पोखरा, २७ तापा । नेपाल तामाङ घेदुङ पोखरा महानगर दाछोकला सोमछा छेजोम ओसेम ल्होछारला ज्याबाम्हान्बा किन्बापिन्बा गेताङ तापा लाला २७ गते पोखरा चिप्लेढुङ्गाला दि भिलेज रेष्टुरेन्टरि स्योल्बा मुला ।

नेपाल तामाङ घेदुङ संघीयला ङ्हाच्छाला चोहो धनप्रसाद तामाङला ग्रेनडोन्बोरि ताबा छेजोम ओसेम बन्दसत्र नेपाल तामाङ घेदुङ गण्डकी प्रदेशला स्यानचोहो रामबहादुर तामाङ (शिवु)ला चोहोदानरि ताबा मुबा ।

छेजोमसे क्योङ्डिक्सि १५ ह्रोमिकि छार गेदाछोक दाम्बा मुला । छार दाछोकला चोहोरि अन्जना तामाङ मुला बिसाम स्यानचोहोरि मनकुमारी तामाङ मुला । गाउराइरि गंगा तामाङ, छ्यागाउराइरि सरिता तामाङ, न्होरचोहोरि जंगराज तामाङ मुला ।

ह्रोमिजुगुरि गुट्ठिमाया तामाङ, अस्मिता तामाङ, कृष्ण तामाङ, दुर्गादेवी तामाङ, गौमती तामाङ, रामबहादुर तामाङ, आशा तामाङ, रत्न तामाङ थेन धनमाया तामाङ मुला ।

गेताङरि ग्रेनडोन्बो धनप्रसाद तामाङसे तामाङ समुदायला ग्योइ, रिमठिम थेन ङोसेबा ख्युरछ्याला लागि महानगरला भूमिका ल्हाना प्रभावकारी तातोबारि बाङ पिन्जि । छ्यामरि, तामाङ समुदायला लिउला ङ्योलोक ग्युइरि दान्डिबा तातोबा सोनाम ल्होछार दाङ्बा मुतेबा तामाङसे चन्द्र चिला दानस्हि ग्युइ अनिवार्य स्ह्रुगरि थान्तोबा पाङ्जि । थेसे ल्होछार प्रिबा दाङ्बा नुर जेक्खे आताना थेतेन थुइबा चि, दर्शन थेन परम्पराला वैज्ञानिक थेन ऐतिहासिक तिलो गोतोबा उल्लेख लाजि । ‘दारेला ङ्योलोक भावनारि सीमित आहिन, ग्युइरि दान्डिबा तातोला बिबबा छार गेदाछोकदा सफल गेदुइला ज्याबाम्हान्बा पिन्जि ।

छेजोतेन ल्होछार ज्याबाम्हान्बा किन्बापिन्बा गेताङ नोन स्योल्बा मुबा । गेताङरि ल्होलो वक्ताजुगुसे तामाङ समुदायला संगठन सुदृढीकरण, एकता थेन खाबा रेला ग्यातछोफिरि धारणा थान्बा मुबा ।

गेताङरि नेपाल तामाङ घेदुङ केन्द्रीय ङ्हाच्छाला ग्यात्थोबा कुम बहादुर योन्जन, घेदुङला संघीय स्यानचोहो दिपक वाईवाला छ्याम स्यान्दो विशिष्ट व्यक्तिजुगुसे ज्याबाम्हान्बा सेमताम थान्बा मुबा ।

गंगा ग्याबाला  संचालन, जंगराज ब्लोन तामाङला डेन थेन अन्जना डुम्जन तामाङला चोहोदानरि चु गेताङ ताबा मुबा ।

(छिगकि दोनः गेदाछोक– कार्यसमिति, तापा– पुष, छेजोम– अधिवेशन, स्योल्बा– सम्पन्न, स्यानचोहो– उपाध्यक्ष, ह्रोमिकि– सदस्यीय, छ्यागाउराइ– सहसचिव, ह्रोमि– सदस्य, ङोसेबा– पहिचान, ख्युरछ्या– संरक्षण, लिउ– भावी, ङ्योलोक– आन्दोलन, दान्डिबा– आधारित, चि– पात्रो, दानस्हि– आधारभूत, नुर– विषय, तिलो– पक्ष, गेदुइ– कार्यकाल, ग्यातछो– कार्यदिशा, ग्यात्थोबा– कार्यबहाक, सेमताम– मन्तव्य)