सिन्धुपाल्चोक ११ तापा । पाख्रिन तामाङ समाज केन्द्रीय गेदाछोकला सोमछा जेछोम पाँचपोखरी थाङ्पाल गाउँपालिका ४ थाङ्पालकोटरि ताबा मुला । गेताङ समाजला ग्रोइपा, ह्युलठिमजोम्बा ह्रोमि ओसेम ङ्हाच्छाला ब्लोन दिलमान पाख्रिनला ग्रेनडोन्बोरि ताबा मुबा । गेताङला ठ्वाङ्सेन लाबान ग्रेनडोन्बो पाख्रिनसे बिजि, ‘पाख्रिन वंश याखारगि ह्रुइ जेक्खे आताना तामाङ समुदायला सभ्यता, रिमठिम थेन दोङराप थोबा  गौरवपूर्ण ङोसेबा हिन्ना ।’

पाख्रिनला फोला, बाप्सा, ठुङ्सा थेन वंशावलीला वैज्ञानिक थेन दोङरापकि म्हाइबा अनुसन्धान लातोबा धारणा थान्बान थेसे ह्राङ्ला दोङराप आसेबा समुदायसे लिउला ग्यालाम दाङ्बारि आखाम्सेला सेमताम थान्जि । थेसे जाम्बुलिङनाङ ठाम्सि चिबा पाख्रिन वंशजजुगुदा एकताला सूत्ररि खिबान ग्युइसेर, रिमठिम थेन सामाजिक नेतृत्वरि ङ्हाच्छा वाङ्बारि म्होइजेन लाजि ।

गेताङरि नेपाल सरकारला ङ्हाच्छाला गाउराइ धनबहादुर पाख्रिनसे समाजदा भावनात्मक जेक्खे आताना गेन्दुनकि स्ह्रुगरि कोङ्ना लातोबा पाङ्जि । नीति, योजना थेन टुबा दुइदोनाला सोचला छ्याम ङ्हाच्छा वाङ्साम समाजसे ग्याल्साङ तहरि प्रभावशाली भूमिका क्लाङ्बारि खाम्सेला धारणा थान्जि ।

पाँचपोखरी गाउँपालिका चोहो टासी लामासे पाख्रिन समाजसे वंशला ङोसेबा, दोङराप, रिमठिम थेन सम्पदाला ख्युरछ्याला लागि स्थानीय सरकारला व्हनाग्याम तोबा ह्रो लासेला प्रतिबद्धता उन्पाङ्जि ।

ककनी गाउँपालिका चोहो सुमन पाख्रिन तामाङसे ह्राङ्ला मौलिक रिमठिम, धार्मिक परम्परा थेन दोङारापकि दस्तावेजजुगुदा डिछ्याना स्ह्रुगरि ख्युरछ्या थेन अभिलेखीकरण लातोबारि बाङ पिन्जि । ‘चु गेला लागि ङाइ खाम्तेबा ह्रो लासेला मुला ।’ थेसे पाङ्जि ।

ब्रिखेन रबिन्द्र तामाङसे पाख्रिन वंशला ठुङ्सा, बाप्सा ल्हेबा थेन सामाजिक संरचनाफिरि अनुसन्धान काप्तोबा उल्लेख लाबान पाङ्जि, ‘दोङराप ब्रिबा जेक्खे आहिन, प्रमाणला छ्याम डिजिलाईजेशन लासि पुस्तान्तरण लाबाचा महत्वपूर्ण गे हिन्ना ।’

गेताङरि लिखु तामाकोशी गाउँपालिकाला स्यानचोहो दिपा पाख्रीन, गोले समाजला चोहो थेन घिसिङ समाजला ग्रेनगाउराइ ओसेम समाजला अग्रज ब्यक्तित्वजुगुसे बोकिन्बा मुबा ।

पाख्रिन तामाङ समाजला चोहो शुक्र पाख्रिनला चोहोदानरि ताबा सोमछा छेजोमसे छिरिङ दोर्जे पाख्रिन (मकवानपुर)ला चोहोरि छार गेदाछोक स्होबा मुला ।

गेदाछोकला स्यानचोहोरि ज्ञानबहादुर पाख्रिन (चितवन), बशन्ती पाख्रिन (दोलखा) मुला बिसाम कोशी प्रदेशग्याम लिच्छा मनोनित लासेला मुला ।

ग्रेनगाउराइरि हिमाल पाख्रिन (सिन्धुपाल्चोक), गाउराइरिजुगुरि दिपा पाख्रिन (रामेछाप), प्रतीक पाख्रिन (काभ्रे) थेन पल्लब पाख्रिन (रामेछाप) मुला बिसाम न्होरचोहोरि तेन्जिङ पाल्दोन पाख्रिन (तनहु) मुला ।

गेदाछोकला ह्रोमिजुगुरि प्रताब पाख्रिन (पर्सा), केवल पाख्रिन (ईलाम), बुद्व पाख्रिन (काभ्रे), सन्चवीर पाख्रिन (सिन्धुपाल्चोक), हितबहादुर पाख्रिन (सिन्धुपाल्चोक),  जंगबहादुर पाख्रिन (सिन्धुपाल्चोक), जीवन पाख्रिन (काभ्रे), जितबहादुर तामाङ (दोलखा), मकल पाख्रिन (दोलखा), दिलबहादुर तामाङ (मोरङ), सुब्बालाल तामाङ –चितवन) मुला ।

चुह्राङ्नोन लासि चोचल राज पाख्रिन (सिन्धुली), किसोर पाख्रिन (याम्बु),  रत्न तामाङ (नुवाकोट),  चक्र पाख्रिन (नुवाकोट), हस्त पाख्रिन (सुनसरी), सोनम पाख्रिन (सिन्धुपाल्चोक), सोम्फे पाख्रिन (याम्बु), सुवास पाख्रिन –झापा), पवन पाख्रिन (रामेछाप), हर्क पाख्रिन (सुनसरी) मुला ।

छेजोमसे पाख्रिन समाजदा एकीकृत लाबान ङोसेबा, अनुसन्धान थेन नेतृत्व फेल्गेबाग्याम समाजदा अग्रणी ग्लारि दोना लाबा संकल्प किन्बा मुला ।

(छिगकि दोनः छेजोम– अधिवेशन, ह्युलठिमजोम्बा– संविधानसभा, ह्रोमि– सदस्य, ब्लोन– मन्त्री, गेदाछोक– कार्यसमिति, तापा– पुस, दोङरापकि– ऐतिहासिक, लिउ– भविष्य, दाङ्बारि– पहिल्याउन, ग्युइसेर– शिक्षा, गेन्दुनकि– संस्थागत, स्ह्रुग– रुप, ख्युरछ्या– संरक्षण, व्हना– तर्फ, उन्पाङ्बा– जनाए, डिछ्याना– व्यवस्थित, बाप्सा ल्हेबा– बसाइँ सराइ, स्यानचोहो– उपाध्यक्ष, फेल्गेबा– विकास)