हेटौंडा । तामाङ ग्युइ थेन अनुसन्धान नुरस्हेफिरि हेटौंडा क्याम्पसरि तिरेला सेमिनार सफलतापूर्वक स्योल्बा मुला । थे सेमिनार गेताङरि हेटौंडा क्याम्पस, मकवानपुर बहुमुखी क्याम्पस, निर्मल क्याम्पस ओसेम मनहरी क्याम्पसला तामाङ लोप्बोनजुगुसे उल्लेखनीय बोकिन्बा मुबा ।
चु गेताङ त्रिभुवन विश्वविद्यालय तामाङ लोप्बोन घेदुङ गेदाछोक थेन तामाङ स्टडी सर्कलला संयुक्त आयोजनारि ताबा हिन्ना । सेमिनाररि ल्होलो थुमला वक्ताजुगुसे महत्वपूर्ण नुरस्हेरि प्रस्तुतिकरण पिन्बा मुबा ।
गेताङरि बागमती प्रदेशला मुख्यब्लोनला ग्रेन्पो ग्यालठिपा ग्रोइपा ओसेम नेपाली कांग्रेस मकवानपुर जोङ चोहो बुद्ध लामासे ग्यालठिपा चेतना थेन नेतृत्व फेल्गेबारि तामाङ छारिब्योनला भूमिका नुररि धारणा थान्जि । थेह्राङ्नोन लासि नेपाल तामाङ घेदुङला संघीय ह्रोमि मेम्वर लामासे तामाङ रिमठिमला सामाजिक ओसेम ऐतिहासिक दृष्टिकोण प्रस्तुत लाजि ।
नेपाल बैंक लिमिटेडला वरिष्ठ प्रवन्धक मकर तामाङसे तामाङ समुदायला ग्याल्सा–स्वामित्वला बैंकजुगुरि समावेशी नीति थेन गोछापा नुररि ह्राङ्ला प्रस्तुति थान्जि । ओस्बान लासि, तामाङ सोसाइटी अफ ल्क्ध्, अष्ट्रेलियाग्याम अविरल तामाङसे तामाङ ग्योइ थेन रिमठिमकि ख्युरछ्या ओसेम ल्हेछ्यारि प्रवासी समुदायला भूमिका नुररि धारणा व्यक्त लाजि ।
दोङराप केन्द्रीय विभागला लोप्बोन निश्चिल तामाङसे ‘ग्याल्सा स्होबारि तामाङ समुदायः तामाङ समुदायला दोङरापकि सीमान्तीकरण’ नुररि प्रस्तुती थान्बा मुबा ।
(छिगकि दोनः स्योल्बा– सम्पन्न, लोप्बोन– विद्यार्थी, गेदाछोक– कार्यसमिति, ग्रेन्पो– प्रमुख, ग्रोइपा– सल्लाहकार, ग्यालठिपा– राजनीतिक, फेल्गेबा– विकास, ह्रोमि– सदस्य, ग्याल्सा– राज्य, गोछापा– प्रतिनिधि, रिमठिमकि– सांस्कृतिक, ख्युरछ्या– संरक्षण, ल्हेछ्या– संबर्धन)
तपाईको प्रतिक्रिया दिनुहोस