट’से अस्पतालरि केबा मुतेबा बिजाबुमोदा डा १० दोना दिङदाङ्से २२० स्विस फ्राङ्क छात्रवृत्ति पिन्सिकेन खाबा ग्रादाङ पिन्जि । थेला आन्सार चु दिङरि जेक्खे २६१ बिजाबुमोसे छात्रवृत्ति याङ्बा मुला । 

२५ तिसा क्षमताला चु अस्पतालरि गोर ङ्ही चिकित्सकला छ्याम २५ म्हे कर्मचारी गेलाचिबा मुला । अस्पतालला ह्राङ्ला २१ किलोवाटला हाइड्रोपावर थेन ९ किलोवाटला सोलार प्रणालीग्याम विद्युत केनालासि स्वावलम्बी स्ह्रुगरि संचालन लाचिबा मुला । न्होरकि आडुप्बा नाबाजुगुला निशुल्क क्योन्बा लाबा थेन याम्बुरि रिफर लातोबा नाछालरि सुताइ न्होरकि ह्रो लाबा परम्परा अस्पतालसे निरन्तरता पिन्बा मुला ।

गेताङरि पासाङल्हामु फाउन्डेशनला चोहो ओसेम ङ्हाच्छाला राजदुत दावाफुटी शेर्पा, पासाङल्हामु शेर्पाला ज्योज्यो क्याप्टेन आङ गेलु शेर्पा, स्विसला ङ्हाच्छाला राजदुततेन छ्याम दर्जन सोमबिमा ल्हाना स्विस नागरिकसे बोकिन्बा मुबा । दान्नाइ ग्यार्जा ङ्हा म्हेसे बोकिन्बा काप्तोनरि स्थानीय जामेकोलाजुगुला रिमठिमकि स्याबा थेन ग्लिङथुम शेर्पा चाबास्हेजुगु उन्बा मुबा, थेसे काप्तोनदा झान रौनकपूर्ण स्होजि ।

पासाङल्हामु निकोल किक्की अस्पताल तिनि सोलुखुम्बुला गौरव जेक्खे आहिन, क्योङ ह्युलला लागि नमुना सामुदायिक अस्पतालला स्ह्रुगरि स्थापित ताजिन्बा मुला । चुसे ल्हुइथाङ, ह्रो थेन समर्पणला ह्याल ज्योमोगाङरि फेल्चिबा मुला ।

(छिगकि दोनः ग्योमोगाङ– हिमाल, स्ह्रुग– रुप, डुप्बा– प्राप्ति, स्योमि– पत्रकार, गेन्दुनछेन– महासंघ, ग्रोइपा– सल्लाहाकार, गेकाठाक्पा– कार्यकारी निर्देशक, बुम– लाख, नाबा– बिरामी, क्योन्बा– उपचार, ह्रावाङ– सुरक्षित, केबा– जन्म, ज्योमोलुङ्मा– सगरमाथा, क्रेकोर– आरोहण, ग्लिङथुम– हिमाली, फिह्युल्पा– विदेशी, केवाह्रावा– जीवनरक्षा, साप्तो– सेवा, ग्याल्साङ– राष्ट्रिय, ज्योमोगाङलिङ– हिमालय, उन्पाङ्बान– जनाउँदै, डिछ्या– व्यवस्था, ल्हुइथाङ– स्वास्थ्य, बिजाबुमो– बालबालिका, डा– कक्षा, ग्रादाङ– जानकारी, म्हे– जना, स्ह्रुग– रुप, न्होरकि– आर्थिक, आडुप्बा– अभाव, नाछाल– अवस्था, काप्तोन– समारोह, फेल्चिबा– फैलाइरहेको)