मास्टर :  ल्हास्सो..फ्याफुल्जि, चाङ । ज्याबा खाम्बान मुला ? ज्योज्यो ग्याम्छो मि आम्राङमु । 
न्होर्गिन : ल्हास्सो मास्टर आले, फेप्काउ चुर्सेन दान्छ्यागो । ज्योज्यो नाम्सारि फेप्पा मुला ।
मास्टर :   ए.., अनि जा ग्याल्बो जा ?
न्होर्गिन : दिम न्हाङरिन मुला । डोबान मुदाला । लोप्खाङग्याम खामा हेन्से तोङगे माङगेन आलामुला । खालि कम्प्युटर जेरिन चिमुला । ख्यात्पा बिमुला तिगा ख्यात्मुगेम । म्हुना तासाइ आदुइ दोना चिबा म्राङमुला । अ साँच्चि, चुला ख्यात्पा डोबा खाराङबा मुला लोप्खाङरि आले ?
मास्टर : ग्याल्बोला ख्यात्पा डोबा तुयुङमाला ह्राङबा आरे चाङ । ह्राङनिसे दिमरि ध्यान पिन्तोजि । उदिदि कमजोर ताबान निबा मुला । 
न्होर्गिन : आहिन, मास्टर आले । खराङलासि कमजोर ताजि ? इनसेम थेदा कम्प्युटररि ख्यात्पा डोबान म्राङमुला । 
मास्टर : कम्प्युटररि चिजि बिमाइसात डोबान ताला स्हयोम ? चाङ एन, खाइ खाइ तिरेम स्याप पिनो स्हयोम । 
न्होर्गिन : फेप्काउ मास्टर आले न्हाङरिन । उ चुरिन डोबान मुला । (ग्याल्बो ह्रोकादेदेन फेसबुकरि च्याट लाबान तामुला । ओर्से यु ट्युबरि फिल्म च्यासि चिबा ताला । थेनान धुनरि मास्टर थेन आमा खाबा थाहा नोन आदा) लाइनु ग्याल्बो, लोप्खाङला मास्टर फेप्कामुला । आइसे कम्प्युटररि डोबा च्याबा रो । 
ग्याल्बो :  हँ, (लोङबान) सर.. फ्याफुल्जि । ङा मि भर्खर नोन चिबा । 
मास्टर :  फ्याफुल्जि । अनि तिगा डोजि स्हयोम आइसे खाइ, खाइ । (सरसे माउस चलाब लाबान कम्प्युटररि च्याबा ताला ।) ल, आइसेमफेसबुक का ठोङजिम स्हयोम । उ यिर्से यु ट्युब एन अननोन चिम । आहिन आइसे ख्यात्पा डोबाजा तिगा हिन्ना लाइनु ?
ग्याल्बो : सर ङाइ कम्प्युटरला..........(वाक्य पुरा आदामान) 
न्होर्गिन : आहिन मास्टर आले, चु फेसबुक, तिगा रो थे...यु..ट्युब बिबा जा तिगा नि ?
मास्टर : सानो चाङ । चुदा सामाजिक सन्जाल बिमुला । चु इन्टरनेट जोडब लाबा कम्प्युटर थेन   मोबाइलरि तामुला । चुग्याम ह्रोकादेदेन ताम लाबा, फोटो च्याबा, फिल्म च्याबा...हेन्से तोबा आतोबा म्होकोन तामुला  । कम्प्युटररि जे आहिन दान्दे आबा आमासे कोलाकादेदा ह्वाम्बा दुइरि ज्याबा चाबा स्हे पिन्बाला सट्ट मोबाइल पिन्सि ह्वाम्बा मुला चु ज्याबा गे आहिन । थेसेलामा जाजान दिङला आले आङाकादेदा चुराङबा सुविधा पिन्बारि आदामुला । थेसे लोप्खाङला ख्यात्पा डोबादा समेत असर लामुला । 
न्होर्गिन : (बोमो खाबान) हे. ताम मि चुराङबाका.......। तिनि हेन्सेन इन्टरनेट बन्द लासिपिन्ना ङाइ । जामा खाराङ लासि च्याबा चिम फेसबुक, फोटो, ङाइएन च्याला नि । 
मास्टर : अ, बोमो खासि आदाक्या चाङ । लाइनुदा सम्झाब लासि थेला थुमरि गोनाका लातोला स्हयोम । गोमा हेन्सेम इन्टरनेट बन्द लानोन आदो नि । कि खाराङ ?
न्होर्गिन : ए, हिन्ना नि ।

सामाजिक सन्जाल निश्चित दुइरि प्रयोग लागे । सम्भावित समस्याग्याम तिनि हेन्सेन थारेङ तागे ।