चुह्राङ्बा ताजि कि भारतरि विकासला गेताङ स्याङचिबा मुबा । याखारगि ग्यालाम ख्वाजि थेसे रुङ्बा ह्रिदा बो ङ्हीरि फेपिन्जि । ज्याङरिक्यारला ह्रिरि सिंहकादे चिबारि चुजि ओम न्हुपरिक्यारला ह्रिरि ल्हुन्दिकादे ।
तिरेकुनु ल्हुन्दिला दरबारी ग्रोइपासे बिजि, ‘ह्रेम्बोरछे ! ह्राङ्नोन चु ह्रिला ग्ले दोस्ह्युगो !’
लुन्दिसे पाङ्जि, ‘सिंह ह्राङ सिकारी दोबा थेन ह्रिरि स्यान्दोदा तहरि थान्सि शासन लाबारि ङादा आहा ।’
ह्रो–ग्रोइपाकादेसे ग्रोइ पिन्जि, ‘ह्राङ ज्याङरिक्यारला ह्रिरि ब्रास्ह्युगो ओम सिंहतेन ह्रिला ग्ले दोबा मुतेबा गुरुङा लोप्सि जोन्खाउ ।’
ल्हुन्दि लोङ्सि लोङ्सि ज्याङरिक्यारला ह्रिरि दोजि ओम सिंहतेन फ्यास्हिङ लाजि, ‘महाराज ! न्हुरिक्यारला ह्रिरि खाजिबाइ सिंह ग्ले आरे । चोदे ह्राङ्ला अनुमति याङ्साम ङा थेर्ला ग्ले दोबारि खाम्ला ।’
सिंहसे बिजि, ‘दोगो ले, ङादा तिगाइ आपत्ति आरे ।’
ल्हुन्दिसे बिजि, ‘तासाइ ह्रेम्बोरछे ! ङादा ग्ले दोबा तोसो थेन सिकार लामा नियम लोप्सि पिनस्ह्युगो ।’
सिंह तयार ताजि । थेसे लोप्बारि चुजि–‘च्यागो । ङाला ल्हुइ स्योनह्रेङ्जि ?’
‘हिन्ना, ह्रेम्बोरछे ! स्योनह्रेङ्जि ।’
‘ङाला सुङरे ठाडो ताजि ?’
‘ह्रेम्बोरछे ! ताजि ।’
‘ङाला मे कोल्ठेङ ताबारि चुजि ?’
‘ह्रेम्बोरछेला मे कोल्ठेङ ताबारि चुजि ।’
थेनोन दुइरि सिंहसे ङोन्छाङ ब्राचिबा ह्रिड्वाफिरि आक्रमण लाजि ओम थेदा सेसिन ख्लाजि ।
ल्हुन्दि फ्लिकदोसि ह्राङ्ला ह्रिरि निजि । थेसे ग्ले दोबा घोषणा लाबारि जोम्नाला ङ्योइसाङ लाजि । सिंहह्राङ्बा सिकार लाबा तयारी नोन लाजि । मुतेबा दरबारी थेन चापलुसकादे पोप ताजि ।
ल्हुन्दिसे ङ्योइजि, ‘च्यागो । ङाला ल्हुइ स्योनह्रेङ्जि ?’
‘हिन्ना, ह्रेम्बोरछे ! स्योनह्रेङ्जि ।’
‘ङाला सुङरे ठाडो ताजि ?’
‘ह्रेम्बोरछे ! ताजि ।’
‘ङाला मे कोल्ठेङ ताबारि चुजि ?’
‘ह्रेम्बोरछेला मे कोल्ठेङ ताबारि चुजि ।’
थेनोन दुइरि ल्हुन्दिसे सिंहसे ह्राङ्नोन ङ्हार्सि ङोन्छाङ रापचिबा ह्रिड्वाफिरि आक्रमण लाजि । थेलिच्छा तिगा ताजि बिसाम– ह्रिड्वाला छ्यार्बा स्वाकादेसे ल्हुन्दिला फो क्लेपिन्जि ।
ल्हुन्दि कास्याल तासि थेरिन गुर्जि ।
स्यान्दोकादेसे ङ्योइजि, ‘सरकार ! तिगा ताजि चुह्राङ्बा ?’
थे ल्हुन्दिसे क्रिङ्सिकेन निसाल पिन्जि, ‘ङादा ङालान ह्रोकादेसे सेजि... ।’
(छिगला अर्थः ग्रोइपा– सल्लाहकार, ग्रोइ– सल्लाह, गुरुङा– गुरुमन्त्र, फ्यास्हिङ– बिन्ति, निसाल– उत्तर)
(‘महफिल’ ग्याम)
दोःबा : यकिना अगाध
ब्रिखेनला ङोसेबा :
मुल मिन : कलेश्वर प्रसाद सक्सेना, केबा– १ जनवरी १९३२, मैनपुरी, उत्तर प्रदेश । डोङ्बाः १ जनवरी २००७, फरीदाबाद, हरियाणा ।
कमलेश्वर ‘छार राप आन्दोलन’ला प्रचारित त्रिकोणला याखारगि महत्वपुर्ण कडी मुबा । छार रापला चु त्रिकोणरि राजेन्द्र यादव, मोहन राकेश थेन कमलेश्वर मुला । थे सोम नोन ब्रिखेन गुङला जेक्खे कमलेश्वर चुह्राङ्बा म्हि मुबा थेसे ह्राङ्दा राप थेन ग्रेनरापजुगुरि जेक्खे सीमित आथान्नि ।
थे सरकारी सेवारि नोन वाङ्जि ओम दुरदर्शनला ग्रेनकाठाक्पा (महानिर्देशक) सुताइ दोजि । थेसे सिनेमा थुमरि स्क्रिप्ट थेन संवाद ब्रिबाला लिरि बोकिन्सि मिन थेन न्होर ङ्ही नोन छाजि । थेनोन गुङरि नइ कहानियाँ, सारिका, गंगा थेन रेदाङ्सेला जागरण स्योस्योला डिक्खेन दोसि स्योनाम थेन ग्योइकाइला थुमरि छ्याम नोन नुप्बा सम्बन्ध थान्जि ।
तपाईको प्रतिक्रिया दिनुहोस