च्याङ्बा ! स्यान्दोलान ग्याल्ठिमला ग्यालामरि
स्यान्दोलान रिमठिम, पेठिम थेन ह्युलठिमरि 
दुल्बान, दुल्बान चु ल्हुइदा सोना लासि 
म्हेमे आखेला दोङराप थेन छेनदा 
चु तिङरि थान्सिनाम
खाइ खानाङ खानाङ दोजि ह्याङ
खाइ तिला तिला नासि सोनालाजि ह्याङ्से 
ह्याङ तामाङला दोङराप ।

एसे दोइ नोन पुइजि
ए ढोके, हुक्के, छाते, पीपा नोन दोजि
चु ग्याल्साला ग्लेजुगुला दरवार न्हाङरि
ङा बुबुआमा, धाइ आमा नोन दोजि
ग्लेजुगुला तिसा थेन दरवारला कोटपटाङ्गिरि
लेफुम थेन पुइमा थिनागिन स्याजि
थेकादे बेनानदा म्लेसिमाम 
च्याङ्बा ! खाउ रेक्छागिक ए थेन ङा काठुइ लाइ ।

ङाला तिङ्ला स्हु एसे ङ्यान्गो
एला तिङ्ला स्हु ङाइ ङ्यान्ला
चु दिङसाङरि ए थेन ङा छ्याम छ्याम ताबा दुइ हिन्ना
चु दिङसाङरि ए थेन ङा ह्रापरुप तासि
गोर निलान तिङ्ला पोर साम्बा दुइ हिन्ना 
च्याङ्बा गोर गिक सट कफिला चुस्की किन्बाकेन 
आतासाम
सगुन पोङ्ला दुच्छे छ्योत लासिनाम 
च्याङ्बा ! खाउ रेक्छागिक ए थेन ङा काठुइ लाइ ।

च्याङ्बा तिङ्ला स्हुमि एला नोन 
ल्हानान मुला ताला
ङाला नोन ल्हानान ल्हानान मुला
एला स्हुदा फान्ना लाबारि 
ङाला स्हुदा थुम्ना लाबारि
खालाइला तिङ सुहाना लाबारि आता
खालाइला थोबो ग्युर लाबारि आता
म्हेमे आखेसे स्हेङ्बा चु ह्याङ्ला 
दोङराप गुर्बारि आता 
च्याङ्बा ! जाचाकी सेम छोर्नालासि
खाउ रेक्छागिक ए थेन ङा काठुइ लाइ ।  

ङाइ ओन्ना एदा छुम्सि थान्बा
जुगौं हिन्देला चु तिङ्ला पोर
सेम स्हुखाना आलासि
एला खारे खोइआच्यार्ना गि
एलान सेमह्रो म्हान्सि
च्याङ्बा ! थेगो या चु ङाला तिङला स्हु ।

‘लनी छङ्पो, लनी वङ्वै ग्याब्जेन थेन लनी महादेओला केवासे’
एदा म्हिए रेन्जेनरि ठुङ्ना लाजि
लनी छङ्पोसे ङादा 
लय लमो, गङ्सल्मो स्होतासि 
एदा सेमह्रो पुइजि ।

ह्याङ्ला दिमनाम थेन चु केवा ह्युल्दा ल्हेना लाबारि
ङादा ब्रागेलमो स्ह्युगरि एला सेमह्रो स्होजि
चु साजाम्बुलिङला क्योङ नोन नुप्सि निबा दुइरि
ए म्हेमे दोङ छेन्पो थेन ङा माम वाली साङ्मो डिक्सि
सोना लासि थान्जि चु म्हि ह्युल
ओम ग्याम नोन ल्हेसि निजि 
ह्याङ्ला केवाला राप ।

च्याङ्बा ! केवा ठुङ्सि लिच्छा नोन 
सेम नोङ्सि ए ग्यागर थुमरि फाप्पा दुइरि 
एदा पेङदोर्जे आखेला म्रावा फुरफुर स्याबा 
डम्फु पिन्सिमान 
डम्फूला ह्वाइरि ताम्बा काइरन कोबारि
ङाइ नोन बाङ पिन्बान हिन्ना । 
च्याङ्बा ! डान्गोले 
एतेन ङाला केवाला राप
ह्याङ छ्यामछ्याम नोन मुबा
ह्याङ छ्यामछ्याम नोन ब्राजि 
ह्याङ्ला दोङराप थेन चु ह्युलला रापदा रेना लाबारि ।

च्याङ्बा ! दिङ्ला ग्यालाम
चुराङलासि ङ्हाछा ङ्हाछा निजि कि 
दोङरापला ग्यालामरि ङामि गेनाम ह्राङ ताजि
ए ताम्बा दोसि ब्रामा जुगरि
ङा दिम न्हाङ्ला मुइमो दोसि चिजि 
ङामि एलान स्ह्युग ह्राङ जेक्खेन ताजि 
सेबा नोन एन ताजि
गोबा नोन एन ताजि
दिमला, सिमेभूमे थेन रिमठिमरि
एलान साङसेर्गेम कोजि 
ताम्बा काइरान कोबान कोबान  
ए याखारगिक ङ्हाछा ङ्हाछा ब्राजि
चोहोला बो एलान ताजि
ताम्बाला बोएन एलान ताजि
गान्बाला बोनोन एलान ताजि 
ङामि एसे खाराङ खाराङ लासि
डम्फु ह्राप्चि, थेनोनलासि स्यासि चिजि
एला काइतेन थेन काइरानदा ओन्मा ओन्मा हिन्दे थेसिचिजि ।  

च्याङ्बा ! थेना लाबाम एसे चु ह्युल्सादा थेनालाजि
माइच्याङकादेला आमा ग्याल्ठिम 
म्लेजि एसे माइच्याङकादेसे सोबा 
केवा थेन दोङरापला रापकादे 
माइच्याङकादेसे नोन सेम आलानि 
पुइबारि ताम्बा थेन गान्बाला दोइ
आपाङ्नि ताम्बा काइरान थेन चुला दोङराप ।

दारेम बिसाम ङाइ ग्रान चाजि च्याङ्बा !
ङा रेसिजिन्जि पेङदोर्जे आखेला दाङ्बोला डम्फु ह्राप्बारि 
थेना लाला चु ह्युल्दा ताम्बा काइतेन थेन काइरान
ङालान ग्योइ थेन सेमसे
ताम्बा थेन गान्बा दोसिनाम ।

ङा रेबारि म्हाइबा चु साजाम्बुलिङरि 
एदा सेम निजि कि आनिनि च्याङ्बा ?
डम्फु ह्राप्सि ङाइ ताम्बा काइरान 
लोप्पा, डोबा लामा 
ए स्याला कि आस्या क्रेप्सा पेकेङ पेकेङ दिङ्सि ?
च्याङ्बा ! खाउ रेक्छागिक ए थेन ङा काठुइ लाइ ।  

चु दुइरि एतेन ङाला सेम थिबारि आता
ह्याङ ल्होलो ल्होलो ताबारि आता 
एतेन ङा डिक्सि सोदोला 
ह्याङ तामाङला देबेन गोरगिक दोङराप   
थेराङ्लासि 
च्याङ्बा ! खाउ रेक्छागिक ए थेन ङा काठुइ लाइ ।