दिनिदा न्हुपला क्षितिजसे गाङ्साल ग्लोङ्जिन्बा मुबा । अड्डा–अदालत, सरकारी–गैरसरकारी गेदिम डुङ्सि म्हिकादे ह्राङ्ह्राङ्ला चिबाग्लारिक्यार दोसिमाम निबाकेन लाबा प्रष्ट म्राङ्मुबा । थारेङ थारेङ दोबा पक्षिकादे फ्किदोसि खाबाकेन मुबा ह्राङ्ह्राङ्ला जाङरि । ठिक चुनोन दुइदा ज्याबा साइत म्हान्सि बिपना ङेङ्गोरला डेरा मुबा ख्यास्योरग्याम चाबहिल–गौशाला तासि पशुपतिनाथला मोलम थोसि बागमती थासि त्रिभुवन स्यानह्युल विमानस्थल दोबारि निबाकेन मुबा ।

आपा आमा ओम आले मुबा बिपनाला छ्यामरि एयरपोर्टरि बिदाइ लाबाला लागि । बिपना दिमला ग्रेन जामे । ल्हानान ग्रेन जिम्मेवार मुबा थेफिरि । आले जाजान, आपा आमा गाङ्जोरि दोबा लानि ह्राङ्बान । क्यार स्यारला बिकट नाम्साग्याम फाप्बा बिपना निम्न मध्यम वर्गला दिमम्हेग्याम छार्बा मुबा । थारेङ्ला फिरग्यापह्युलरि ल्हानान धन छाबारि आपा आमादा ताङ्ना लासि थान्बा म्हाङ थोसि थेसे ह्राङ्तेन तिगाइ थान लेहङ्गा थेन पटियाला कुर्था सुरुवाल छ्यामरि तिगाइ थान पाते, सिन्की, ह्रोबा माकाइ, मोठेला पोरे ओम आमाला चेगाइसे प्लिङ्बा जाजाबा सुट्केश मुबा । यारि पासपोर्ट ओम डकुमेन्टसे प्लिङ्बा जाजाबा फाईल । नाप्ले नाफिला क्वारक्वारबा ङ्होरि दहीरि ज्योप्बा तार म्ल्हाला टिका । खारेरि गोर सो ब्लि थान खादा । वाङ्बा गेटरि लाईन चिजि ।

तिगाइ दुइरि सा ख्लासि मुला ग्यालाम तासि थारेङ दोसेला मुला जामे बिबा स्हुसे गाङफिरि दोबा लानिह्राङ्बा बिपनाला आमा कुटिसि जामेदा च्याचिजि । नांके गाङ्ला क्याम्साङ–जासामला व्हान फ्योरफ्योर बाम्बा मुला मिख्लिसे । ब्योङ्बाकेन लाबा मिख्लिला होनसे ग्राम्बाला च्युम्बिर ताजिन्बा व्हानकादे प्लिङ््सि थेनआताना ब्रेचिबा मुला । कामसिङ्ला ग्यालाम तासिकेन !

बिपना ल्हिबा सेम थोसि एयरपोर्ट न्हाङरि वाङ्जि । दुइरिन बोर्डिङपास किन्सि लातोबा अध्यागमनला गे जिन्ना लासि लिच्छाला ब्रान्बा ग्लारि दोसि ब्रान्चिजि प्लेन फ्याङ्बा दुइ । कतार एयरबसला बोर्डिङ गेट ठ्वाङ्जि । बोर्डिङपास उन्सि बिपना इकोनोमिक क्लासला ह्राङ्ला सिटरि निसि चिजि । ङ्हाच्छारेम फ्याङ्बाकेन मुला बिपना हवाइजहाजरि । रंगीचंगी ल्हानान म्हाङ्कादे स्याम्सि । ल्हाम्पाकादेला दिमला म्रापछाङहेन्से थोन्बा ग्यामकादे फेबा फेबा तासाइ नोन दोखाङ ल्हानाह्राङ्बाला छ्योआछ्यो ओस्बा ओस्बान मुला बिपनाला ह्राङ्बान । छोन लि फेबा फेबा म्राङ्साइ नोन क्योङ्ला म्हाङकादे ओस्बोन फिरग्यापह्युल रोजगारीग्याम तिलाइ न्होर छासि केवादा देबाः स्होबा ।

