याम्बु । तामाङ राष्ट्रिय पुस्तकालयसे स्हेङ्बा ओसेम आदिवासी जनजाति उत्थान राष्ट्रिय प्रतिष्ठानला न्होर ह्रोरि ‘तामाङ दोङरापफिरि गोष्ठी थेन काठुइ’ गेताङ ताजि ।
गेताङ डा. गणेश योन्जनला ग्रेनडोन्बो थेन ग्योइखेन्पो अमृत योन्जनला चोहोदानरि ताबा मुबा । बौद्धला आङ्दधारारि कामरेकुनु ताबा चु गेताङरि ब्रिखेन गोपाल फ्युबा, बौद्धनाथ थुम फेल्गेबा समितिला गेकाठाक्पा मोहनकुमार लामा, ब्रिखेन ओसेम डुप्बाम्हि रविन्द्र ग्याबक, सिर्जना तामाङसे गेस्यो प्रस्तुत लाबा मुबा ।
गेताङरि ब्रिखेन गोपाल फ्युबासे खनियाबास तामाङ विद्रोहफिरि ह्राङ्ला गेस्यो प्रस्तुत लाबा मुबा । थेसे थे विद्रोहला नायककादे दामन पाख्रिन, सेक्के तामाङतेन स्यान्दोफिरि दातेदोना म्हाइबा, डुप्बा ताबारि आखाम्बा ओम चुफिरि ह्राङ्से खाम्बा गेलाचिबा सेमताम थान्जि ।
स्यान्दो गेस्यो प्रस्तोता गेकाठाक्पा मोहनकुमार लामासे खेबाः घ्याङकादे गुङ्ला स्यारला गोर डु घ्याङकादेफिरि विस्तृत जानकारी पिन्बा मुबा । थेसे ‘डोङ्मे घ्याङ’, ‘पोङ्दी घ्याङ’, ‘नार्गे घ्याङ’, ‘वाङ्थाली घ्याङ’, ‘लिसंखु घ्याङ’, थेन ‘चरी घ्यङ’ला दोङरापफिर ल्हेबा सेमताम थान्बा मुबा ।
गेताङरि डुप्बाम्हि रविन्द्र ग्याबकसे तामाङ जातिला दोङराप, भमि शमशेरला इस्तिहार थेन चुसे रेन्बा ङ्योइबाफिर ह्राङ्ला गेस्यो थान्बा मुबा ।
स्यान्दो गेस्यो प्रस्तोता सिर्जना तामाङसे सामाजिक वर्गिकरणः मनुस्मृति थेन मुलुकी ऐन १९१० ला भुमिकाफिरि सेमताम थान्बा मुबा ।
गेताङरि संजोक लाफा मगर, मुक्तान थेबा, खोजराज गोले, उदय दोङ, अधिवक्ता रविन्द्र ङारदेनतेन स्यान्दोकादेसे ह्राङ्ला जिज्ञाशा थान्बा मुबा ।
ब्रिखेन निस्नु थिङसे डेन सेमताम थान्बा थे गेताङ संचालन व्हाइखाब्रिखेन लक्ष्मी रुम्बासे लाबा मुबा ।
(छिगला अर्थः फेल्गेबा– विकास, गेकाठाक्पा– कार्यकारी निर्देशक, गेस्यो– कार्यपत्र, डुप्ब– अनुसन्धान, खेबाः– पुरानो, डुम्बाम्हि– अनुसन्धानकर्ता)
तपाईको प्रतिक्रिया दिनुहोस