सिन्धुपाल्चोक ३० तापा । मेलम्ची नगरपालिकाला नगरजोम्बाला १९ छा छेजोम नगरग्रेन्पो आइतमान तामाङला चोहोदानरि ताबा मुला । छेजोमसे नगरला मुतेबा फेल्गेबा, सुशासन ओसेम वित्तीय अनुशासनदा कोङ्ना लाबा दोन्ताला छ्याम तोबा ऐनजुगु डिक्लाबान १४ गोर महत्वपूर्ण प्रस्तावजुगु क्योङ्डिक्सि पारित लाबा मुला ।
जोम्बाग्याम न्होरकि दाछोकला थुछापा किरणदीप खड्कासे पेस लाबा न्होरकि कार्यविधि ओसेम वित्तीय उत्तरदायित्व ब्रेल्चिबा डिछ्या लाबारि स्होबा ऐन २०७५ ला प्रतिस्थापन विधेयक २०८२ थेन मेलम्ची नगरपालिकाला विज्ञापन (डिछ्याबा ओसेम नियमन) ब्रेल्बारि डिछ्या लाबारि स्होबा विधेयक २०८२ ओसेम स्यानग्रेन्पो उमा प्रधानसे पेस लाबा न्होरकि दिङ २०८२÷८३ ला विनियोजन ऐन डिक्लाबा विधेयक २०८२ क्योङ्डिक्सि पारित लाबा मुबा । जोम्बारि लेखा दाछोक थुछापा कृष्णमुरारी चौलागाईसे पेस लाबा लेखा दाछोकला प्रतिवेदन सुताइ पारित लाबा नगरपालिकासे ग्रादाङ पिन्बा मुला ।
छेजोमदा सम्बोधन लाबान नगरग्रेन्पो तामाङसे नगरपालिकाला टुबा फेल्गेबा, पारदर्शीता, सुशासन थेन नागरिकमैत्री साप्तो पिन्बा ह्राङ्ला ग्रेन्पो प्राथमिकतारि मुबा पाङ्जि । थेसे नगरजोम्बा ग्याम पारित ऐन ओसेम प्रस्तावजुगुसे नगरला न्होरकि डिछ्याबादा डिछ्याना लाबान फेल्गेबा स्हेङ्बा गेदा प्रभावकारी स्होसेला ताम थान्जि । थेसे नगरला मुतेबा समृद्धिला लागि जनगोछापा प्रतिनिधि, कर्मचारी थेन नागरिकगुङरि छ्यागे अपरिहार्य मुबा उल्लेख लाबान क्योङला सक्रिय बोकिन्बा अपेक्षा थान्जि ।
(छिगकि दोनः जोम्बा– सभा, तापा– पुष, छा– औं, छेजोम– अधिवेशन, ग्रेन्पो– प्रमुख, फेल्गेबा– विकास, दोन्ता– उद्देश्य, डिक्लाबा– संशोधन, गोर– वटा, न्होरकि– आर्थिक, दाछोक– समिति, थुछापा– संयोजक, ब्रेल्चिबा– सम्बन्धी, डिछ्या– व्यवस्था, डिछ्याबा– व्यवस्थापन, ब्रेल्बा– सम्बन्ध, स्यानग्रेन्पो– उपप्रमुख, ग्रादाङ– जानकारी, टुबा– दिगो, साप्तो– सेवा, डिछ्याना– व्यवस्थित, गोछापा– प्रतिनिधि, छ्यागे– सहकार्य)
तपाईको प्रतिक्रिया दिनुहोस