दुगु ड्वाफ्रेला स्योप स्योप क्रोपा ला । चितवन टाँडी ग्ला, लाबा बिबा खालाङसे आखबा जाक्कि गाइमा ङाला टयाम्पो निसि जिन्जिम । स्यान्दो टयाम्पोरि निबारि कि घन्टा ङ्हि रुङतोजि कि ब्रासि नितोजि । ब्राबातेन टयाम्पो रुङबा थे गिनोन दुइरि जिन्ला । थे क्रोपरि टयाम्पो रुङसि टिबा बिमा ङाजा ब्रासि निला म्हान्जि ।
ङातेन छ्याम रामेछापला आङा मिथिला मुबा । ब्राउ आङा ब्रासिन नि बिमा ‘हे नाना चु क्रोबारि खाराङ लासि निसेओम ? गार्नाङसे एला नारि का खाबा म्लेजि ?’ थेसे ब्रासि निबा सेम अलाजि ङादा थेरि टि आम्हान्जि । गाडि ङ्याबासे थोपो फ्रेला ह्राङनोन स्हुखाजि । आ तिल दाम्मान तागाइ ङा ब्रासिन निला आङा लि दोप दोप लासि ब्राबा चुजि । दिनिला एघार बाह्र बजे क्रोसि टुसे क्वाननोन बाम्जि गोल्सेसे ब्रासि निजि । ओराङबान पन्ध्र मिनेट ते ब्रामा गोर्कि मटर साइकल खाबा म्राङजि । ङाला सेमसे रोकाप लाइ म्हान्जि । यासे रोकाप लाबा सङकेत पिन्बाम थेसे रोकाप लाजि । ज्यार्दि ग्योइरि ङयोइजि ( ‘कहाँ सम्म जाने हो र ?’ ङाइ थेलान ग्योइरि पाङजि ‘म जुटपानी सम्म जाने । हेर्नुस न ट्याम्पो छुटेछ, तपाईले हामीलाई त्यहाँसम्म छोडि दिनुस न है तपाई उतै पुग्ने भए.......!’
म्हेन्दो ङि म्राङसि मुदाला ताला ब्राउ बि आखम्जि आदा ए बि आखम्जि । कुटिसि टिजि मोटरसाइकल रोकाप लासि । छिन गिक लिच्छा ‘हुन्छ आउनुस चढ म छोडी दिन्छु त्यहाँसम्म ।’ ङानिम फिर ताङजि थे क्रोपारि टु मुख्खु लासि ब्रा आतोजि ङा गुङरि मिथिला कुनिरि टिसि मोटरसाइकल हुइक्याप ताजि ।
ग्यामरि थेलान ज्यार्दि ग्योइरि ताम ङोइजि । एनि जुटपानिरि मुबा माओवादिला शिविररि हिन्ना ? हिन्ना ङानि थेरिन टिबा मुला । एन्ना दिम खालाङ ? काभ्रे थेन रामेछापरि । ओम लोपखाङरि कादे दोना डोसि तुम्बाक पुइसि ब्राबा ? ङा दसरि डोबागेन मुबा पुलिससे तारिख कप्सि दुख पिन्जि । माओवादिसे गेताङरि खाइमादाम्मान ब्राउ चे बिजि । थेनोन दुइरि गोर्कि गेताङरि निबा, दोसि दिमरि खा आपुङजि ङामि थेराङनोन लासि चु ग्लारि दोकजि । दात्तेम मुक्तिला लागिरि छेबा बेनादान ज्याबा दिन बाला बिबा गोजि । ङाला ताम थेसि उदेक तजि ।
‘ए दोसिन पढाप लाला ?’ लाबाम लाला जनवादि शिक्षा लाबागेन मुला । मोटरसाइक ब्राबागेन ताम लाबागेन मुला । जनवादि शिक्षा बिमा नेजि थे । ‘ङयान्गो चु जनवादि शिक्षा बिबा तिलाइ आहिन एन्दा ह्वाम्सि थोबा गे चे हिन्ना । चु शिक्षाला तिलाइ अर्थ आरे । जुन शिक्षा बुर्जुवा बिसि एन्से ख्लाजि थेनोन शिक्षा एन्दा न्हाङगार तोला ।
