तिरेकुनु, 
ङ्योइसेला मुला
ङाला ह्युलला
अराजनीतिक बुद्धिजीविकादेदा
ङाला ह्युलला साधारण म्हिकादेसे ।

ङ्योइसेला मुला थेन्दा–
तिगा लाबा मुबा एनिकादेसे
खाइमा आमासा
गोल्छेसे सिबाकेन मुबा
याखारगि जाजा, गिक्खे
थेन ज्याबा मे ह्राङ ।

ङ्योइसेला आरे
एन्ना गोइलो
स्ह्योला दिगु लिच्छा
एन्छे ह्रेङ्बा ब्लाप्बा न्हाबा
सुन्य ग्याम
एन्ना संघर्ष
ओम सम्पत्ति छाबा
एनिकादेला दार्शनिक लुबाफिरि ।

ग्रिक मिथककादे
ओम थे आत्म–नाइबा बारे नो ङ्योइसेला आरे
थेदा एन्छे महसुस लाबा मुबा
खाइमा खालाइसे, ह्राङ्ला सम्पत्तिरि
कायरला डोङ्बा नाचिबा तामुबा ।

तार लुबाला
क्रिपरि ल्हेबा
एनिकादेला बेतुकला
तर्ककादे बारे नोन तिगाइ ङ्योइसेला आरे ।

थे रे
खासेला मुला थे साधारण म्हिकादे
अराजनीतिक बुद्धिजीविकादेला
छ्योइ थेन व्हाइखारि
खाइमाइ आखाबा
तासाइ खाल्छे थेनिकादेदा
ङ्हे, गेङ, नाकाला के थेन तोर्तिया बापिन्बा लामुबा
थेन्छे थेनिकादेला क्वान डुप्मुबा
थेन्ना गाडी स्याङ्मुबा
थेन्ना नाकि थेन वान च्याबा लामुबा
मुतेबा गे लामुबा ।

ओम थेनिकादेसे ङ्योइसेला मुला
‘तिगा लाजि एनिकादेसे
थेदुइरि प्राङ्बाकादेसे नाचिबा मुबा स्हेर
क्रोचिबा मुबा बोमोला मेल्हामरि
न्हाङन्हाङ फ्रेसि
आशा थेन केवाला नाजुकता थोसि ?

ङाला चेगाइ ह्युलला
अराजीतिक बुद्धिजीविकादे
एन्तेन निसाल तासेला आरे
ओम मौनताला गिद्धसे
टाङ्सेला मुला एन्ना ग्रुङ
एन्ना आज्याबा थोपसाङसे
ह्राङ्लान आत्मरि क्यासेला मुला
ह्राङ्ला म्युङगाइ स्वाकादे ।

(छिगला अर्थ– नाइबा– घृणा, नाचिबा– भोगिरहेको, वान– बगैंचा, स्हेर– पीडा, निसाल– उत्तर, आज्याबा थोपसाङ– दुर्भाग्य, काठाक्पा– निर्देशक)

(ओत्त रेनो कास्तिइयो : केबा सन् १९३६, डोङ्बा १९६७ रि । ग्वाटेमालाला क्रान्तिकारी समुहला प्रचार काठाक्पा । सन् १९६७ रि सैनिकसे चुङ्सि ब्लिरे दोना आज्याना लासि यातना पिन्सि छोन्बोन ख्राङ्बा मुबा ।  १७ दिङ हेन्सेन जेल थेन यातना नाबा थेसे ३१ दिङला तुन्बा केवाल्हामरि ‘अराजनीतिक बुद्धिजीवि’ ह्राङ्बा ऐतिहासिक व्हाइखा ब्रिबा मुबा ।)

दोःबा : यकिना अगाध