सिन्धुली । ग्युइसेर थुमरि म्राङ्बा दूरदर्शिता, नवप्रवर्तन थेन गुणस्तरीय सुधारला ङोसेबा स्हुग मरिण गाउँपालिका ‘PAN उत्कृष्ट गाउँपालिका पुरस्कार २०८२’ ग्याम डेन तासेला ग्रा मुला । ह्युलनाङ स्थानीय तहला विश्लेषणलिच्छा प्रिन्सिपल एशोसियसन अफ नेपाल (PAN )से मरिणदा बागमती प्रदेशलान उत्कृष्ट गाउँपालिका घोषित लाबा हिन्ना ।

प्रा.डा. विद्यानाथ कोईरालाला चोहोदानरि स्होबा क्योइका समितिसे निर्धारण लाबा २५ वटा शैक्षिक सूचांककादेला दानःरि लाबा क्योइकारि मरिण उल्लेखनीय ङ्हाच्छा ताबा हिन्ना । लोप्खाङ प्रशासन पारदर्शिता, ग्युइसेरला गुणस्तर ल्हेनालाबा, सिर्जनात्मक गेज्यो थेन नेतृत्व क्षमताला सुदृढीकरण चु मुतेबा पक्षरि मरिणला पहलकदमी नोबा क्योइकारि परतिबा हिन्ना ।

डेन स्हुग पिन्बा पुरस्कार चु ड्वाफ्रे २३ गते पोखरारि ङ्योइसाङ लाबा ‘PAN  ङ्हीछा राष्ट्रिय जोम्ना २०८२’ रि पिन्सेला मुला । ‘नेतृत्वला छार परिभाषा : लोप्खाङ उत्कृष्टताला लागि पोबा अगुवाइ’ बिबा मुल नाराला छ्याम तासेला चु जोम्नारि ह्युल नाङ्ला शैक्षिक अगुवा, नीति स्होबा थेन सरोकारवाला बोकिन्सेला मुला ।

गाउँपालिका चोहो ओसेम स्थानीय जनप्रतिनिधिकादेसे चु उपलब्धीदा मुतेबा मरिणरि चिबा साझा प्रयास थेन सफलताला क्रिपला लिरि किन्बा बिसि पाङ्बा मुला । ‘चु जेक्खे डेन आहिन, खाबा रेरि अझ प्रभावकारी शिक्षण लोप्बा थेन समावेशी शैक्षिक विकासला ग्यालामरि ङ्हाच्छा वाङ्बा प्रेरणा हिन्ना ।’ गाउँपालिका चोहो प्रख्यात मुक्तानला सेमताम मुला ।

ग्युइसेररि म्राङ्बा छार सोच, योजनाबद्ध कार्यान्वयन थेन सामुदायिक बोकिन्बाला चु सफल उदाहरणसे ह्युलला स्यान्दो स्थानीय तहदा नोन प्रेरणा पिन्सेला विश्वास लाबा मुला ।

पालिकारि ग्युइसेर गुणस्तर पिन्बारि ह्याङ्ला ऐक्यबद्धता मुला पालिका चोहो प्रख्यात मुक्तानसे बिजि, ‘ह्याङ्से ह्युल्बाला जाजामेदा सामुदायिक लोप्खाङ ग्याम नोन गुणस्तर ग्युइसेर पिन्बारि चुबा मुला ।’

(छिगला अर्थः ग्युइसेर– शिक्षा, ङोसेबा– पहिचान, स्हुग– स्वरुप, ग्रा– सूचना, क्योइका– मूल्याङ्कन, दानः– आधार)