जापान । जापानला गुन्मा केनरि ‘गिक्छा नेपाल फेस्टिवल गुन्मा– २०२५’ फेस्टिवल गेताङ ताबाकेन मुला । गेताङ सेप्टेम्बर ६ थेन ७ तारेखकुनु तासेला ग्रा मुला ।

जापानरि चिबा नेपालीजुगु गुङरि गिसेमगिरि एकता, समर्पण थेन सांस्कृतिक ङोसेबा सोना लाबा उद्देश्यसे गिक्छा ‘नेपाल फेस्टिवल गुन्मा– २०२५’ संयुक्त लिरि स्हेङ्गे लाबा हिन्ना ।

नेपाल थेन नेपालीला समृद्ध ग्योइ, परम्परा, गोइलो, ग्युइल थेन सारिमठिमदा जापानी सारि उन्सेला चु गेताङ ङ्हीरे दोना ल्होलो गेताङकादे स्होसेला मुला ।

जापानरि मुबा नेपाली कलाकारकादेसे सांस्कृतिक स्याबाकोबा, जातीय झाँकी, साकेला, परम्परागत गोइलो उन्बा, नेपाली चाबास्हकादे, हस्तकला उन्बा थेन नेपालला पर्यटन ल्हेछ्याला बार्बुस्हेजुगु प्रस्तुत लासेला मुला ।

चु फेस्टिबल मनोरन्जनला स्हेग्याम जेक्खे आताना नेपालीला आत्मगौरव, ह्युल ङोसेबा थेन ह्रोगेला प्रतीक दोसेला विश्वास किन्बा मुला ।

चु गेताङ गुन्मा थुमरि मुबा गोर च्युइ सक्रिय नेपाली गेदुङ–गेन्दुन डिक्सि स्हेङ्बा हिन्ना । गेताङ स्हेङ्बा गेन्दुनकादेरि गैर आवासीय नेपाली संघ (ल्च्ल्ब्) जापान गुन्मा, तामाङ समाज किता कान्तो, तमूधी किता कान्तो, मगर संघ गुन्मा क्षेत्रीय समिति, स्याङ्जा समाज किताकान्तो, किरात राई यायोक्खा कान्तो, सिन्धुली समाज जापान, शेपा संघ किता कान्तो, रामेछाप समाज किता कान्तो जापान थेन शेपा संघ जापान मुला ।

(छिगला अर्थः ग्रा– सूचना, ङोसेबा– पहिचान, ग्युइल– कला, सारिमठिम– लोकसंस्कृति, ल्हेछ्या– प्रबर्धन, बार्बुस्हे– सामाग्री, स्हेग्याम– माध्यम, गेदुङ–गेन्दुन–संघसंस्था)