१९८६ एसे ङादा डान्बा जेक्खे आहिन दुइतेन सुताइ लड्तिबारि लोप्जि । थेदुइरि दिङ जाजा, अदम्य जोशला भण्डार मुबा । ङानि तिगाइ स्हे याङ्बा आशारि ङ्ह्योइबा मुबा । थेदुइरि याखारगि गोन्डेङ्बा युङ्बादा नोन ल्हेखाम्ला बिबा आँट थेन जोश ओम बाङ मुबा । १९८६ रि ङान्छे तिगा तिगा आलानि ? तासाइ दुइ थाल्बा थाहान आताबा चिम ।

तिनि न्हाङ्गार बिना बिनान दिङ निजिन्जि । रे ज्याना ज्यानान क्रा सारजिन्जि । दुइ ! एसे म्लेसाइ नोन ङाइ खाराङ्लासि म्लेखाम्ला । थे रेजुगु पल पल खाला डान्बारि । सेमला बोदाइ ब्लाबारि गाह्रो मुला । १९८६ एदा तिगा थाहा ङाइ नाबा स्हेर मर्का, स्हु, लोङ्बा, डोबा ओम लोङ्खेप्बा तिनि दोना नोन आलोन मुला ।

ह्राङ्ला दिम ख्राङ्नाग्याम बिदा किन्सि स्यान्दो ख्राङ्गारि दोगाजि । ह्राङ्लादा क्यारला म्हि ओम क्यारला म्हिदा ह्राङ्ला म्हान्तोबा बाध्यता, खाराङ्बा रिम, खाराङ्बा ठिम ! ह्राङ्ला ख्राङ्गा ख्लाबा स्हेर ओम दोइफिरि सुपारी बिबा ह्राङ चुनोन दुइरि नातोजि चु विकराल, लोङ्खेप्बा रेजुगु । सेमतोजुगुम ल्हामान मुबा । कात्ते क्राजि, कात्ते लोङ्जि । न्हा दिमरि बास न्हा रेला ख्रेन्बा न्हा म्हुनला म्हेर्बा खाराङ्लासि म्लेबारि खाम्ला ओम थे रेजुगु ।

बुम कोशिस लासि म्हाइसि म्हाइसि बाबा रासन नोन खालाइदा ख्रेन्बा म्हाना लाबारि फुल्तोबा बाध्यता । तासाइ थे दुइरि बिसाम लोङ्बा म्हाजिन्बा मुबा । आलोङ्ना क्रेप्सा खिसि ब्राबारि चुजि । दिमला म्राप ठोकठोक लामा च्यातोबा आशासे– म्ल्हा, दाल याङ्ला व्हा लाइनुजुगुला ख्रेन्बा म्हाना लाखाम्ला व्हा बिसिमाम । नाबा दोना नाजि कादे काक्ताजुगु । बिमुलाले ख्रेन्बा ज्याबा कि चाबा ? तासाइ थे रेरि न्हा ख्रेन्बा न्हा चाबा । कात्ते म्हुन चाबा आचानान थाल्जि । ज्यासि बामा, डान्सि बामा ३७÷३८ दिङ वाइजिन्जिम ।

देन्बान ! चुनौतीजुगुला थे ग्यामसे तिनिनोन दाङ्चिबा मुला ।

(छिगकि अर्थः बोदाइ– गाँठो, नाबा– झेल्नु, स्हेर– पीर, सेमतो– चाहना, बुम– लाख, काक्ता– समस्या, दाङ्चिबा– पछ्याइरहेको)

दोःबा : यकिना अगाध