(कोइलीसे ब्याङ्पिन्बा
कावाला के ह्राङ्बान मुला दाते
ङाला केवा...)
देन्बा ! आमा ङेबारि म्हाइला याखारगि ढुक्क ।
दुइसि मिख्लिग्याम ह्राङ्ला मिकादे
आमा ताङ्बा सेम लाला याखारगि छलक ।
बोगि कमजोरी मुला ङातेन
आमातेन याखारगि मु मोलम ।
आमा थेह्राङ्बा आचिनि खाराङ्बा मुबा ।
रहरकादे कुग्याम दिम ल्हेसि
गोरि खाबा मुला
ओम अभावसे प्लित्सि दिमला डेङ
गो कुर्बा मुला आमाला ।
च्युकुरुक्क ताबा थुमग्याम च्याला आमासे
ओम मारदिरि म्राङ्ला
बेक्टो दोगे लाबा म्हाङ्कादेला सिबा न्हा सोबा नाम्सा ।
ल्हानान ङ्हाच्छा आमाला याखारगि मु ताबा लामुबा
थेग्याम ताइमुबा ह्याल
थेग्याम ङ्हेमुबा रेकादे
ओम ह्राङ्लान छोर्मुबा दिनिफेबा दुइला बिजा फ्ला ।
ग्रेसि बेसुरा आलाप
ङ्हापङ्हाप स्हुखाबाकेन लाबा तारकादेरि
तिगा तिगा स्हेसे रोप्चिला
आमाला ल्हुइदा
रेनाङ
म्हुननाङ ।
ङा स्ह्योदा छुइसि खाल्तीन्हाङरि
कुटिसि थोन्ना दिमग्याम ।
रेरि फोन लामा
आमाला काइ खाला ग्याप्सेग्याम
‘ङादा आउदिन ज्याबा मुला लाइनु ।’
गाङ्साल सौदाला बु बुन्बारि आखाम्बा झोला न्हाङरि मुला आमा
स्हुखाबा ल्हुइला कटमेरो झोला थुङ्सिकेन ।
आमाला बोसिकेन निबा ल्हुइ डुप्बारि आखाम ।
आमाला डेसिकेन निबा म्हुन डुप्बारि आखाम ।
ङातेन मिख्लि मुला
आमातेन डोइखाबा ह्याल ।
आमासे आसुङ्साइ नोन
आमाला म्हाङ्कादेसे छ्वासि चिला ङाला कमजोरीदा
डेसिचिला ङाला असमर्थतादा ।
ङा याखारगि असफल आरोही
ओम ङोन्छाङ नोबा ज्योमोगाङ
आमाला छे ।
कपटी ताबा मुला केवा आमाला ।
खुच्चिङ बिला ।
बाङबुतासे कट्टिल बिसाइ नोन
आमाला ल्हाम तिल्दा आब्लाप होइ ?
दिम निबा ग्यालामदा म्हेनिङ्ला छार स्होन्बो आरेसाइ नोन
आमाला ल्हाम तिल्दा आब्लाप होइ ?
तिनि नोन
जाम्बुलिङला ह्रोल्ज्याङहेन्से थारेङ आरे आमा... ।
दार्जिलिङ, भारत ।
(व्हाइखाब्रिखेनसे ८ जुलाइकुनु आमाला केवासाङरि आमादा श्रद्धान्जली फुल्सिकेन चु व्हाइखा ब्रिबा हिन्ना ।)
(छिगला अर्थः कावा– काग, के– अण्डा, केवा– जिन्दगी, देन्बा– सत्ते, प्लित्सि– पिल्सिएर, थुम– टाकुरा, ग्रेसि– रेटिएर, ङ्हापङ्हाप– टनटन, बोबा– फाट्दै, डेबा– चिथोर्नु, फ्ला– पदचाप, कट्टिलः गुण्डा– हिन्दीछिग, ह्रोल्ज्याङ– संगीत)
दोःबा : यकिना अगाध
तपाईको प्रतिक्रिया दिनुहोस