१
सेमजो,
ए ङाला ‘सेमजो’ हिन्ना–
‘ङाला सेमला
ङाला तिङला ।’

२
सेमजो,
ल्हुइरि ङाइ एतान ब्रान्सि टिबा छोर्जि
ल्हुइरि ङाइ एतान रुङसि टिबा छोर्जि
चु आहिन्साम–
‘ए ङाला सेमला ग्लेस्या आतासेला
ए ङाला तिङला ग्लेस्या आतासेला ।’

३
सेमजो,
ङाइ ह्राङसे ह्राङतान याकार छोर्सि टिबा दुइ मुबा थे
ङाइ ह्राङसे ह्राङतान रोङरोङ छोर्सि टिबा दुइ मुबा थे
एसे ङादा एला सेमला ग्ले स्होला आजिन्बा दुइरि
ङाइ एदा ङाला तिङला ग्लेस्या स्होला आजिन्बा दुइरि ।

४
सेमजो,
चेकाइ बिबा तिला ?
सेम बिबा तिला ?
तिङ बिबा तिला ?
एतेन प्रे तामाकुनुहेन्दे ङाइ थाहा याङ्जि कि–
‘चेकाइ बिबा सेमला ताम टिम
चेकाइ बिबा तिङला ताम टिम ।’

५
सेमजो,
ग्यामरि ब्राबा दुइरि दारेम ङाइ खाइमाइ ह्राङदा याकार छोर्सेला आरे
ग्यामरि ब्राबा दुइरि दारेम ङा खाइमाइ थोर्सेला आरे
तिल्दाबिसाम–
‘ए ङाला सेमरि मुला
ए ङाला तिङरि मुला ।’
ishworthokar@gmail.com