सिन्धुलीला हरिहरपुरगढी लोप्खेन समाजला शैक्षिक गुणस्तर ल्हेना लाबारि १३ बुँदे प्रस्ताव
सिन्धुली ४ बेल्बो । हरिहरपुरगढी स्थानीय लोप्खेन समाजसे गाउँपालिकाला शैक्षिक गुणस्तर ल्हेना लाबारि १३ बुँदे शैक्षिक योजना स्थानीय सरकारदा पिन्बा मुला । समाजसे खाबा न्होर दिङ २०८२÷८३रि चु योजनाकादेदा कार्यान्वयन लाबा म्होइजेन लासि हरिहरपुरगढी गाउँपालिकाला ग्युइसेर शाखा प्रमुख रामेश्वर पुडासैनीदा फ्यास्हिङस्यो पिन्बा हिन्ना ।
लोप्खेन समाजसे लोप्खाङरि च्याङ्नारि लोप्बा मापदण्ड स्होसि क्योङ लोप्खेनसे प्रध्यानाध्यापकतेन गेडिक्ना लाबारि सम्झौता लातोबा प्रस्ताव थान्बा मुला । चु मापदण्डला दानःरि प्रोत्साहन थेन दण्डला डिछ्या लातोबारि बाङ पिन्बा मुला ।
लोप्खाङदा प्रभावकारी च्याबा, दिङदाङ्सेला क्योइका ताङ स्होबा, उत्कृष्ट लोप्खाङला घोषणा थेन लोप्डा ३ थेन ५ ला लोप्पोनला लोप्बा क्योइकारि पालिकासे ङोन्छाङ भुमिका किन्तोबा नुरकादे नोन प्रस्तावरि थान्बा मुला ।
लोप्खेन समाजसे लोप्बारि ह्रोताबा ल्होलो गेताङकादे– शैक्षिक जोम्ना, शैक्षिक बार्बु स्हेङ्बा कार्यशाला, प्रतियोगिता, अभिभावक ग्युइसेर, लोप्बा विधि तालिम ल्होलो संचालन लाबारि बजेट सुनिश्चित लातोबा ताम थान्बा मुला ।
स्थानीय नुर ओसेम आमाग्योइला प्रभावकारी डोबाला लागि डोबाछ्योइ स्हेङ्बा थेन डोबाताङ फेगेल्बारि पालिकासे ग्यालाम उन्तोबा ताम थान्बा मुला । ग्युइसेर थुमदा खाबा दिङला बजेटरि गिक्छा प्राथमिकता पिन्तोबारि बाङ पिन्बा मुला ।
पालिकान्हाङरिन उच्च ग्युइसेर डोबारि सुविधा पिन्बारि क्याम्पस संचालन, लोप्खाङरि रेला दिगु गेताङदा स्थानीय उत्पादनतेन थुइबा ओसेम ग्युइसेरदा श्रम, नाम थेन प्रविधितेन समन्वय लासि गेताङ संचालन लातोबा प्रस्तावकादे नोन समाजसे थान्बा मुला ।
मदन भण्डारी राजमार्ग ख्यारख्युरला थुमरि नमुना लोप्खाङ संचालन लाबारि गुरुयोजना स्हेङ्बा थेन अनिवार्य बिमा स्यान्दो लोप्खेन सरुवा शैक्षिकसत्र थुम्सि जेक्खे लाबा डिछ्या डिक्ना लाबारि समाजसे ह्रिबा मुला ।
समाजला चोहो नीरबहादुर मुक्तानसे गुणस्तरीय ग्युइसेर सुनिश्चित लाबारि चु बुँदाकादे पालिकासे कार्यान्वयनरि बाजि बिसाम मुतेबा थुमला शैक्षिक सुधार सम्भव मुबा सेमताम थान्जि ।
(छिगला अर्थः लोप्खेन– शिक्षक, ल्हेबा– अभिवृद्धि, न्होर– आर्थिक, ग्युइसेर– शिक्षा, फ्यास्हिङस्यो– अनुरोधपत्र, गेडिक्ना– कार्यसम्पादन, दानः आधार, डिछ्या– व्यवस्था, क्योइका– मुल्याङ्कन, ताङ– सूची, लोप्डा– कक्षा, लोप्पोन– विद्यार्थी, ङोन्छाङ– प्रत्यक्ष, नुर– विषय, बार्बुु– सामाग्री, डोबाछ्योइ– पाठ्यपुस्तक, डोबाताङ– पाठ्यक्रम, फेगेल्बा– विकास, नाम– शीप)
तपाईको प्रतिक्रिया दिनुहोस