याम्बु । डा. लोकबहादुर लोप्चनसे ब्रिबा पुस्तक ‘सरकारी गेदोइला ग्योइ ओसेम आमाग्योइरि ग्युइसेर’ लोकार्पण ताबा मुला । ग्योइ आयोग थेन आदिवासी जनजाति उत्थान ग्याल्साङ प्रतिष्ठानला छ्यागेरि आयोजित गण्डकी प्रदेश सरकारी गेदोइला ग्योइसम्बन्धी अन्तरक्रियात्मक गेताङ ग्युइसेरखेन्पो डा. लोकबहादुर लोप्चनसे ब्रिबा पुस्तक ब्लोन डा. टकराज गुरूङ, ग्योइ आयोगला चोहो डा. गोपाल ठाकुर थेन आदिवासी जनजाति उत्थान प्रतिष्ठानला स्यानचोहो रेशम गुरूङग्याम संयुक्त स्ह्रुगरि लोकार्पण लाजि । डा. लोप्चनसे ग्योइ थेन ग्युइसेरला थुमरि दशक सोमहेन्से निरन्तर कलम चलप लासिकेन खाबा मुला । थे चेमोब्रिखेन थेन व्हाइब्रिखेन सुताइ हिन्ना बिसाम थेला ‘दोर्जे सरला ज्योइ’ चेमो थेन ‘गाइने ज्योज्योला सारङगीरि’ व्हाइपोप तेजिन्बा मुला ।

थेला गिक्छा कृति ‘लोप्बोन प्रतियोगिता सफलता कुञ्जिका’ मुला । वि.सं.२०८० ल्होरि थेसे तोङ्जा बिमा ल्हाना पृष्ठला सरकारी गेदोइ थेन तामाङ ग्योइसम्बन्धी पुस्तक तेःबा मुबा । थे ग्युइसेरकि थिग्युन थेन ग्योइ थुमला अभियन्ताला स्ह्रुगरि ङोसेमुला । दाते थे ‘ल्हानाग्योइ ग्युइसेर अनलाइन’ला ग्रेनडिक्खेन हिन्ना । ग्योइ भाषा आयोगला गेगाउराइ सुताइ मुबा लोप्चनसे बागमती प्रदेश सरकारी गेदोइला ग्योइ कार्यान्वयन न्हाङ्ला नेपाल तामाङ घेदुङ थेन बागमती प्रदेश सरकारला लागि ‘तामाङ ग्योइ कुबा पाठ्यक्रम थेन पाठ्यसामाग्री २०८१’ ब्रिसि तेजिन्बा मुला । ग्योइ आयोगग्याम थेला ‘ग्युइसेररि आमाग्योइला प्रयोग सम्भाव्यता’ सम्बन्धी अनुसन्धान पुस्तक तेजिन्बा मुला । चुह्राङ्नोनलासि थेला ग्यार्जाछा ब्रितामजुगु ग्याल्साङ स्योस्यो, जर्नल थेन स्मारिकाजुगुरि छिपा मुला ।

थेसे नेपालला दिङ वर्ष निजामती उत्कृष्ठ व्यक्तिला स्ह्रुगरि इन्टिग्रिटी आइकन २०२१ याङ्बा मुला बिसाम नेपाल सरकार, रिमठिम, पर्यटन ओसेम नागरिक उड्डयन ब्लोनखाङग्याम ग्योइ थेन ग्योइकाइव्हाना बागमती प्रदेश पुरस्कारग्याम डेन ताजिन्बा मुला । चुलिच्छा थेला ‘तामाङ ग्योइ थेन ग्योइकाइ लोप्बा’ पुस्तक तेःबा ताङरि मुला । ब्रिखेनसे चु पुस्तकरि नेपालरि ग्योइकि सङघीयताला छ्याम सरकारी गेदोइला ग्योइ तिगा, खाराङ्लासि प्रयोग लाबा हिन्ना थेला लागि गहन खेडोब अनुसन्धान लासि प्रयोगयोग्य थेन कार्यान्वयनला लागि दाःन व्हा कार्ययोजना प्रस्तुत लाबा मुला ।

चुह्राङ्नोन लासि लोप्खाङ थेन तोच्चा लोप्खाङ थेन तोच्चा ग्युइसेररि आमाग्योइला कार्यान्वयनला लागि अवधारणा थेन ग्यारेमला ठोस खाका प्रस्तुत लाबा मुला । छ्यामरि सरकारी गेदोइला ग्योइ थेन ग्युइसेर थुमरि कर्मचारी थेन जनशक्ति तोबासे शिक्षण साप्तो थेन लोक साप्तोरि सफलता खाराङ्लासि ? ह्राङ्बा नुरस्हे ह्रुप्सि ग्योइ थेन नामला न्हाङ्सम्बन्ध कायम लाबा बाङ लाबा म्राङ्ला ।

(छिगकि दोनः गेदोइ– कामकाज, ग्युइसेर– शिक्षा, ग्याल्साङ– राष्ट्रिय, छ्यागे– सहकार्य, ब्लोन– मन्त्री, स्ह्रुग– रुप, ग्युइसेरकि– शैक्षिक, थिग्युन– सुधार, कुबा– तालिम, व्हाना– तर्फ, दाःन– आधार, ग्योइकि– भाषिक, खेडोब– अध्ययण, तोच्चा– उच्च, ग्यारेम– अभ्यास, साप्तो– सेवा, नुरस्हे– विषयबस्तु)