खालाइ अमेरिका समर्थक मुगाइ 
ह्याङ्ला तिलाइ फेबा आतानि
अझ युथ काउन्सिलला ह्रोमि मुजिम बिसाइ
म्हाररि ज्याबाथाङ ताजिले
अमेरिकन पिआर नोन हिन्ना बिसाम 
अझ छुग निजि
स्पेशल एजेन्ट हिन्ना बिसाममि 
छुग नोन छुग 
जेक्खे चोत्ते हिन्ना–
नेपाली सेम ताबारि आतानि ।

युरोपियन युनियनला ह्रोमि मुगाइ 
व्हा फ्रि तिब्बत ङ्योलोकला ह्रोमि मुगाइ 
भारतीय भतुवा मुगाइ 
व्हा चीनियाँ चम्चा मुगाइ 
ह्याङ्दा तिगाइ फेबा आतानि 
जेक्खे चोत्ते हिन्ना नेपाली चेतना ताबारि आतानि 
ह्युलभक्त वेदना ताबारि आतानि ।

चाहे दरवारला द्वारपाल मुगाइ
चाहे सेनाला सुराकी मुगाइ 
चाहे दलाई लामाला स्होन्बोल्हेम्बा मुगाइ 
चाहे पाकिस्तानला भाट मुगाइ
ह्याङ्दा तिगाइ फेबा आतानि 
जेक्खे चोत्ते हिन्ना
थोबोरि नेपाली क्रास्या ताबारि आतानि 
ज्याङरि नेपाली का ताला आदेनि ।

भ्रष्ट पोलोवाल गाल्दा मुगाइ 
व्हा माङ्ग्यार न्हाङरिन खिदि मुगाइ
म्लाङ मुगाइ व्हा उर्गाइ मुगाइ
लिच्छाला मुगाइ व्हा ङ्हाच्छाला मुगाइ
तिलादाम्मान तासाइ ह्याङ्दा फेबा आतानि
जेक्खे चोत्ते हिन्ना–
न्यायप्रेमीदा जुटाब लाबा ताला आदेनि 
ह्युलला थोबो तोर रेन्बा ताला आदेनि
ह्याङ्बिमा सेबा ताला आदेनि
गणतन्त्र सङ्घीयता तेन्बा ताला आदेनि ।

‘खेप्पाजुगु ग्ला खाली लाउ’
चु जेक्खे पाङ्बा ताम न्हा हिन्ना 
ह्याङ्ला ताम डिक्माहेन्से
नाबा थाङ्ने मुगाइ
ह्या स्यान्दोदा रेनतेन्बा मुगाइ
खाल्दामान मुसाइ तिगाइ फेबा आतानि
म्हे छाप मुगाइ व्हा स्याङ छाप मुगाइ 
खात्दामान छाप तासाइ नोन ताला
कादे लोभ पाप तासाइ नोन ताला
जेक्खे खोबारि नेपाल ताला आदेनि 
ग्यागारदान ल्हागाङ थेन ज्योमोगाङ ताला आदेनि ।

दोःबा : यकिना अगाध