सायद थेदा थाहा आरे
नाम्सा थान्थान ताबा तामसोर
क्राबाक्रिङ्बा ताबा तामसोर
थे निमा बोबा सेमला तामसोर
सिम्बा मिला तामसोर ।
हिन्बामि
नाम्सा थान्थान ताना लाबारि खानाङ निबा हिन्ना ले थे
थेसे डान्बा मुला
दिमला पेबा ख्यातोबा मुबा
गोजीला ज्याआखाम्बा गालकादे ख्यातोबा मुबा
दोप्ताला भाका ख्यातोबा मुबा
इक्रासे साप्रा ताबारि आखाम्माहेन्से
दिमला अपमान ख्यातोबा मुबा
ख्याबारि तिगाइ स्हे आतामा
महिनावारीला का
थेदा ङ्हेथान्सि निबा पेबाजुगु ख्यातोबा मुबा
थेसे नाम्सा पक्कान म्लेबा आरे ।
फ्याबाकेन लामा फिह्युल मामला बुल्खु मि
थेदा पक्कान डान्बा खामुसिम
ख्लासि निमाला आमाला मिख्लि
फ्याङ्बाकेन लामा जाहाजला ब्यापजुगुरि
थेदा पक्कान डान्बा खामुसिम
जाहाज बिमा नोबा जाजा मुमा आपाला बाम
दाइबाकेन लामा म्हेमेला सेम निबा
फिह्युल व्यन्जन
थेदा पक्कान डान्बा खामुसिम
लाइनुदा ख्वाआम्याङ्बा छ्याम्बाजुगु
कोर्ना लाबाकेन लामा ग्रेन डिहिरि नाबा व्हील चियर
थेदा पक्कान डान्बा खामुसिम
दिङ्छा नाबा मामला तिसा
थेसे नाम्सा पक्कान म्लेबा आरे ।
फिह्युल रे न्हाङ्ला ह्युल डान्बाजुगु
कोठरी ब्लि न्हाङला निसासीजुगु
बाध्यतारि हाल्बा तोङ्जा म्हाङ
थेनोन म्हाङ थुर्बा होडबाजीरि तुहाब ताबा छे
आहा.........!
थेसे नाम्सा पक्कान म्लेबा आरे ।
तासाइ थेला वाध्यताजुगु
सेमनिबा विज्ञापन दोसि कोर्चिला नाम्सा
बिला
क्यानाक्योरदा छेमनिबा मुला फिह्युलरि
सायद नाम्साबा
थेला रील्स भिडियो च्यामुसिम
विकेन्डरि कोर्बा ग्लाजुगु म्राङ्मुसिम
स्याबा÷कोबा÷चाबा म्राङ्मुसिम
कात्ते सोझो मुला नाम्सा ?
वास्तवरि चुनोन सोझोपनरि सोबा
नाम्सा थेदा आउदिन सेम निला
थेसे नाम्सा पक्कान म्लेबा आरे ।
म्लेबारिम पाले तोबा मुसिम
खाजिबाइ दानः तोबा मुसिम
खाजिबा पालेरि म्लेगाइ थेसे नाम्सा ?
खाजिबा दानःरि म्लेगाइ थेसे केबा ग्ला ?
नाम्सा बिसाम थान्थान ताबा पक्कान हिन्ना
तासाइ फिह्युल्पाला सारि
नाम्सा बिमा फेलोङ्ना थान्थान ताबा
सेमजुगुरि बिसाम
नाम्सा अजम्बरी सोबा मुला
थेसे नाम्सा पक्कान म्लेबा आरे ।
सिक्किम, भारत ।
दोःबा : यकिना अगाध
तपाईको प्रतिक्रिया दिनुहोस