हेराङ । ‘स्थानीय स्वामित्व थेन बोकिन्बा : क्योङखोप सुनिश्चितता ह्याङ्ला प्रतिबद्धता’ बिबा नाराला छ्याम ललितपुरला बागमती गाउँपालिका क्योङखोप सुनिश्चितता थेन दिगोपना स्थानीय तह घोषणा लाबा मुला ।

जोङ्ला गोरडु स्थानीय तहकादे गुङ्ला बागमती गाउँपालिका क्योङ्खोप सुनिश्चितता थेन दिगोपना स्थानीय तह घोषणा ताबा सोमछा स्थानीय तह हिन्ना । चु ङ्हाच्छा हेराङला दक्षिण स्यारथुमरि मुबा महाङ्काल गाउँपालिकासे २०८२ दुगु ३१ गते थेन याम्बु उपत्यका न्हाङरि परतिबा महालक्ष्मी नगरपालिकासे ड्वाफ्रे ११ गते क्योङ्खोप सुनिश्चितता थेन दिगोपना स्थानीय तह घोषणा लाबा जोङ ह्युलल्हुइथाङ गेदिम हेराङला प्रमुख डाक्टर भुवन पौडेलसे थासाङ पिन्जि ।

गेताङरि जोङ खोप समन्वय समितिला चोहो ओसेम जोङ समन्वय समितिला प्रमुख ऋषिदेव फुयालसे खोप अभियान ल्हुथाङ स्वयंसेविकाकादेसे लाबा योगदान क्योइआखाम्बा मुला बिसि पाङ्जि । ‘मुतेबा वर्ग थेन थुमदा ह्रुप्सि बोर्तोबा दायित्व स्थानीय सरकारला मुला, क्योङ्खोप सुनिश्चितता थेन दिगोपना देःबा आरे, चु कठिन गेरि ल्हागतिबा मुतेबासे प्रशंसानीय गे लास्ह्युबा मुला, चुला लागि थुजेछे फुल्ला’, थेसे बिजि । थेसे बिजामैत्री स्थानीय तह, बिजाब्रेल्साङ मुक्त स्थानीय तह घोषणा लाबा ध्यान पिन्बारि नोन गाउँपालिकादा म्होइजेन लाजि ।

बागमती गाउँपालिकाला चोहो बीरबहादुर लोप्चनसे क्योङ्खोप सुनिश्चित घोषणाला छ्याम चुदा दिगोपना लाथान्बारि क्रियाशील तासि ल्हागतिबारि ल्हुइथाङकर्मी ओसेम स्वयंसेविकादा म्होइजेन लाजि । ‘ह्राङ्निला ह्रोदा नोबा क्योइका ताला, प्रात्साहन स्हुग तिगाइ ह्रोलासिकेन खाबा मुला, लिउरि नोन ह्राङ्निला योगदानला क्योइका लासेला मुला ।’ लोप्चनसे पाङ्जि ।

राष्ट्रिय खोप गेताङ बिजा डोङ्बा दर च्याङ्ना लाबा सेमसे लागू लाबा नेपाल सरकारला प्राथमिकता याङ्बा गेताङ हिन्ना बिसि जोङ ह्युलल्हुइथाङ गेदिम हेराङला प्रमुख ओसेम वरिष्ठ ल्हुइथाङ प्रशासक डाक्टर भुवन पौडेलसे पाङ्जि ।

‘राष्ट्रिय खोप गेताङरि १५ लादिला बिजाबुमोकादेसे क्षयनोइ, रोटा, पोलियोमाइलाइटिस, न्युमोनिया, मेनिन्जाइटिस, भ्यागुते नोइ, लहरेब्युङ्बा, धनुष्टङ्कार, जापानिज इन्सेफ्लाइटिस, दादुरा, रुबेला थेन टाइफाइड ह्राङ्बा १३ तोसोला सरतिबा नोइजुगु लिब्रोला खोपजुगु याङ्बा थेन गर्भवती जामेकोलाकादे टिडी, धनुष्टङ्कार थेन भ्यागुते नोइ लिब्रोला खोप याङ्जिन्बा सुनिश्चित तामाहेन्से क्योङ्खोप सुनिश्चित स्थानीय तह घोषणा लाला । चु तिनि बागमती गाउँपालिकासे जिन्ना लाबा मुला ।’ डाक्टर पौडेलसे पाङ्जि ।

(छिगला अर्थः हेराङ– ललितपुर, ड्वाफ्रे– जेठ, दुगु– बैशाख, ह्युलल्हुइथाङ– जनस्वास्थ्य, थासाङ– जानकारी, जोङ– जिल्ला, क्योइआखाम्बा– अतुलनीय, क्योइका– मूल्याङ्कन, स्हुग– स्वरुप, तोसो– प्रकार)