नेपाल तामाङ युवा घेदुङ वि.सं. २०५४ रि स्हेङ्बा हिन्ना । चु गेन्दुन नेपालला ल्होला ग्लारि ठाम्सि चिबा तामाङ जातिला हक, याङ्ताम, ङोसेबा, ग्योइ, धर्म, हिगि, रिमठिम–संस्कृति, गोइलो ओसेम दोङरापदा सोना लासि थान्बान लोकतान्त्रिक साइ तेन्बा थेन ग्याल्साङ अखण्डताला ख्युरछ्यारि समर्पित मुला । आत्मआप्ताला याङ्ताम छ्याम जातीय ओसेम क्षेत्रीय स्वायत्त शासन स्हेङ्बा ह्रेङ्बादृष्टिकोणला छ्याम, लोकतान्त्रिक गणतन्त्रात्मक संरचनाव्हाना समाजदा उन्मुख ताना लाबान ग्यालठिपा, न्होरकि थेन सामाजिक समृद्धिरि तोबा योगदान पिन्बा दोन्तासे चु गेन्दुन स्हेङ्बा हिन्ना ।

गेन्दुन स्हेङ्बाला छ्याम चुसे तामाङ छारिब्योनजुगुदा गिक्खे लाबान ह्राङ्ला सांगठनिक संरचना फेल्सिकेन खाबा मुला । तिनिला मितिदोनारि गेन्दुन नेपालला ३२ जोङ थेन संघीय संरचना आन्सार गोर ब्लि प्रदेश संघीय गेदाछोक ओसेम फिरग्यापह्युल शाखाला छ्याम गोर ब्लि तहरि क्रियाशील मुला ।

महत्वपूर्ण सांगठनिक गतिविधिजुगु थेन छेजोमछेनजुगु :

गिक्छा ग्याल्साङ जोम्नाछेन– वि.सं. २०५४ रि स्हेङ्बा जोम्नाछेन
ङिछा ग्याल्साङ जोम्नाछेन– वि.सं. २०५९ रि उर्लाबारी, मोरङ
सोमछा ग्याल्साङ जोम्नाछेन– वि.सं. २०६३ रि छन्त्याल दिमग्रेन, याम्बु 
ब्लिछा ग्याल्साङ जोम्नाछेन– वि.सं. २०६७ नाम्दुङ २३–२४ रि पर्यटन बोर्ड, याम्बु
ङ्हाछा ग्याल्साङ जोम्नाछेन– वि.सं. २०७१ बेने ९–१० रि याम्बु 
डुछा ग्याल्साङ जोम्नाछेन– वि.सं. २०७६ तापा २८ रि याम्बु 
ङिसछा ग्याल्साङ जोम्नाछेन– वि.सं. २०८१ नाम्दुङ ३० रि नेपाल तामाङ घेदुङ सभा हल, याम्बु ।

गेन्दुनला मूल दोन्ता थेन दृष्टिकोण :

नेपाल तामाङ युवा घेदुङला मुख्य दोन्ता तामाङ छारिब्योनजुगुदा संगठित लाबान थेन्ना याङ्ताम, ङोसेबा, ग्योइ थेन रिमठिमला ख्युरछ्या ओसेम ल्हेछ्या लाबा हिन्ना । संगठनसे सातान ह्राङ्ला विचार, नीति, सिद्धान्त थेन विधिदा ङ्यान्बान ङ्हाच्छा वाङ्चिबा मुला । ओम, चुनोन ग्यामरि निरन्तर अग्रसर तासेला मुला ।

ङान्छे विश्वास लाला कि नेतृत्व तात्कालिक ताला, तासाइ संगठन बिसाम छोन्बो गेन्दुन हिन्ना, थेसे विधि थेन प्रणाली आन्सार निरन्तर गे लाला । संगठन खालाइला व्यक्तिगत सेमतोसे आहिन, सामूहिक सोच, बोकिन्बा थेन विधिला बाङरि चलतिबा हिन्ना । थेतासि संगठनफिरि प्रतिबद्ध मोक्कोन ह्रोमिजुगुसे दूरदर्शी सोच थान्सि संगठनदा कोङ्ना लाबारि तोबा भूमिका निर्वाह लातोला ।

लिच्छाला सन्देश :

ह्याङ्ला संगठन ह्याङ्ला हक, याङ्ताम थेन ङोसेबाला प्रतीक हिन्ना । दाते ह्याङ तिगाइ हददोना रक्षात्मक नाछालरि दोबा मुला । चुला जिम्मेवारी नोन ह्याङ फिरिन परतिला । गेन्दुनरि माङग्यारला तिगाइ व्यक्तिजुगु गेन्दुनदा कमजोर ताना लाबा प्रयासरि मुला । थेन्ना भ्रमपूर्ण प्रभावरि परतिसि गेन्दुनला विधि–विधान म्लेला आदे । मोक्कोन ह्रोमिजुगुदा म्होइजेन मुल– गेन्दुनला हितला लागि गिक्खे ताइ, अनुशासित तोसोसे ङ्हाच्छा वाङ्गे ओसेम ह्राङ्ला भूमिकादा जिम्मेवारीला छ्याम पूरा लाइ ।

(बिलाम मुक्तान, नेपाल तामाङ युवा घेदुङ संघीयला ग्रेन्पो ग्रोइपा हिन्ना ।)

(छिगकि दोनः ङोसेबा– परिचय/पहिचान, गेन्दुन– संस्था, याङ्ताम– अधिकार, हिगि– अक्षर/लिपी, साइ– मूल्य, तेन्बा– मान्यता, ग्याल्साङ– राष्ट्रिय, ख्युरछ्या– संरक्षण, आप्ता– निर्णय, व्हाना– तर्फ, ग्यालठिपा– राजनीतिक, न्होरकि– आर्थिक, दोन्ता– उद्देश्य, गेदाछोक– कार्यसमिति, छेजोमछेन– महाधिवेशन, जोम्नाछेन– सम्मेलन, बेने– फागुन, तापा– पुस, नाम्दुङ– चैत, ल्हेछ्या– प्रबर्धन, सेमतो– चाहना, ह्रोमि– सदस्य, नाछाल– अवस्था, म्होइजेन– अनुरोध, ग्रेन्पो– प्रमुख, ग्रोइपा– सल्लाहकार)