पौंने ५ घन्टाला फ्याङ्बालिच्छा प्लेन ल्याण्ड लाजि हमाद इन्टरनेशनल एयरपोर्ट कताररि । ल्हाम छ्योबा आरे बिपनाला । लेङ्बा मुला दातेइ साइप्रसदोना दोबा ल्हाम । एयरपोर्टरि ह्रोलाबा ह्रोपाग्याम बोर्डिङ गेट पत्ता ल्हागाब लासि ङ्हीछा दोखाङ दोबा फ्लाइटला दुइ ब्रान्सि चिजि ।

ब्रान्बा दुइ जिन्जि । दुइरिन ह्राङ्ला सिटरि दोजि । आतुर सेमला ह्योङ्ह्योङदा सान्त्वना पिन्बाकेन लामा फ्लाइटसे टेकअप लाजि कतार एयरपोर्टग्याम साइप्रसला लार्नाला एयरपोर्ट दोबारि । चु रेमला फ्लाइट आउदिन फेबा मुबा दोलोला बिमा नेपाली गिक्खे बिपनाजे लेङ्जि, स्यान्दो ह्युलला मुबा ल्हाम्पा । छ्योआछ्यो ४ घन्टाला फ्याङ्बा लिच्छा दोजि लार्नाला एयरपोर्ट । अध्यागमनला सरकारी गेदोइ जिन्ना लासि बिपना गोल्छेसे ल्हाम्पा रिसिभ लाबा ग्लारि दोजि ।

थेरि याखारगि अधबैंसे स्मार्ट म्रिङ्कोला बिपना ब्रिबा प्लेकार्ड थोसि राप्चिबा मुबा ।

बिपनासे देबाःन लासि अनुमान लाजि थे मिन ङालान हिन्ना बिबा तामला ।

‘हाइ आई एम मारिया... ।’

‘यु आर बिपना !’

‘एस आइ एम बिपना !’ बिपनासे पाङ्जि ।

‘नाइस टु मिट यु !’ बिसिमाम मारियासे वेलकम टु साइप्रस बिजि ।

‘थ्याङ्क यु...’ बिसिमाम बिपना ल्हागतिजि थेला लिच्छा लिच्छा । निरीह म्हेलाकोला सुधी माली म्हेला लिच्छा ल्हागाब तामाह्राङ लासि ।

थे म्रिङ्कोला साइप्रसला एजेण्ड । बिपनादा थोसि छ्योआछ्यो घन्टा गिला ड्राइभलिच्छा लिमासोल सहररि मुबा थेला गेदिमरि दोना लाजि । तिक्खुरि मेडिकल चेक लाजि । इम्प्लोयरदा ङ्योइसि जिम्मा ल्हागाब लाजि बिपनादा । बिपना लिमासोया भिलेजला याखारगि आधुनिक भिल्लारि घरेलु गेलाबा गेनामला लिरि वाङ्ला । चुह्राङ्लासि दिङ ङ्हीसे डु ला ङ्हाच्छा साइप्रस दोगाबा मुबा साइप्रस ।

भु–मध्ये सागरला म्हि चिबा थुमकादे सिशिलि, सार्डिनियालिच्छाला ग्रेन थुम हिन्ना साइप्रस । पर्यटकला लागि ज्याबा दोखाङ साइप्रस थुम तिगाइ दिङहेन्से रोजगारला दाम्बारि परतिबा ह्युल हिन्ना । ह्याङ नेपालीकादेला लागि । विशेष लासि दिमला गेदोइ, केयर टेकर ओम तिगाइ जेक्खेरि सुसिसेफला छ्याम फार्मिङला लागि डिमान्ड खाला नेपालरि ।

