युके १५ जुलाई । बेलायतरि मुबा तामाङजुगुला गोरङ्हा गेन्दुनजुगु डिक्सि हरिसिंह वाईबाला चोहोदानरि ‘तामाङ घेदुङ युके’ला तदर्थ समिति स्होबा मुला । १५ जुलाई २०२५ ला दिनिरे बेलायतला अल्डरसटरि बागमती प्रदेशला मुख्यलोन्पो बहादुरसिंह लामाला डोनग्रेन्पोरि ताबा जोम्नासे तामाङ समुदायला लागि ऐतिहासिक सहमति लाबा हिन्ना ।

डोनग्रेन्पो मुख्यलोन्पो लामासे फिरग्याप ह्युलरि चिसि समाजला गेलाबारि आउदिन चुनाउती तासाइ नोन चुह्राङ्ला एकता तासि तामाङकादेसे ह्राङ्ला समुदायला लागि गेलाबा ग्रान लाबा म्राङ्मा ह्राङ्दा गर्व छोर्बा पाङ्जि ।

थेसे फिरग्याप ह्युलरि म्राङ्बा चुह्राङ्बा एकतासे ह्युलला गेन्दुनकादेदा नोन प्रेरणा पिन्सिेला विश्वास थान्जि । ‘ह्राङ्निला एकतासे बेलायतला खाबा पुस्तासे याखारगि संगठित, सुसंस्कृत थेन कोङ्बा ङोसेबा थोबा तामाङ समाज याङ्सेला विश्वास ङाइ किन्बा मुला ।’ मुख्यलोन्पो लामासे पाङ्जि ।

बेलयतरि सक्रिय ल्हो म्हेन्दो समाज– लण्डन, तामाङ समाज– युके, म्हेन्दो माया समाज– युके, तामाङ घेदुङ– रिडिङ थेन तामाङ ह्युल्बा– केन्ट गुङरि एकता ताबा हिन्ना । एकता तासि स्होबा तामाङ घेदुङ युकेसे तामाङला ग्योइ, रिमठिम थेन सभ्यता ख्युरछ्या लाबा कोङ्बा संकल्प लाबा मुला ।

हरिसिंह वाईबाला चोहोदानरि २५ ह्रोमि मुबा तदर्थ समितिरि स्यानचोहोजुगुरि उदय कुमार घिसिङ, कुमार स्याङदान, आइतसिंह मम्बा, अनिश वाइबा थेन गोपाल तामाङ मुला ।

तदर्थ समितिला ग्रेनगाउराइरि बम ब्लेन्देन, गाउराइरि विशाल स्याङ्बो, छ्यागाउराइजुगुरि धनकुमार तामाङ, जय लोप्चन थेन करिना तामाङ मुला । न्होरचोहोरि दावा स्याङ्बो थेन छ्यान्होरचोहोरिजुगुरि मानु लामा, विपना तामाङ, दल ब्लेन्देन थेन लाखमान पाख्रिन मुला ।

तदर्थ समितिला केन्द्रीय ह्रोम्हिजुगुरि सुवास लामा, गोल तामाङ, मनु तामाङ, शेर पाख्रिन, रेशम स्याङबो, सुसा पन्नाचन तामाङ, शान्तीय सेन्देन, जयमान तामाङ थेन रोज लामा मुला ।

जोम्नासे प्रेम लामा घिसिङला थुछाप्बारि ७ ह्रोमि विधान मस्यौदा समिति स्होबा मुला । समितिला ह्रोमिजुगुरि बुद्दि लामा, लक्ष्मी घिसिङ, पूर्ण पाख्रिन, फौदसिंह लामा, जयमान तामाङ थेन राजन योन्जन मुला ।

समितिला ग्रोइपाजुगुरि लक्ष्मी घिसिङ, धन पाख्रिन, तुल लोप्चन, प्रेमलाल घिसिङ, फौद सिंह लामा, विशाल मोक्तान, राजन योञ्जन, कविराज घिसिङ, सूर्य लोप्चन, बुद्दि घिसिङ थेन हर्क योञ्जन मुला ।

चु गेन्दुनसे गेन्दुनगत एकतादा झन कोङ्बा स्होबा थेन तामाङ ङोसेबादा स्यानह्युल स्तररि ल्हेना लाबा दोखाङ किन्बा मुला ।

२७ दिङहेन्से बेलायतरि चिसिकेन खाबा गोर्खा भेट्रान लक्ष्मी घिसिङसे निबा १०÷१२ दिङहेन्से मुतेबा गेदुङ–गेन्दुङ गिक्खे ताबा च्याबा सेम थोबा ताम थान्जि । ‘चु एकतासे ङादा ताङ्बा खाजि । गर्वसे ङाला तिङ ब्लाक्पा मुला ।’ थेसे बिजि ।

गेताङला संचालन तामाङ घेदुङला केन्द्रीय तदर्थ समितिला गाउराइ विशाल स्याङ्बोसे लाबा मुबा । गेताङरि उदयकुमार घिसिङ थेन फौद सिंह लामासे डेन सेमताम थान्बा मुबा ।

(छिगला अर्थः दिनिरे– आईतबार, गेन्दुन– संस्था, डोनग्रेन्पो– प्रमुख अतिथि, जोम्ना– सभा, ख्युरछ्या– संरक्षण, ह्रोमि– सदस्य, स्यानचोहो– उपाध्यक्ष, छ्यागाउराइ– सहसचिव, छ्यान्होरचोहो– सहकोषाध्यक्ष, थुछाप्बा– संयोजकत्व, ग्रोइपा– सल्लाहकार, ङोसेबा– पहिचान, स्यानह्युल– अन्तर्राष्ट्रिय)