दन्दे चुन पोस्टला ग्रेन कमान्डर मुसाइनोन न्हाङगार थे बिमा ग्रेन प्रमोसन ताबारि एन्ना प्रमाणपत्र च्याला । थे तासि ए पडाप लाउ ।’ डु दिङ दोना बुर्जुवा शिक्षा पडाप आला ङा बिसि ब्राबा म्हिला दिमागरि चुसे पाङबा ताम हिन्ना वा म्हान्जि । थे दुइरि ब्यारेकरि टिबा लडाकु ङा ह्राङबा कादेदा पडाप लाबा व्यवस्था आरेबा मुबा । खाइ तिलासि पडाप लाला म्हान्जि । ङाइ थेदा खाराङ लासि पडाप लास्योम ङान्दाम बिदा आपिन । खालाङ निसि पडाप लासे ? ङाला सुर्ता थान्जि । एला सेम चे तातोला एसे तिकदामन लासि पडाप ला ाखम्ला । एसे सेम लाउ । ओदे रेङबा ग्यामरि ताम लासिगेन थेला मोटरसाइकल ङानि टिबा गेटरि दोखाजि ङानि चुरिन हिन्ना बिमा रोकाप लाजि । ङानि फाप्पा दुइरि थेला फोन नम्बर ङाला यारि ब्रिसि पाङजि फोन लाउ ङाइ एदा ह्रो लाला । थे फेसि निजि थेला दिम शक्ति खोर बिबाग्लारि रो । थेरिन ङान्ना ह्रोकादेला बेथान स्मृति बृगेट बिबा ब्यारेक मुबा । थेरि नोन ह्रोकादे लगभग ३÷४ दोना मुबा ।
ङा ङाला कोठारि दोजि । म्होकोन जवानकादे कोहि म्हेर्बा कोहि रेडियो ङयान्सि टिबा कोहिजा जनादेश बिबा साप्ताहिक स्योस्यो च्यासि टिबा म्राङजि । ङा तिरि स्योन तासि सोचाप लाबा चुजि । दोलोला म्हिसे पाङबा ताम सहि हिन्नोन ? खाइमा अहिन म्हन्जि खाइमा हिन्ना म्हान्जि । तिलासे तिलासे म्हान्जि । लिच्छारि तिला दाम्मान तागाइ ङाइ पडाप लाला एस.एल.सि. पिन्ना । पिन्बाम पिन्ना खाराङ लासि पिन्ना सेमरि ताम क्लाङजि । न्हाङगार दाङसे ङाइ तिल्मा छ्याम खाबा थे म्हिदा फोन लाजि थे दुइरि ङातेन मोबाइल आरेबा लाइन फोनग्याम फोन लासि ह्रुप ताइ बिमा थेसे ताला बिसि खाजि । ङादा प्राइभेट टेस्ट एस.एल.सि. पिन्गो एला जोङरिन निसि फारम भरप लाउ ङाइ एदा किताबकादे बासि पिन्ना बिजि । थेसे ङादा दस कक्षाला किताबला उम थेन कापिन बाजि । ङा पडाप लाबा चुजि । ङाला नानासे काभ्रेरि फारम भरप लाजि बिबा ताम थेमा ङा झन नोन ताङजि । पडाप लाबाम लाजि ल्हानान गारो ताजि आसेबा थे म्हिसे गि ङि लोप्जि । दुइ दुइरि खाइमा ब्यारेक न्हाङरिन खासि लोप्जि खाइमा ङानोन फिरकेप थोन्सि घन्टा न्हि सोम लोप्जि । म्होकोन सेजि गणित आसेजि । थेराङनोन लासि गोलेसे दुइ निजि क्रोप म्हासिगेन खाङबा ला खाजि । ङालान तोसासे पडाप लाजि । २०६५ साल माघ महिनारि ङा टेस्ट पिन्बारि धुलिखेलरि खाजि । जाच पिन्जि गाह्रो तासाइ सेम तिङ हेन्से पास तादोला म्हान्सि सजिलोसे ब्रिजि ।
चुराङलासिन ङाला पडाइ सुरु तासि न्हाच्छा वाङजि । दोसिन ब्यारेकरि निजि ला गिलला तालिम सुरु ताजि । तालिमसे ब्लाब्बा ओदेन पडाप लातोबा ओदेन थे जे आहिन गणित आसेना क्राबान खाजि । तिनि बिमा न्हाङगर बिमा एस. एल. सि. पिन्बा दुइ ङाम ङाम खाजि । थे जहिलेन ब्यारेकरि खाबारि आताबा ङा बाहिर निबारि आम्याङबा छ्टपटि ताजि । खाइमा थे ङा टिबा ग्लारि, खाइमा गेट बाहिर निसि लोप्जि । ओन्छ्यान थे म्हिसेम ङाला ल्हुइरि परिवर्तन बाजि । जामा थे म्हिसे लासि ङाइ एस.एल.सि. पिन्जि । चुख्रिक दिङ लिच्छा ङाइ थे म्हिदा डान्जि । ङाइ थे म्हि ह्रुप तासाइ आसे । ङाला सेम थेन ल्हुइरि परिवर्तन बाबा म्हिदा सेम तिङ न्हाङग्याम डान्बाला मुला ।
(तामाङ डाजाङ १५५ बो ग्याम्से ।)
तपाईको प्रतिक्रिया दिनुहोस