सन् १९६० रि ब्रिटिस उपनिवेशग्याम मुक्त तासि ह्राङ्बाङ गणराज्य दोबा साइप्रस सन् २००४ रि युरोपियन युनियनरि बोकिन्बासे युरोपेली ह्युल बिसि ङोसेला । १०–१२ बुम ह्युल्बासंख्या मुबा जेबा ह्युल साइप्रस । नेपालहेन्से नेपालीकादे महंगो न्होर फासि खाबा ताला । युरोपेली ह्युलला म्हाङ उन्सि पुइगाबा ताला एजेन्डकादेसे । युरोपेली पिआर याङ्बा ! सुरक्षित सुनिश्चित लिउला म्हाङ स्याम्सि ।

बिपना थे नेपाली गुङ्ला गिक्खे पात्र । याखारगि बिम्ब जेक्खे हिन्ना । थे ह्राङ्ला दिङ बिमा ल्हिबा जिम्मेवारीला दोइ पुइसि खाबा साइप्रस । छुगनिना फासिमाम खाबा मुला दस्तुर म्हि लिलाम लाबा म्यान पावर कम्पनीदा । साँवाला बिमा ब्याजसे ट्वाइबा पोरसे आज्याना लासि स्हुखाना लाबा मुला । कलिलो बिपनाला केवादा । दिङ ङ्ही सोम गेलामा छाबा न्होरसे दोप्ता ग्याम किन्बा छे फाबारि खाम्बा आरे । आपाआमाला म्हाङ ओम ह्राङ्ला सेमसे म्हान्बास्हे याखारगि ह्युलला राप दोबा मुला ।

केबाग्ला हेन्से तोङ्जा माइल थारेङला सादा कर्मसा स्होसि ब्राबा मुला केवासे स्होबा ग्यालामरि । योनान गेतेन रेबा लाला ङ्यासे गेतेन म्हेर्बा लाला । नाबा दुइरि ब्लाप्बा न्हाबाला बो आज्याबा छेर्बा काइरि ज्याबा उपहार याङ्बा लाला इम्प्लोएयरला । 

‘ङाइ एदा ग्लुसि बाबा हिन्ना । ङादा एला ल्हुइथाङ्ला बिमा गेला पर्वाह मुला ।’ स्यान्दो दुइरि बिमा सेममि थेदुइरि स्हुखाला । दिमरि न्हाबा जनावर नाकि, तावार नामा दिमरिन भेटनरी डाक्टर खासि क्योन्ना तासाइ सोमछा ह्युलला गेनाम बिरामी तामा तिगादाम्मान तासाइ पेन किलर पिन्सि गेरि ल्हागाब लामा सेम क्युइला ।

मध्य समर सिजन । लाह्राङ् छोर्बा ह्रेङ्बा रे । खाडी ह्युलरि ह्राङ्बान छाबा छेप्बा । उराठ छोर्बा वातावरण । बिपनाला केवाह्राङ्बान । ङ्यासेदुइरि माउन्ट ओलोम्पिया (ट्रोडोस) गाङ्ला क्रिपसे लिमासोया नाम्साखा रिलख्वाइबा मुला । लेडि स्माइल गुङ उर छोनसे च्युर्बा आङ्सि ह्राङ म्राङ्ला ।

ब्लाप्दा नोन ब्लाप्ना लासि गेल्बा ल्हुइ थोसि बिपना ह्राङ्लान थोप्साङतेन ङ्योइला । बाल्कोनिरि चिसि ह्राङ्से ह्राङ्दान । तिगा चुनोन हिन्ना ङाइ म्राङ्बा म्हाङ ? तिगा चुह्राङ्लासि छ्योना लाबारि खाम्ला आपाआमासे सेमसे म्हान्बा ? तिगा चुह्राङ्लासि ङाइ आलेला जिम्मेवारी छ्योना लाबारि खाम्ला ! चुह्राङ्बा चुह्राङ्बान सेमरि थोन्बा निसाल आरेबा ङ्योइबाकादेला सामना लासिकेन थे ङ्हाउरि फ्लिकदोसि निबारि विवश ताला ।

