सिन्धुपाल्चोक २५ तापा । मेलम्ची नगरपालिकारि स्योल्बा ङ्हीरेला ठाल फाआतोबा मि शिविररि शल्यक्रिया लाबा नाबाजुगुदा मिरे नगर ग्रेन्पो आइतमान तामाङसे ह्रुप तासि योना थाङ्गाइ बिसि मोलम लाबा मुला ।

भिजन हिमालयन फाउन्डेसनला न्होरकि ह्रोरि, मेलम्ची नगरपालिकाला समन्वय ओसेम तिलगंगा मि प्रतिष्ठानला प्राविधिक ह्रोरि आयोजित थेच्चा ठाल फाआतोबा मि शिविर मेलम्चीरि ताबा मुबा । शिविररि वरिष्ठ मि नोइ खेन्पोजुगुला टोलीग्याम ८४ म्हे मोतीबिन्दु पीडित नाबाजुगुला शल्यक्रिया लाबा मुबा ।

नाबाजुगुतेन ह्रुप तासि नगर ग्रेन्पो तामाङसे मि ह्राङ्बा संवेदनशील अंगला क्योन्बासे नागरिकला केवास्तररि ङोन्छाङ सकारात्मक प्रभाव पारतिसेला पाङ्जि । थेसे न्होरकि आडुप्बा ङ्यान्दि क्योन्बाग्याम वञ्चित तातोबा नाछालदा नुप्ना लाबारि चुह्राङ्बा ठाल फाआतोबा शिविरजुगु आउदिन उपयोगी मुबासे नगरपालिकाग्याम नागरिकला दानस्हि ल्हुइथाङ साप्तोरि पहुँच सुनिश्चित लाबारि खाबा रेरि नोन चुह्राङ्बा गेताङजुगुदा निरन्तरता पिन्सेला पाङ्जि ।

नगर ग्रेन्पो तामाङसे शिविर सफल ताना लाबारि ह्रोलाबा भिजन हिमालयन फाउन्डेसन, तिलगंगा मि प्रतिष्ठान ओसेम ल्हुइथाङमिजुगुला टोलीदा थुजेछे व्यक्त लाबान स्थानीय नागरिकला ल्हुइथाङफिरि नगरपालिका सातान जिम्मेवार मुबा पाङ्जि ।

स्थानीय साप्तो किन्बाजुगुसे ह्राङ्ला थुमरि ठाल फातोबा स्ह्रुगरि गुणस्तरीय मि क्योन्बारि याङ्मा ताङ्बा व्यक्त लाबान आयोजक गेन्दुनजुगु तेन नगरपालिकादा आभार प्रकट लाबा मुबा ।

(छिगकि दोनः स्योल्बा– सम्पन्न, ग्रेन्पो– प्रमुख, ठाल फाआतोबा– निःशुल्क, नाबा– बिरामी, मिरे– शुक्रबार, तापा– पुष, थाङ्गाइ– स्वास्थ्य लाभ होस, मोलम– कामना, न्होरकि– आर्थिक, नोइ– रोग, खेन्पो– विशेषज्ञ, म्हे– जना, क्योन्बा– उपचार, केवा– जीवन, ङोन्छाङ– प्रत्यक्ष, आडुप्बा– अभाव, ङ्यान्दि– कारण, नाछाल– अवस्था, दानस्हि– आधारभूत, ल्हुइथाङ– स्वास्थ्य, साप्तो– सेवा, ल्हुइथाङमि– स्वास्थ्यकर्मी, स्ह्रुग– रुप, गेन्दुन– संस्था, साप्तो– सेवा)