ङा राप्बा मुला–
शताब्दी– शताब्दीहेन्से नाङ्बा
थे साजाम्बुलिङरि,
थेरि जामेकोलासे बु बुन्बा
अपराध म्हान्मुबा,
ओम ताम पाङ्बा–
संस्कार लिब्रो घोषणा ।
ङा राप्बा मुला–
थे गिक्खे ग्लाग्याम
थेरि ङाला मुतेबा गोङ्मा
खाइमाइ आथुम्बा क्रिपह्राङ
परम्पराला जन्जीरकादे खिबा मुबा ।
तासाइ ङा ब्राजि ।
बाम्सिकेन, छेङ्सिकेन, ब्लोसिकेन–
ताम पाङ्बारि चुजि–
ङ्हाच्छारेम लोङ्सि,
ओम दोसि,
ज्योमोलुङ्मा ह्राङ नोबा काइरि ।
ङा जामेकोला हिन्ना–
ङा याखारगि आमा हिन्ना,
सिर्जना हिन्ना, सृष्टि हिन्ना
ङा सातान ‘च्याङ्ना’ डान्बा
तासाइ सातान ‘ल्हाना’ पिन्बा ।
ङादा चाबामि पिन्जि
तासाइ याङ्ताम डेबा,
ङादा चेगाइमि पिन्जि–
तासाइ सर्तला छ्याम
ङादा इज्जतमि पिन्जि–
तासाइ गाराला सीमान्हाङरि ।
ङा तिनि थे सीमाकादे क्लेसि
स्वाभिमानला दाज्र्यु
क्याबाकेन मुला ।
दारे ङा मिख्लि आहिन,
मे दोबा मुला–
थेसे ह्याल नोन पिन्ना,
ओम पोबाला आहुति नोन ।
ङा राप्बा मुला–
थे साजाम्बुलिङला खानाङ ङा
घरेलु मिन आहिन,
राजनीतिक निर्णय दोबारि खाम्गाइ,
ग्युइसेर जेक्खे याङ्बा आहिन,
शिक्षित दोबारि खाम्गाइ,
तस्विररि जेक्खे आहिन,
दोङरापरि ब्रिबारि खाम्गाइ ।
ङा याखारगि ‘जामे’ हिन्ना–
थेदा लिउरि च्याबा मि स्होजि,
तासाइ लिउ स्होबा बाङ आपिन्नि ।
तिनि ङा थे बाङ म्हाइसिकेन आहिन,
रेन्बाकेन मुला–
ह्राङ्लान न्हाङ्ला ह्यालग्याम ।
ङा राप्बा मुला–
तोङ्जा दिङ ह्रेङ्बा लोङ्बाफिरि,
ओम थे राप्बा साजाम्बुलिङ,
ङाला छिगजुगुसे स्होबा–
क्रान्तिला, चेतनाला,
ओम ह्यालला लिउला साजाम्बुलिङ ।
मिरिक, दार्जीलिङ, भारत ।
(छिगला अर्थः साजाम्बुलिङ– धरातल, बु बुन्बा– सास फेर्नु, लिब्रो– विरोधी, ज्योमोलोङ्मा– सगरमाथा, याङ्ताम– अधिकार, चेगाइ– माया, दाज्र्यु– झण्डा, ग्युइसेर– शिक्षा, लिउ– भविष्य)
दोःबा : यकिना अगाध
तपाईको प्रतिक्रिया दिनुहोस