याम्बुरि मुबा म्यानपावर अफिस । म्यानपावर निमा निमा डेबा स्होन्बो डान्ला । गोर सोम ब्लि ल्हे मुबा म्यानपावर संचालक सुटेट बुटेट ह्रोम्बोरछेला म्हेन्दोबुट्टे स्क्रीपटेट ताम डान्ना । साइप्रस युुरोपेली ह्युल । म्हान्बातेबा छाबारि खाम्बा । तिगाइ दुइ न्हाङरि पिआर याङ्बा । देबाः लासि फ्युक्पो युरोपेली ह्युलरिक्यार निबारि याङ्बा । ल्होलो ल्होलो... ।

डान्बाला जाम्बुलिङग्याम फेदछोर्मा बिपना ङोन्छाङ काम्बा यथार्थकादे ङिच्च स्वा उन्सि ङेचिबा याङ्ला । काक्तातेन ब्रेसि लानोन दाङ्से ह्राङ्बा आत्महत्या लाबा नेपाली जा जामेला काम्बा राप डान्ना । नेपालरि दोसि खाबारि हस्पिटलला डि फ्रिजरि गोङ्चिबा नेपाली जा जामेला छेन्देफिरि गोबारि सेम खाला । डिप्रेशन थेन एनजाईटिसे हाप्बा ह्रोकादेसे फेसबुक वालरि ब्रिबा स्टाटससे चोननिना लाला । स्यान्दोला ह्युलला म्हिसे लाबा एग्रीमेन्टरि पेपररि ब्रिबा सम्झौताकादे पेपररिन सिमित ताबा म्राङ्मा । निर्वाचनरि भोट पिन्सि डाबा नेताला लि डान्सि थेला लि प्लिबा सेम खाला बिपनादा ।

अपवादरि परतिसि सिमित प्रतिशतला केवा रोबा मुसिम ! सार्बा मुसिम फिरग्यापह्युलरि ह्याङ नेपालीला । ल्हानाह्राङ्बा राप स्हेर मुला ओस्बान बिपनाला ह्राङ्बान । बिबाम बिला क्योङ्से केवा संघर्ष हिन्ना । तासाइ संघर्ष लानालाना आछ्योबा म्हाङ्कादे सेमला मुरि मुबा खासुतेन फ्याङ्सि बर्खा दोसि गोर ङ्ही मिला ग्यालाम तासिकेन ताइचिबा मुला बिपनाजुगुला उदास केवाला मिग्याम फोसिमाम ।

लिमासोल, साईप्रस ।

(छिगला अर्थः खास्योर– बौद्ध, स्यानह्युल– अन्र्राष्ट्रिय, छाबा– कमाउनु, चेगाइ– माया, नाप्ले– थेप्चो, व्हान– खोल्ची, फ्योरफ्योर– लपक्क, होन– भल/बाढी, च्युकुर/च्युम्बिरः चाउरि, ब्रेचिबा– चुहिरहेको, स्याम्बा– सजाउनु, ल्हाम्पा– यात्री/यात्रु, दोखाङ– लक्ष्य, न्होर– आर्थिक, केवा– जीवन, देबाः– सजिलो, ह्रोपा– सहयोगी, ह्योङह्योङ– हलचल, गेदोइ– कामकाज, थुम– टापु, ह्राङ्बाङ– स्वतन्त्र, बुम– लाख, लिउ– भविष्य, छुगनिना– मज्जाले, नाबा– बिरामी, ल्हुइथाङ– स्वास्थ्य, गेल्बा– गल्नु, थोप्साङ– भाग्य, ङ्हाउ– विगत, जाम्बुलिङ– संसार, फ्युक्पो– धनी, गोङ्बा– कक्रिनु, छेन्दे– लास)

दोःबा : यकिना अगाध